វិបត្តិអ៊ុយក្រែន ៖ ការចរចាគ្មានលទ្ធផល អំពើហិង្សាមានកាន់តែខ្លាំង
ក្តីសង្ឃឹមដ៏ស្តួចស្តើងដំបូង ថានឹងបានឃើញអ៊ុយក្រែនរកច្រកចេញពីវិបត្តិបន្ទាប់ពីប្រធានាធិបតីថ្មីអ៊ុយក្រែននិងរុស្ស៊ីនិយាយចូលគ្នា អាចត្រូវរលត់ទៅវិញ ... កាលពីថ្ងៃសៅរ៍យន្តហោះយោធាអ៊ុយក្រែនត្រូវបាញ់ទម្លាក់ដោយពួកប្រដាប់អាវុធស្និទ្ធិនឹងរុស្ស៊ី។ នៅថ្ងៃអាទិត្យថ្ងៃកាន់ទុក្ខជាតិ បាតុករអ៊ុយក្រែនជាច្រើននាក់នាំគ្នាធ្វើបាតុកម្មសងសឹកនៅមុខស្ថានទូតរុស្ស៊ីប្រចាំទីក្រុងគៀវ។ ឯចំណែកការចរចាផ្នែកថាមពលឧស្ម័ន នៅតែមិនទាន់លទ្ធផល ខណៈដែលឱសានវាទកំណត់ដោយក្រុមហ៊ុនហ្គាស្ត្រុមរុស្ស៊ី បានដល់ទី បញ្ចប់នៅម៉ោង៦ ម៉ោងសកលថ្ងៃចន្ទទី ១៦មិថុនានេះ។
ចុះផ្សាយនៅថ្ងៃ៖
ស្តាប់ - ០១:៤៦
ការចរចារវាងអ៊ុយក្រែន និងរុស្ស៊ី កំពុងរត់ប្រណាំងនឹងពេលវេលា ព្រោះបើគ្មានការសងប្រាក់ជំពាក់ជិត២ពាន់លានដុល្លារទេ ក្រុមហ៊ុនហ្គាសរុស្ស៊ី នឹងកាច់បិទបំពង់ឧស្ម័ន មិនឱ្យហូរចូលអ៊ុយក្រែន នៅថ្ងៃចន្ទទី ១៦មិថុនា វេលាម៉ោង៦ព្រឹកម៉ោងសកលតែម្តង ! ពេលវេលាកាន់តែខោច លទ្ធផលចរចានៅតែគ្មាន ភាគីទាំងពីរបានត្រឹមព្រៀមព្រៀងបន្តកិច្ចចរចាទៀត នៅល្ងាចថ្ងៃអាទិត្យទី ១៥មិថុនា ពោលគឺប៉ុន្មានមុនឱសានវាទប៉ុណ្ណោះ។
ការផ្តាច់ឧស្ម័នពីសំណាក់រុស្ស៊ី ជាអ្វីដែលអឺរ៉ុបទាំងមូលក្រែងរអាបំផុត ! ហេតុដូច្នេះហើយបានជាអឺរ៉ុបមានចំណែកចូលរួមចរចាជាមួយអ៊ុយក្រែន និងរុស្ស៊ី តាំងពីល្ងាចថ្ងៃសៅរ៍មក។ ម្យ៉ាងទៀត ទន្ទឹមនឹងវិបត្តិឧស្ម័ន ដោះស្រាយមិនចេញ អ៊ុយក្រែនបានធ្លាក់ក្នុងអន្ទាក់ហិង្សាមួយទៀត គឺការបាញ់ទម្លាក់យន្តហោះយោធា ស្លាប់មនុស្ស៤៩នាក់។ ប្រធានាធិបតីបារាំង និងប្រមុខរដ្ឋាភិបាលអាល្លឺម៉ង់បានទាក់ទងគ្នាយ៉ាងឆ្វាត់ឆ្វែងតាមទូរស័ព្ទអំពាវនាវឱ្យប្រធានាធិបតីរុស្ស៊ី ប្រើឥទ្ធិពលរបស់ខ្លួនលើពួកបះបោរប្រដាប់អាវុធនៅភាគខាងកើតអ៊ុយក្រែន ដើម្បីបិទបញ្ចប់ការដំឡើងសាច់ដុំដាក់គ្នា។
ពេញមួយថ្ងៃអាទិត្យ ទង់ជាតិអ៊ុយក្រែនបានទម្លាក់មកត្រឹមពាក់កណ្តាលទង់ជាការកាន់ទុក្ខជាតិ។ បាតុករអ៊ុយក្រែនជាច្រើននាក់បាននាំគ្នាប្រមូលផ្តុំគ្នានៅមុខស្ថានទូតរុស្ស៊ីប្រចាំទីក្រុងគៀវ។ ការប្រមូលផ្តុំដែលតែងតែរាលដាលជ្រុល។ រដ្ឋមន្ត្រីការបរទេសអ៊ុយក្រែន បានជ្រុលជ្រួសប្រើពាក្យជេរប្រទេច ប្រធានាធិបតីរុស្ស៊ី ពូទីន ក្រោមក្រសែភ្នែកតវា និងថ្កោលទោសយ៉ាងខ្លាំងពីសំណាក់រុស្ស៊ី។ បើម្ខាងថ្កោលទោលម្ខាង ចាក់ដោតគ្នាឥតឈប់យ៉ាងនេះ តើការចរចាម្តេចនឹងអាចចេញជាលទ្ធផលអ្វីទៅកើត ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ