ជំនួបកំពូលដើម្បីទប់ស្កាត់ភេរវកម្មនុយក្លេអ៊ែរ
ជំនួបកំពូលស្តីពីសន្តិសុខនុយក្លេអ៊ែរប្រព្រឹត្តទៅនៅថ្ងៃនេះនិង ថ្ងៃស្អែកនៅទីក្រុង Washington។ គឺជាជំនួបកំពូលមួយដែលផ្តួចផ្តើមធ្វើឡើងដោយលោកប្រធានាធិបតី Obamaនិងដែលចូលរួមដោយអ្នកដឹកនាំកំពូលៗមកពី ៥០ប្រទេសក្នុងលោក។ ប្រធានរឿងធំដែលត្រូវលើកយកមកពិភាក្សាគឺ ភេរវកម្មនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ពួកភេរវជនអាចនឹងលួចទិញអាវុធនុយក្លេអ៊ែរ ហើយអាវុធនុយក្លេអ៊ែរក៏អាចនឹងធ្លាក់ទៅក្នុងដៃរបស់ពួកភេរវជន ដែរ។ ម្ល៉ោះហើយបានជានៅថ្ងៃនេះ ប្រធានាធិបតីអាមេរិក បានអញ្ជើញបណ្តាអ្នកដឹកនាំកំពូលៗនៃប្រទេសចំនួន៥០ មកជួបជុំគ្នានៅក្នុងរដ្ឋធានី Washington ដើម្បីតស៊ូមតិស្វែងរកវិធានការរួម ឬក៏ធ្វើសេចក្តីថ្លែងការណ៍រួមគ្នា ប្រយុទ្ធប្រឆាំងនឹងអ្វីដែលគេហៅថា "ភេរវកម្មនុយក្លេអ៊ែរ"។
គឺ ជាលើកទីមួយហើយ ដែលមានជំនួបកំពូលអន្តរជាតិបែបនេះមួយ ដើម្បីការពារធ្វើយ៉ាងណាកុំឲ្យគ្រាប់នុយក្លេអ៊ែរ កាំជ្រួចមីស៊ីលដែលពាំក្បាលនុយក្លេអ៊ែរបាន ឬក៏ជាតិ Plutonium និងUraniumដែលចម្រើនធាតិហើយ អាចធ្លាក់ទៅក្នុងដៃរបស់ពួកភេរវជនឬទៅក្នុងដៃរបស់ក្រុមប្រទេស មិនធម្មតា ដូចយ៉ាងអៀរ៉ង់និងកូរ៉េខាងជើងជាដើម។
ជំនួបកំពូល នេះ ក៏ជាឱកាសមួយសម្រាប់ឲ្យលោកប្រធានាធិបតីអាមេរិកអាចជួបជាទ្វេភាគី ជាមួយអ្នកដឹកនាំនៃប្រទេសធំៗក្នុងលោកមួយចំនួន រួមមានជាអាទិ៍ ប្រធានាធិបតីចិន Hu Jintao នាយករដ្ឋមន្ត្រីឥណ្ឌា Manmohan Singh នាយករដ្ឋមន្ត្រីប៉ាគីស្តង់ Youssouf Razac Gilani និងព្រះចៅ Abdallahនៃប្រទេសJordanie។
ជំនួបកំពូលស្តីពីការទប់ស្កាត់ ភេរវកម្មនុយក្លេអ៊ែរនេះ ត្រូវបានរៀបចំឡើង ប៉ុន្មានថ្ងៃប៉ុណ្ណោះ ក្រោយពីអាមេរិកនិងរុស្ស៊ី បានចុះហត្ថលេខាលើសន្ធិសញ្ញាថ្មីស្តីពីការរំសាយអាវុធនុយក្លេអ៊ែរ នៅទីក្រុង Parague សាធារណរដ្ឋឆែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ