សហភាពអឺរ៉ុបផ្តល់៥០០លានអឺរ៉ូ ដល់អ៊ុយក្រែន ប្រឈមនឹងការកាត់ផ្តាច់ឧស្ម័នរបស់រុស្ស៊ី
នៅថ្ងៃអង្គារនេះ គណៈកម្មការអឺរ៉ុបបានប្រកាសថា សហភាពអឺរ៉ុបបានផ្តល់ប្រាក់៥០០លានអឺរ៉ូ ជួយអ៊ុយក្រែន ប្រឈមនឹងការកាត់ផ្តាច់ឧស្ម័នរបស់រុស្ស៊ី។ អ៊ុយក្រែនអាចយកប្រាក់ជំនួយនេះ ទៅទិញឧស្ម័នពីក្រុមហ៊ុនអឺរ៉ុបបាន ដើម្បីដោះស្រាយតំរូវការឧស្ម័នក្នុងស្រុក។ ដោយឡែក នៅថ្ងៃអង្គារនេះ មានការផ្ទុះមួយបានកើតឡើង នៅបំពង់បង្ហូរឧស្ម័នដែលផ្គត់ផ្គង់ទៅអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
យោងតាមគណៈកម្មការអឺរ៉ុប ប្រាក់៥០០រយលានអឺរ៉ូ ដែលសហភាពអឺរ៉ុបជួយដល់រដ្ឋាភិបាលអ៊ុយក្រែននោះ អ៊ុយក្រែនអាចយកទៅប្រើដោះស្រាយបញ្ហាហិរញ្ញវត្ថុជាតិ។ ហើយអ៊ុយក្រែនក៏អាចយកវា ទៅទិញឧស្ម័នពីក្រុមហ៊ុនឧស្ម័នអឺរ៉ុបនានាផងដែរ ដើម្បីដោះស្រាយតំរូវការឧស្ម័នក្នុងស្រុក។
កាលពីថ្ងៃចន្ទ ប្រធានក្រុមហ៊ុនឧស្ម័នអ៊ុយក្រែនបានប្រកាសថា បានទាក់ទងក្រុមហ៊ុនឧស្ម័នអឺរ៉ុបជាច្រើន។ ក្រុមហ៊ុនទាំងនោះបានត្រៀមលក់ឧស្ម័នអោយអ៊ុយក្រែន ក្នុងតម្លៃ៣២០ដុល្លារ ១ពាន់ម៉ែត្រគូប។ តម្លៃនេះទាបជាងតម្លៃលក់របស់រុស្ស៊ី ដែលបានកើនដល់៣៨៥ដុល្លារ សម្រាប់ឧស្ម័ន១ពាន់ម៉ែត្រគូប។ លើសពីនេះ អ៊ុយក្រែនក៏ជាអតិថិជនរបស់ក្រុមហ៊ុនឧស្ម័នអាល្លឺម៉ង់ និងបារាំងរួចហើយដែរ។
គួររំលឹកថា រុស្ស៊ីបានកាត់ផ្តាច់ការផ្គត់ផ្គង់ឧស្ម័នដល់អ៊ុយក្រែន ចាប់ពីថ្ងៃចន្ទមក ដោយសារតែអ៊ុយក្រែនមិនបានសងបំណុលឧស្ម័ន ខែវិច្ឆិកា និងខែធ្នូ ឆ្នាំ២០១៣ និងខែមេសា ឧសភា ឆ្នាំនេះ។ ក្នុងពេល២-៣ខែដំបូងនេះ អ៊ុយក្រែននៅមានឧស្ម័នបំរុងក្រោមដីខ្លះ និងមានជំនួយពីអឺរ៉ុបខ្លះដែរ។ ហើយរដូវក្តៅនេះ អ៊ុយក្រែនក៏មិនត្រូវការប្រើប្រាស់ឧស្ម័នច្រើនដែរ។ សហភាពអឺរ៉ុបចង់អោយបរិមាណឧស្ម័នបំរុងរបស់អ៊ុយក្រែន ដំឡើងបានពី១៣ពាន់៥រយលានម៉ែត្រគូប ដល់២០ពាន់លានម៉ែត្រគូប នៅមុនចុងរដូវក្តៅឆ្នាំនេះ។
ទោះយ៉ាងនេះក្តី យោងតាមស្ថានភាពជាក់ស្តែង ការទិញឧស្ម័នពីអឺរ៉ុបក៏នៅតែមិនអាចបំពេញតំរូវការក្នុងស្រុកសម្រាប់អ៊ុយក្រែនដែរ ព្រោះថា ក្នុងឆ្នាំ ២០១៣ កន្លងទៅ អ៊ុយក្រែនបានប្រើឧស្ម័នអស់៥០ពាន់លានម៉ែត្រគូប ក្នុងនោះឧស្ម័ន៣០ពាន់លានម៉ែត្រគូប ទិញពីរុស្ស៊ី ហើយ២០ពាន់ម៉ែត្រគូបទៀតនោះ ជាឧស្ម័នមានក្នុងស្រុក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ