ប្រមុខការទូតបារាំង នឹងទៅអ៊ីរ៉ាក់ឆាប់ៗនេះ ដើម្បីរកមធ្យោបាយចាត់ការពួកឧទ្ទាមភេរវកម្មជីហាត
រដ្ឋមន្ត្រីការបរទេសបារាំងលោក ហ្សង់ អ៊ីវ ឡឺ ឌ្រីយ៉ង់ (Jean-Yves Le Drian) នឹងអញ្ជើញធ្វើដំណើរទៅប្រទេសអ៊ីរ៉ាក់ ក្នុងពេលឆាប់ៗនេះ ដើម្បីរកមធ្យោបាយ និងវិធានការដោះស្រាយសំណុំរឿងពួកឧទ្ទាមភេរវកម្មជីហាត។ ដំណឹងនេះគឺលោកបានបញ្ជាក់ប្រាប់សារព័ត៌មាននៅក្នុងស្រុកបារាំង ពីថ្ងៃពុធ ទី១៦តុលា។ បើតាមប្រមុខការទូតបារាំងដដែល, អ៊ីរ៉ាក់ ជាប្រទេសដែលកំពុងតែត្រូវការក្តីសាមគ្គីភាពរបស់សហគមន៍អន្តរជាតិ ហើយអ៊ីរ៉ាក់ ជាប្រទេសមួយដែលមានសញ្ញាណអំពើភេរវកម្មច្រើន ហើយក៏ជាប្រទេសដែលត្រូវរងគ្រោះយ៉ាងដំណំដែរពីសំណាក់ពួកភេរវជនជីហាត។ លោក ហ្សង់ អ៊ីវ ឡឺ ឌ្រីយ៉ង់ ក៏បានបញ្ជាក់ដែរថា ការរកមធ្យោបាយចាត់ការពួកជីហាតនេះ គឺត្រូវធ្វើយ៉ាងណាឱ្យអាជ្ញាធរអ៊ីរ៉ាក់មានទំនុកចិត្តថា សន្តិសុខនិងសុវត្ថិភាព របស់អ៊ីរ៉ាក់ ត្រូវបានធានា។ ក៏ប៉ុន្តែ មជ្ឈដ្ឋានអ្នកវិភាគនយោបាយអន្តរជាតិនិងអ្នកកាសែតនៅស្រុកបារាំង គឺមើលឃើញដូចគ្នា ថាការណ៍ដែលប្រមុខការបរទេសបារាំង ទៅអ៊ីរ៉ាក់នោះ គឺអាចនឹងលើកឡើងពីលទ្ធភាពនៃការផ្ទេរភេរវជនជីហាត ដែលកំពុងជាប់ឃុំឃាំងក្រោមដៃទាហានគួឌីស្ថាន ឱ្យទៅដាក់ឃុំឃាំង និងកាត់ទោសនៅអ៊ីរ៉ាក់តែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ប្រសាសន៍របស់ រដ្ឋមន្ត្រីការបរទេសបារាំងលោក ហ្សង់ អ៊ីវ ឡឺ ឌ្រីយ៉ង់ ៖
«ស្ថានភាពនៅស៊ីរី គឺកាន់តែធ្ងន់ធ្ងរណាស់! ពីព្រោះថា ការលេចត្រដែតឡើងក្នុងពេលដំណាលគ្នា រវាងការវាយប្រហារទៅលើកម្លាំងគួឌីស្ថាននៅស៊ីរីពីសំណាក់តួកគី រួមជាមួយនិងការដកអាមេរិកចេញពីស៊ីរី គឺបង្កឱ្យទឹកដីនេះ ត្រូវទទួលរងសោកនាកម្ម ដ៏គួរឱ្យសង្វេគជាទីបំផុត។
ហើយនេះ ក៏ការគំរាមកំហែងមកដល់សន្តិសុខរបស់យើង គឺអឺរ៉ុបនិងបារាំងយើងផងដែរ។ ពីព្រោះថា ការវាយប្រហាររបស់តួកគី ហាក់ដូចជាមិនបញ្ជាក់គោលបំណងច្បាស់លាស់នោះទេ! ហើយគេ (អាមេរិក) ក៏បានច្រាលចោលការគាំទ្រទៅដល់កងកម្លាំងគួឌីស្ថាន ព្រឹត្តិការណ៍ទាំងអស់នេះ គឺហាក់ដូចជាការបើកច្រកផ្លូវឱ្យពួកជីហាតរួបរួមគ្នាប្រមូលកម្លាំងឡើងវិញដូច្នេះដែរ។
គេគ្រប់គ្នាទំនងជាបានគិតថា ពួកឧទ្ទាមភេរវជនជីហាត ទទួលបរាជ័យបាត់ហើយ។ ទេ! ទេ ការពិត គឺវាមិនអ៊ីចឹងឡើយ! តាមពិត ពួកគេជីហាត កំពុងសម្ងំយកកម្លាំងតែប៉ុណ្ណោះ ហើយពួកគេត្រៀមខ្លួនជាស្រេច ដើម្បីងើបក្រោកឈរកាន់អាវុធជាថ្មី ប្រសិនបើសភាពការណ៍អំណោយផល។ នៅពេលនេះ ឱកាសល្អសម្រាប់ពួក គេមកដល់ហើយ! នោះគឺការណ៍ដែលទាហានតួកគីវាយប្រហារទៅលើកម្លាំងគួឌីស្ថាននៅស៊ីរី ហើយនិងការដកទ័ពអាមេរិកចេញពីស៊ីរីនេះឯង។ ដូច្នះហើយ បានជាខ្ញុំយល់ថា សុវត្ថិភាពនិងសន្តិសុខរបស់ពួកយើងត្រូវរងការគំរាមកំហែង ហើយស្ថានភាពក្នុងតំបន់នេះ គឺដុនដាបខ្លាំង កាន់តែគួរឱ្យបារម្ភខ្លាំងណាស់។»
នាពេលកន្លងទៅ ប្រទេសអឺរ៉ុប ចំនួន៦ គឺបារាំង អាល្លឺម៉ង់ ប៊ែលស្ស៊ីក ហូឡង់ ដាណាម៉ាក់ និងស៊ុយអ៊ែត បានជជែកពិភាក្សាគ្នាជាយូរមកហើយ ពីលទ្ធភាពនៃការបង្កើតនីតិវិធីកាត់ទោសពួកភេរវជនជីហាត នៅក្នុងទឹកដីអ៊ីរ៉ាក់។ វិធានការនេះ គឺដោយសារតែប្រទេសអឺរ៉ុបទាំងនោះ មិនចង់ទទួលពួកជីហាត ដែលដើមកំណើតឬសញ្ជាតិអឺរ៉ុប ឱ្យមកជាប់ឃុំនៅអឺរ៉ុប ឬនាំពួកគេចូលទឹកដីអឺរ៉ុបនោះទេ។
ភេវរជនជីហាត មានផ្តុំនៅច្រើនកន្លែង ដូចជានៅព្រំដែនតួកគី ស៊ីរី អ៊ីរ៉ាក់ អ៊ីរ៉ង់... ជាដើម។ សិត្ថិសព្វថ្ងៃនេះ មានភេរវជនជីហាត ប្រមាណជា១ម៉ឺន២ពាន់នាក់ ដែលត្រូវចាប់ឃុំឃាំងដោយទាហានគួឌីស្ថាន នៅប្រទេសស៊ីរី។ នៅពេលដែលកងទ័ពតួកឌីបើកការវាយប្រហារលើកងកម្លាំងគួឌីស្ថាននៅស៊ីរី គឺធ្វើឱ្យមជ្ឈដ្ឋានអន្តរជាតិព្រួយបារម្ភជាពន់ពេក គឺព្រួយខ្លាំងខ្លាចក្រែងពួកជីហាតរួចពីទ្រង់ ហើយរួមកម្លាំងគ្នាធ្វើសង្គ្រាមជីហាត និងដើរធ្វើភេរវកម្មនៅគ្រប់ទិសទីជាបន្តទៀត។
នៅថ្ងៃព្រហស្បតិ៍ ទី១៧តុលា សហរដ្ឋអាមេរិករបស់លោក ដូណាល់ ត្រាំ បានបញ្ជូនលោកអនុប្រធានាធិបតី Mike Pence ឱ្យទៅជួបចរចាជាមួយប្រធានាធិបតី Erdogan នៅតួកគី។ កាសែតតួកគី និងខុទ្ទកាល័យប្រធានាធិបតីតួកគីក៏បានបញ្ជាក់ពីជំនួបនៃឥស្សរជនដ៏សំខាន់នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ