ក្រុមអ្នកសង្កេតការណ៍អន្តរជាតិនឹងកើនឡើងដល់ ៣០០នាក់ នៅស៊ីរី
ចុះផ្សាយនៅថ្ងៃ៖
ស្តាប់ - ០៧:៤០
នៅថ្ងៃសៅរ៍ទី ២១ មេសា ២០១២ ក្រុមប្រឹក្សាសន្តិសុខរបស់អង្គការសហប្រជាជាតិត្រូវបោះឆ្នោត អនុម័តលើសេចក្តីសម្រេចថ្មីមួយទៀតស្តីពីការបញ្ជូនអ្នកសង្កេតការណ៍បន្ថែមទៀត ទៅប្រទេសស៊ីរី។ ប៉ុន្តែ នៅមុនការបោះឆ្នោត គេឃើញនៅតែមានគំនិតប្រឆាំងគ្នា។ អត្ថបទស្នើដោយប្រទេសរុស្ស៊ី ទាមទារចង់ឲ្យគេបញ្ជូនអ្នកសង្កេតការណ៍ ទៅប្រទេសស៊ីរី ឆាប់ៗ ចំណែកសហភាពអឺរ៉ុបវិញ ដែលបានស្នើអត្ថបទមួយដែរ មិនទាន់ចង់ឲ្យគេបញ្ជូនអ្នកសង្កេតការណ៍ទៅភ្លាមៗទេ និងទាមទារឲ្យគេដាក់ទណ្ឌកម្មសេដ្ឋកិច្ចបន្ថែម ប្រសិនបើរដ្ឋាភិបាលស៊ីរី មិនគោរពធ្វើតាម ផែនការសន្តិភាពរបស់លោកកូហ្វី អាណាន់ បេសកជនពិសេសរបស់អង្គការសហប្រជាជាតិ និងសម្ព័ន្ធអារ៉ាប់។
ក្នុងអត្ថបទដែលខ្លួនស្នើឡើង សហភាពអឺរ៉ុប យល់ស្របជាមួយរុស្ស៊ី គឺធ្វើតាមសំណើរបស់លោកបាន គីមូន អគ្គលេខាធិការអង្គការសហប្រជាជាតិដែលចង់ឲ្យគេបញ្ជូនអ្នកសង្កេតការណ៍បន្ថែម គឺឲ្យដល់៣០០នាក់ ទៅប្រទេសស៊ីរី។ ប្រទេសនៅអឺរ៉ុបសុទ្ធតែយល់ស្របថា ចំនួនអ្នកសង្កេតការណ៍ដែលក្រុមប្រឹក្សាសន្តិសុខបានសម្រេចបញ្ជូនទៅ កាលពីថ្ងៃសៅរ៍ សប្តាហ៍មុន មានចំនួនតិចតួច មិនអាចធ្វើឲ្យ រដ្ឋាភិបាលស៊ីរី និងក្រុមប្រឆាំងគោរពបទឈប់បាញ់បានទេ។
ប៉ុន្តែ យ៉ាងណាក៏ដោយ ក្រុមប្រទេសអឺរ៉ុបស្នើសុំកុំទាន់ ឲ្យគេបញ្ជូនអ្នកសង្កេតការណ៍ទៅប្រទេសស៊ីរីភ្លាមៗ ព្រោះ ដោយសារគេបារម្ភពីបញ្ហាអសន្តិសុខ។ ក្រុមប្រទេសអឺរ៉ុបបានទាមទារឲ្យលោកបាន គីមូន ពិចារណាឲ្យបានល្អិតល្អន់ មុននឹងសម្រេចបញ្ជូនអ្នកសង្កេតការណ៍ថ្មីទៅស៊ីរី។
ក្នុងអត្ថបទស្នើរបស់ខ្លួន ក្រុមប្រទេសអឺរ៉ុបនិយាយថា វាមានសារសំខាន់ដែលគេត្រូវបញ្ជូនអ្នកសង្កេតការណ៍ទៅស៊ីរី។ ប៉ុន្តែ គេក៏ត្រូវគិតគូរពីគ្រោះថ្នាក់ដែលអាចកើតមានដល់ក្រុមអ្នកសង្កេតការណ៍ទាំងនោះផងដែរ ព្រោះថា អសន្តិសុខនៅកើតមានពេញផ្ទៃប្រទេសស៊ីរី។ រហូតមកដល់ពេលនេះ រដ្ឋាភិបាលស៊ីរី នៅតែមិនទាន់ដកទ័ព និងអាវុធធុនធ្ងន់ពីទីក្រុង និងទីប្រជុំជន ក្នុងប្រទេសស៊ីរី ទៅតាមផែនការរបស់លោកកូហ្វី អាណាន់។
អ្នកសង្កេតការណ៍អន្តរជាតិ៦រូបដែលពេលនេះកំពុងស្ថិតក្នុងទឹកដីស៊ីរីបានរាយការណ៍ថា គេឮរាល់ថ្ងៃសំឡេងគ្រាប់កាំភ្លើង និងគ្រាប់ផ្លោង ផ្ទុះ។ នេះជាលើកទីមួយ ដែលអង្គការសហ ប្រជាជាតិបានបញ្ជូនអ្នកសង្កេតការណ៍របស់ខ្លួន ទៅក្នុងតំបន់ដែលកំពុងផ្ទុះមានសង្រ្គាម និងអំពើហិង្សា។
អំពើហិង្សា និងករណីមនុស្សស្លាប់ ដោយការបាញ់ប្រហារដោយកើតមានជារៀងរាល់ថ្ងៃ។ បើតាមលោកបាន គីមូន ទាំងរដ្ឋាភិបាលស៊ីរី និងទាំងក្រុមប្រឆាំងស៊ីរីមិនបានគោរពបទឈប់បាញ់តាមផែនការសន្តិភាពរបស់លោកកូហ្វី អាណាន់ ដែលអង្គការសហប្រជាជាតិ និងសម្ព័ន្ធអារ៉ាប់បានតែងតាំងជាបេសកជនសម្រាប់ដោះស្រាយវិបត្តិស៊ីរីនោះទេ។
យ៉ាងណាក៏ដោយ បើតាមមន្រ្តីទូតអង់គ្លេសម្នាក់នៅអង្គការសហប្រជាជាតិ គ្រប់ភាគីទាំងអស់រួមទាំងរុស្ស៊ីនិងចិនផង ទំនងអាចនិយាយចុះសម្រុងគ្នាលើលក្ខខណ្ឌបញ្ជូនអ្នកសង្កេតការណ៍សរុប ៣០០នាក់ទៅស៊ីរី។ បេសកកម្មរបស់ពួកគេមានរយៈពេល៣ខែ។ អ្នកសង្កេតការណ៍របស់អង្គការសហប្រជាជាតិដែលសុទ្ធតែជាអ្នកជំនាញខាងនយោបាយ សិទ្ធិមនុស្ស និងរដ្ឋាភិបាលមានតួនាទីតាមដានមើលបទឈប់បាញ់ និងស្ថានភាពមនុស្សធម៌។ តាមខ្លឹមសារអត្ថបទដែលស្នើដោយអឺរ៉ុប និងរុស្ស៊ី ក្រុមអ្នកសង្កេតការណ៍អន្តរជាតិត្រូវមានសិទ្ធិធ្វើដំណើរទៅគ្រប់កន្លែង ក្នុងទឹកដីស៊ីរី និងត្រូវស្ថិតនៅក្រោមកិច្ចការពារសុវត្ថិភាពពីសំណាក់ទាហានរដ្ឋាភិបាលស៊ីរី ព្រោះក្រុមអ្នកសង្កេតការណ៍ទាំងនោះគ្មានអាវុធក្នុងដៃទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ