ក្រុមប្រឹក្សាសន្តិសុខអនុម័តបញ្ជូនអ្នកសង្កេតការណ៍ទៅស៊ីរី
នៅទីបំផុតរុស្ស៊ីបានគាំទ្រសេចក្តីសម្រេចបញ្ជូនអ្នកសង្កេតការណ៍ទៅស៊ីរី។ សេចក្តីសម្រេចនេះត្រូវបានក្រុមប្រឹក្សាសន្តិសុខអនុម័ត កាលពីថ្ងៃសៅរ៍ ម្សិលមិញ។ អ្នកសង្កេតការណ៍ចំនួន ៦នាក់ដំបូង នឹងទៅដល់ស៊ីរី នៅថ្ងៃអាទិត្យនេះ នៅក្នុងពេលដែលអំពើហិង្សានៅតែបន្តកើតមាន ទោះបីបទឈប់បាញ់បានចូលជាធរមាន កាលពីថ្ងៃព្រហស្បតិ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
សេចក្តីសម្រេចលេខ២០៤២ ត្រូវបានប្រទេសសមាជិកក្រុមប្រឹក្សាសន្តិសុខបោះឆ្នោតអនុម័តដោយសំឡេងគាំទ្រជាឯកច្ឆន្ទ។ ក្នុងនោះក៏មានសំឡេងគាំទ្ររបស់រុស្ស៊ី និងចិនផងដែរ។
សេចក្តីសម្រេចនេះចែងថា អ្នកសង្កេតការណ៍ស៊ីវិលជាជំហានដំបូងចំនួន ៣០នាក់ នឹងត្រូវបញ្ជូនទៅពិនិត្យមើលបទឈប់បាញ់នៅស៊ីរី។ អ្នកសង្កេតការណ៍ទាំងនេះត្រូវមានសិទ្ធិសេរីភាពពេញលេញក្នុងការបំពេញបេសកកម្មរបស់ខ្លួន ហើយអាជ្ញាធរស៊ីរីជាអ្នកទទួលខុសត្រូវរក្សាសុវត្ថិភាពអ្នកសង្កេតការណ៍ទាំងអស់នេះ។ ក្រុមប្រឹក្សាសន្តិសុខបានព្រមានថានឹងចាត់វិធានការផ្សេងទៀត ប្រសិនបើស៊ីរីមិនគោរពតាមសេចក្តីសម្រេចនេះ ព្រមទាំងបានថ្កោលទោសនូវរាល់ការរំលោភសិទ្ធិមនុស្ស ពីគ្រប់ភាគីទាំងអស់ នៅស៊ីរី។
រុស្ស៊ី ដែលជាសម្ព័ន្ធមិត្តរបស់លោកអាសាដ បានពន្យល់ថា រុស្ស៊ីសុខចិត្តបោះឆ្នោតគាំទ្រសេចក្តីសម្រេចនេះ ពីព្រោះថា ការបញ្ជូនអ្នកសង្កេតការណ៍ទៅត្រួតពិនិត្យបទឈប់បាញ់ នៅស៊ីរី គឺជារឿងចាំបាច់។ ម្យ៉ាងទៀត គេសង្កេតឃើញថា លោកខាងលិចបានសុខចិត្តកែប្រែសេចក្តីព្រាងដើម ដោយលុបការទាមទារឲ្យលោកអាសាដដកទ័ព និងអាវុធធុនធ្ងន់ចេញពីទីក្រុង និងទីប្រជុំជន ដើម្បីតម្រូវទៅតាមការទាមទាររបស់រុស្ស៊ី។
អ្នកសង្កេតការណ៍មួយក្រុមដំបូង មានគ្នា ៦នាក់ នឹងត្រូវទៅដល់ប្រទេសស៊ីរី នៅថ្ងៃអាទិត្យនេះ ហើយជាង ២០នាក់ផ្សេងទៀតនឹងទៅដល់នៅថ្ងៃបន្តបន្ទាប់។ លោកបាន គីមូន អគ្គលេខាធិការអ.ស.ប.បានប្រកាសថា លោកនឹងរៀបចំសំណើលម្អិតមួយ នៅថ្ងៃទី១៨ មេសាខាងមុខ ដើម្បីបង្កើនចំនួនអ្នកសង្កេតការណ៍ដល់ ២៥០នាក់ ស្របទៅតាមគម្រោងរបស់លោកកូហ្វ៊ី អាណាន់។ ក៏ប៉ុន្តែ ការបង្កើនចំនួនអ្នកសង្កេតការណ៍នេះអាចធ្វើទៅបាន លុះត្រាតែបទឈប់បាញ់នៅស៊ីរីត្រូវបានអនុវត្តពីគ្រប់ភាគី ហើយត្រូវឆ្លងកាត់ការបោះឆ្នោតមួយថ្មីទៀត នៅក្រុមប្រឹក្សាសន្តិសុខ។
គួររម្លឹកឡើងវិញថា កន្លងមក សម្ព័ន្ធអារ៉ាប់ក៏ធ្លាប់បានបញ្ជូនអ្នកសង្កេតការណ៍ទៅស៊ីរីដែរ ប៉ុន្តែ បេសកកម្មនោះត្រូវទទួលបរាជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ