ស្ត្រីអាមេរិកដើមកំណើតអ៊ីរ៉ង់ជាស្ត្រីដំបូងបំផុត ទទួលមេដាយFields ផ្នែកគណិតវិទ្យា
ទីបំផុត មានស្ត្រីមានចំណេះដឹងខ្ពស់ ទទួលបានពានរង្វាន់អន្តរជាតិផ្នែកគណិតវិទ្យាហើយ។ ស្ត្រីអាមេរិកដើមកំណើតអ៊ីរ៉ង់ ឈ្មោះ Maryam Mirzakhani ម៉ារីយ៉ាំ មៀហ្សាខានី បានជាប់ឈ្មោះទទួលពានរង្វាន់អន្តរជាតិគណិតវិទ្យា ដែលយើងហៅថា មេដាយ Fields នោះ។ នេះបើយោងតាមការប្រកាសរបស់សមាជអន្តរជាតិផ្នែកគណិតវិទ្យានៅថ្ងៃអង្គារម្សិលមិញ។ បុរស៣រូបទៀតដែលទទួល មេដាយFieldsផ្នែកគណិតវិទ្យានេះដែរ មានលោក អាតៀ អាវីឡា Arthur Avila ពលរដ្ឋបារាំងដើមកំណើតប្រេស៊ីល ជាប្រធានមណ្ឌលស្រាវជ្រាវវិទ្យាសាស្ត្រជាតិបារាំង លោកម៉ាន់ជុល បាហ្កាវ៉ា Manjul Bhargava ជាសាស្ត្រាចារ្យអាមេរិក និងលោក ម៉ាទីន ហៃរែរ Martin Hairer ជាអ្នកស្រាវជ្រាវជនជាតិអូទ្រីស ធ្វើការនៅអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
លោកស្រីម៉ារីយ៉ាំ មៀហ្សាខានី អាយុ៣៧ឆ្នាំ ជាស្ត្រីដំបូងបំផុត ដែលទទួលមេដាយ Fields ផ្នែកគណិតវិទ្យា។ មេដាយ Fields ត្រូវគេប្រគល់អោយអ្នកពូកែគណិតវិទ្យា រៀងរាល់៤ឆ្នាំម្តង។ មេដាយនេះត្រូវគេចាត់ទុកដូចពានរង្វាន់ណូបែលផ្នែកគណិតវិទ្យាដែរ។
លោកស្រីម៉ារីយ៉ាំ ជាពលរដ្ឋអាមេរិក ដើមកំណើតកើតជានៅក្រុងតេហេរ៉ង់ ប្រទេសអ៊ីរ៉ង់។ លោកស្រីជាគ្រូបង្រៀននៅសកលវិទ្យាល័យ Stanford ក្នុងរដ្ឋCalifornie។ ក្នុងឆ្នាំ២០០៤ លោកស្រីបានទទួលបរិញ្ញាប័ត្របណ្ឌិត នៅសកលវិទ្យាល័យ Harward។ ក្នុងផ្នែកគណិតវិទ្យា លោកស្រី ម៉ារីយ៉ាំ ជាអ្នកជំនាញខាងទ្រង់ទ្រាយវត្ថុផ្សេងៗ ជាទ្រង់ទ្រាយខុសពីធម្មតា។ លោកស្រីបានរកឃើញ វិធីថ្មីៗដើម្បីវាស់ទំហំវត្ថុ ដែលមានផ្ទៃបត់បែនឡើងចុះ ឧទាហរណ៍ដូចជាកែបសេះ រឺកែបកង់ជាដើម។
ម៉ារីយ៉ាំ ក៏ធ្លាប់ទទួលពានរង្វាន់គណិតវិទ្យា២ផ្សេងទៀតដែរ គឺពាន Blumental ទទួលបាន ក្នុងឆ្នាំ២០០៩ សម្រាប់ការវិវត្តន៍ទៅមុខនៃការស្រាវជ្រាវគណិតវិទ្យា ហើយក្នុងឆ្នាំ២០១៣ ទទួលបានពានរង្វាន់ អាមេរិក Satter។ ការទទួលមេដាយ Fields ឆ្នាំ២០១៤ មិនត្រឹមជាមោទនភាពសម្រាប់អាមេរិក រឺអ៊ីរ៉ង់ទេ តែជាមោទនភាពសម្រាប់ស្ត្រីគ្រប់រូប ព្រោះថា ជាទូទៅ ស្ត្រីមិនសូវជាពូកែផ្នែកគណិតវិទ្យាដូចបុរសទេ។ លោកស្រីម៉ារីយ៉ាំសង្ឃឹមថា ពានរង្វាន់ដែលលោកស្រីទទួលបាននេះ អាចលើកទឹកចិត្តដល់ស្ត្រីជាអ្នកជំនាញវិទ្យាសាស្ត្រនិងគណិតវិទ្យាផ្សេងទៀត ក្នុងការងាររបស់ពួកគេ។
អ្នកទទួលមេដាយគណិតវិទ្យា Fields ម្នាក់ៗ ទទួលបានទឹកប្រាក់ប្រមាណ១ម៉ឺន១ពាន់អឺរ៉ូ។ គួររំលឹកដែរថា តាំងពីឆ្នាំ១៩៣៦ មក រាល់៤ឆ្នាំម្តង មេដាយ Fields ត្រូវបានប្រគល់អោយតែអ្នកជំនាញគណិតវិទ្យា៤រូបប៉ុណ្ណោះ។ អ្នកទាំង៤នេះ ត្រូវមានអាយុក្រោម៤០ឆ្នាំ។
មេដាយ Fields ជាការផ្តួចផ្តើមគំនិតរបស់អ្នកគណិតវិទ្យាជនជាតិកាណាដា ចន ឆាល Jonh Charles ក្នុងឆ្នាំ១៩២៣។ លោកចន ស្លាប់ក្នុងឆ្នាំ១៩៣២។ លោកបានប្រគល់ទ្រព្យសម្បត្តិលោកអោយផ្នែកវិទ្យាសាស្ត្រ ដើម្បីជួយឧបត្ថម្ភពានរង្វាន់គណិតវិទ្យានេះ។ តាំងពីឆ្នាំ១៩៣៦មក ក្នុងចំណោមអ្នកជាប់ឈ្មោះទទួលមេដាយ Fields សរុប ៥៥នាក់ ពលរដ្ឋអាមេរិកនិងពលរដ្ឋបារាំងទទួលបានពានរង្វាន់ច្រើនជាងគេ។ ពលរដ្ឋអាមេរិកមាន១៣នាក់ បារាំង១២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ