បទឈប់បាញ់នៅស៊ីរី ជាទូទៅត្រូវគេគោរពតាមទោះបីមានការបង្កហេតុខ្លះក្តី
នេះជាយោបល់យល់ឃើញរបស់ទីក្រុងម៉ូស្គូដែលតែងកាន់ជើងរដ្ឋាភិបាលស៊ីរី។ យោបល់នេះ ត្រូវបានបញ្ចេញព្រឹកថ្ងៃសុក្រ២០មេសានេះ ក្នុងសេចក្តីថ្លែងការណ៍របស់ការទូតរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
ថ្លែងព្រឹកមិញ អ្នកនាំពាក្យផ្លូវការក្រសួងការបរទេសរុស្ស៊ី លោក Alexandre Loukachevitch គូសបញ្ជាក់ថា ធាតុពិត នៃបញ្ហា ដែលចោទនៅស៊ីរីបច្ចុប្បន្ននេះ គឺថាឬមួយ ឥឡូវជាដំណាក់កាលឆ្លងទៅកាន់សំវាទរវាងភាគីបដិបក្ខនៅស៊ីរីផ្ទាល់ ក្នុងនាមស្រុះស្រួលជាតិ ដោយសន្តិវិធី ឫមួយ ប្រទេសស៊ីរី នឹងរអិលខ្លួន ទៅក្នុងសង្គ្រាមស៊ីវិលតែម្តង។ ដូច្នេះ ភាគីនិមួយៗ ដែលជាប់ក្នុងទំនាស់នៅស៊ីរី ត្រូវតែធ្វើជម្រើសខានមិនបាន។ មកពីមូលហេតុនេះ បានជាឥឡូវ ភារកិច្ចធំចម្បង គឺត្រូវតែពង្រឹង របបឈប់បាញ់។
តាមអ្នកការទូតរុស្ស៊ី ទីក្រុងម៉ូស្គូទទូចឲ្យ “ចាំបាច់ត្រូវតែពង្រឹងចំណុចគោលនេះ” នៃផែនការ លោក Kofi Annan ក្នុងឋានៈ ជាបេសកជនពិសេសរបស់ អ.ស.ប.និង “សម្ព័ន្ធអារ៉ាប” ខាងរាវរកដំណោះស្រាយតាមផ្លូវ នយោបាយ និងការទូត ឲ្យវិបត្តិរ៉ាំរ៉ៃអស់ជាង១ឆ្នាំហើយនៅស៊ីរី ដែលក្នុង អំឡុងពេលនេះ តាមយោបល់រុស្ស៊ី ដោយមកពីប្រតិបត្តិការបង្ក្រាបពីខាងអាជ្ញាធរទៅលើរលកប្រឆាំង ក៏ដូចជាមកពី អំពើបង្កហេតុពីខាងពួកប្រឆាំង គឺមានមនុស្សធ្លាក់ខ្លួនស្លាប់អស់ប្រមាណ ១១.០០០នាក់ទៅហើយ។
អ្នកការទូតរុស្ស៊ី សង្កត់ធ្ងន់ថា ការដែលបទឈប់បាញ់នៅស៊ីរី ជាទូទៅត្រូវគេបំពេញតាម គឺ ជាជោគជ័យមួយនៃផែនការនោះឯង ពុំនោះសោតទេ គឺអាចអូសទាញស្ថានការណ៍ ឲ្យស្រុត ចុះអាក្រក់ ទាំងហែហមជាថ្មី ទៅដោយអំពើហិង្សា គ្មានទីបញ្ចប់។
ក្នុងផ្ទៃនេះ តាមការសង្កេតឃើញនៃ សាខារបស់”អង្គការការពារសិទ្ធិមនុស្ស” ដែលប្រចាំនៅស៊ីរី គ្រាន់តែក្នុងរយៈពេល៨ថ្ងៃ កន្លងទៅ បន្ទាប់ពីផែនការលោក Kofi Annan ចូលជាធរមានមក ដោយមក ពីការរំលោភបំពានគ្មានលោះថ្ងៃណាឡើយ លើបទឈប់បាញ់នៃផែនការនេះ គឺមាន បណ្តាជនស៊ីវិល ក្ស័យជីវិតយ៉ាងហោចណាស់ អស់១៣០នាក់ទៀត។
ការទូតរុស្ស៊ី ក៏កត់សម្គាល់ថា ទីក្រុងម៉ូស្គូ ទទួលយកដោយសោមនស្សន៍ ដំណឹងដែលថា ថ្ងៃ១៩មេសាម្សិលមិញ ថ្នាក់ដឹកនាំស៊ិរី បានចុះកិច្ចព្រមព្រៀង ជាមួយពួកអ្នកសង្កេតការណ៍ មួយក្រុមដំបូងរបស់អ.ស.ប. ស្តីអំពីរបៀបរបប សម្រាប់គេបំពេញបេសកកម្មគេ នៅលើដែនដី ប្រទេសស៊ីរី។ រុស្ស៊ី នឹងមានអ្នកសង្កេតការណ៍ខ្លួន ចំនួនដល់ទៅ៤នាក់ សម្រាប់ប្រចាំក្នុង បេសកកម្មអន្តរជាតិនោះ ដែលនឹងមានគ្នា រហូតដល់៣០០នាក់។
ទាក់ទងនឹងបេសកកម្មនេះ លោករដ្ឋមន្ត្រីការបរទេសរុស្ស៊ី Serguei Lavrov បានថ្លែងនៅក្រុង Bruxelles ម្សិលមិញថា ម៉ូស្គូ មិនអនុញ្ញាតឲ្យ “ក្រុមប្រទេស ដែលលើកខ្លួនឯង ជាមិត្តរបស់ស៊ីរី” ប៉ុន្តែដែលតាមធាតុពិត គឺគាំទ្រតែពួកប្រឆាំងនៅស៊ីរី ឲ្យដើរតូជំនួស ក្រុមប្រឹក្សាសន្តិសុខ អ.ស.ប.ឡើយខាងសន្និដ្ឋានអំពីការងារខាងបំពេញតាមផែនការសន្តិភាពរបស់លោក Kofi- Annan៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ