ចូលដល់ថ្ងៃចុងក្រោយសភាអាមេរិកនៅតែមិនទាន់ឯកភាពគ្នារឿងថវិកាជាតិ
ថ្ងៃចន្ទ ៣១ធ្នូនេះ គឺជាថ្ងៃចុងក្រោយ ដែលសភាអាមេរិកត្រូវរកកិច្ចព្រមព្រៀង ដើម្បីបញ្ចៀសវិបត្តិថវិកាជាតិ។ ក៏ប៉ុន្តែ នៅសល់តែប៉ុន្មានម៉ោងទៀតត្រូវផុតកំណត់ គណបក្សទាំងពីរ គឺគណបក្សប្រជាធិបតេយ្យ និងគណបក្សសាធារណរដ្ឋ នៅតែមានបញ្ហាខ្វែងគំនិតគ្នាយ៉ាងច្រើននៅឡើយ។ ការចរចា កាលពីថ្ងៃអាទិត្យម្សិលមិញ ត្រូវទទួលបរាជ័យ ហើយមេដឹកនាំគណបក្សទាំងពីរបានព្យាយាមទម្លាក់កំហុសដាក់គ្នាទៅវិញទៅមក អំពីបរាជ័យនេះ។
ចុះផ្សាយនៅថ្ងៃ៖
ស្តាប់ - ០២:៤២
លោកប្រធានាធិបតីអូបាម៉ា ព្រមទាំងមេដឹកនាំគណបក្សប្រជាធិបតេយ្យ និងសាធារណរដ្ឋ នៅក្នុងសភា ត្រូវព្រមព្រៀងគ្នា ហើយអនុម័តច្បាប់ថវិកាជាតិឲ្យបានមុនម៉ោង១២អធ្រាត ថ្ងៃចន្ទនេះ ម៉ោងនៅអាមេរិក (ត្រូវនឹងម៉ោង ១២ថ្ងៃត្រង់ ថ្ងៃអង្គារស្អែក នៅក្នុងប្រទេសកម្ពុជា)។ ប្រសិនបើមិនដូច្នោះទេ ថវិកាជាតិអាមេរិក ឆ្នាំ២០១៣ ដែលមានទាំងការដំឡើងពន្ធ និងការកាត់បន្ថយការចំណាយយ៉ាងច្រើនសន្ធឹកសន្ធាប់ នឹងត្រូវចូលជាធរមានដោយស្វ័យប្រវត្តិ។
សេដ្ឋកិច្ចវិទូជាច្រើនបានព្រមានថា ការដំឡើងពន្ធ និងការកាត់បន្ថយការចំណាយដោយស្វ័យប្រវត្តិ ដែលមានទំហំជាទឹកប្រាក់រហូតដល់ទៅប្រមាណជាង ៥០០ពាន់លានដុល្លារនេះ អាចនឹងធ្វើឲ្យប៉ះពាល់យ៉ាងធ្ងន់ធ្ងរដល់កំណើនសេដ្ឋកិច្ចអាមេរិក។ ភាពចលាចលក៏អាចនឹងកើតមានឡើងផងដែរ នៅក្នុងទីផ្សារមូលបត្រអាមេរិក។ និយាយជារួម ប្រសិនបើថ្នាក់ដឹកនាំអាមេរិកមិនអាចបញ្ចៀសវិបត្តិថវិកា ដែលគេឲ្យឈ្មោះថា "Fiscal Cliff" នេះបានទេ សេដ្ឋកិច្ចអាមេរិកអាចនឹងត្រូវធ្លាក់ក្នុងជ្រោះនៃវិបត្តិ។
ដើម្បីអនុម័តច្បាប់ បញ្ចៀសវិបត្តិថវិកានេះបាន គឺត្រូវឆ្លងកាត់ទីមួយ ព្រឹទ្ធសភា ដែលគណបក្សប្រជាធិបតេយ្យមានសំឡេងភាគច្រើន បន្ទាប់មក ត្រូវបញ្ជូនទៅរដ្ឋសភា ដែលគណបក្សសាធារណរដ្ឋមានសំឡេងភាគច្រើន ហើយចុងក្រោយត្រូវបញ្ជូនទៅឲ្យលោកអូបាម៉ាជាប្រធានាធិបតីជាអ្នកចុះហត្ថលេខាប្រកាសឲ្យប្រើ។ ដូច្នេះ ដំណោះស្រាយវិបត្តិនេះ ទាមទារចាំបាច់ឲ្យមានការឯកភាពគ្នាពីភាគីទាំង៣ គឺលោកអូបាម៉ា សមាជិកសភាមកពីគណបក្សប្រជាធិបតេយ្យ និងសមាជិកសភាមកពីគណបក្សសាធារណរដ្ឋ។
សមាជិកសភាមកពីគណបក្សទាំងពីរគ្រោងនឹងជួបចរចាគ្នាសាជាថ្មី នៅក្នុងថ្ងៃចន្ទនេះ ដែលជាថ្ងៃចុងក្រោយ។ ក៏ប៉ុន្តែ ក្តីសង្ឃឹមថានឹងមានដំណោះស្រាយហាក់ដូចជាកាន់តែថមថយចុះទៅ ដោយសារតែគេឃើញថា ក្រោយពីបរាជ័យ ក្នុងការចរចា កាលពីថ្ងៃអាទិត្យម្សិលមិញ លោកអូបាម៉ា និងមេដឹកនាំគណបក្សសាធារណរដ្ឋ បាននាំគ្នាឆ្លើយទម្លាក់ការទទួលខុសត្រូវដាក់គ្នាទៅវិញទៅមករួចជាស្រេចទៅហើយ។
សូម្បីតែក្នុងចំណោមសមាជិកសភាអាមេរិកខ្លួនឯង មានខ្លះថែមទាំងបានព្យាករទុកជាមុនទៅទៀតថា អាមេរិកទំនងជាចៀសមិនផុតពីវិបត្តិថវិកាជាតិនេះទេ។ បរាជ័យក្នុងការបញ្ចៀសវិបត្តិនេះនឹងបង្ហាញឲ្យឃើញកាន់តែច្បាស់ថែមទៀត អំពីអសមត្ថភាពនៃអ្នកនយោបាយអាមេរិក ក្នុងសម្របសម្រួលគ្នា ដើម្បីដោះស្រាយបញ្ហាជាតិ។ សភាអាមេរិកនីតិកាលទី១១២នេះ ត្រូវបានគេមើលឃើញថា ជាសភាដែលធ្វើការខ្វះប្រសិទ្ធភាពបំផុត មិនធ្លាប់ឃើញមានក្នុងរយៈកាលប៉ុន្មានទសវត្សរ៍ចុងក្រោយនេះ គឺដូចដែលសមាជិកព្រឹទ្ធសភាដ៏ល្បីល្បាញម្នាក់មកពីគណបក្សប្រជាធិបតេយ្យ គឺលោកស្រី Barbara Mikulski បានលើកឡើងថា បញ្ហាជាប់គាំងនៅពេលនេះ បានទាញមុខមាត់សភាអាមេរិកឲ្យធ្លាក់ចុះដល់កម្រិតទាបបំផុត ដែលលោកស្រីមិនធ្លាប់ជួប ក្នុងអាជីពជាសមាជិកសភា ៣៥ឆ្នាំកន្លងទៅនេះ។ លោកស្រីបានបញ្ជាក់ជាចុងក្រោយថា លោកស្រីធ្លាប់បានឆ្លងកាត់ ធ្លាប់ឃើញអាមេរិកត្រូវទទួលរងនូវភាពខ្ទេចខ្ទាំ ដូចជា ព្រឹត្តិការណ៍ភេរវកម្ម ១១កញ្ញា ជាដើម។ ប៉ុន្តែ នោះគឺជាការវាយប្រហារពីសំណាក់សត្រូវពីខាងក្រៅ។ ចំណែកឯវិបត្តិដែលអាមេរិកកំពុងជួបនៅពេលនេះ គឺបង្កឡើងដោយអាមេរិកខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ