អ.ស.បចង់បង្កើតតុលាការអន្តរជាតិជំនុំជម្រះបទឧក្រិដ្ឋប្រព្រឹត្តដោយទាហានមួកខៀវ
នៅក្នុងរបាយការណ៍ចេញផ្សាយកាលពីថ្ងៃចន្ទ ក្រុមការងាររបស់អ.ស.បបានស្នើសុំឲ្យបង្កើតតុលាការពិសេសអន្តរជាតិ ដើម្បីជំនុំជម្រះទាហានមួកខៀវទាំងឡាយណា ដែលប្រព្រឹត្តឧក្រិដ្ឋកម្មធ្ងន់ធ្ងរ នៅក្នុងពេលកំពុងបំពេញបេសកកម្ម ក្នុងនោះក៏រួមមានផងដែរឧក្រិដ្ឋកម្មផ្លូវភេទ ដែលគេតែងតែឃើញមានរឿងអាស្រូវលេចឡើងជារឿយៗ ជាពិសេស នៅក្នុងចំណោមទាហានមួកខៀវដែលកំពុងបំពេញបេសកកម្មនៅក្នុងតំបន់អាហ្វ្រិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
របាយការណ៍ចំនួន ៤០០ទំព័រ ត្រូវបានចេញផ្សាយ ដោយទីភ្នាក់ងារអ.ស.បទទួលបន្ទុកកិច្ចការខាងសមភាពយែនឌ័រនិងស្រ្តី (ហៅកាត់ថា UN Women) នៅក្នុងឱកាសខួប ១៥ឆ្នាំ នៃការអនុម័តសេចក្តីសម្រេចអ.ស.បស្តីពីតួនាទីរបស់ស្រ្តីនៅក្នុងសន្តិភាពនិងសន្តិសុខអន្តរជាតិ (សេចក្តីសម្រេចលេខ១៣២៥)។ របាយការណ៍នេះត្រូវបានរៀបចំធ្វើឡើងដោយក្រុមអ្នកជំនាញឯករាជ្យអន្តរជាតិជាច្រើននាក់ ក្រោមកិច្ចសម្របសម្រួលរបស់លោកស្រី Radhika Coomaraswamy អតីតតំណាងពិសេសអ.ស.បទទួលបន្ទុកកិច្ចការកុមារនិងជម្លោះប្រដាប់អាវុធ។
នៅក្នុងសន្និសីទព័ត៌មានពេលចេញផ្សាយរបាយការណ៍ លោកស្រី Radhika Coomaraswamy បានធ្វើការកត់សម្គាល់ថា នៅក្នុងពេលបច្ចុប្បន្ននេះ ទាហានមួកខៀវគ្រប់រូបស្ថិតក្រោមយុត្តាធិការនៃតុលាការរបស់ប្រទេសកំណើតពួកគេ មានន័យថា នៅពេលណាដែលទាហានមួកខៀវប្រព្រឹត្តបទល្មើស មានតែតុលាការនៅក្នុងប្រទេសរបស់ពួកគេទេដែលមានសមត្ថកិច្ចស៊ើបអង្កេតនិងជំនុំជម្រះពួកគេបាន។ នៅក្នុងការអនុវត្តបែបនេះ គេឃើញមានទាហានមួកខៀវតិចតួចណាស់ដែលត្រូវទទួលការជំនុំជម្រះ ដោយសារតែប្រទេសនីមួយៗមិនសូវចង់ស៊ើបអង្កេតបើកកកាយបទឧក្រិដ្ឋទាហានរបស់ខ្លួន។
ម្យ៉ាងវិញទៀត ការអនុវត្តយុត្តាធិការទៅតាមទីតាំងបទល្មើសក៏មិនមានប្រសិទ្ធភាព ដោយសារថា នៅតាមបណ្តាប្រទេសដែលមានពង្រាយកងកម្លាំងមួកខៀវ ភាគច្រើនជាប្រទេសស្ថិតក្នុង ឬទើបនឹងងើបចេញពីជម្លោះប្រដាប់អាវុធ ហើយមិនទាន់មានប្រព័ន្ធយុត្តិធម៌ត្រឹមត្រូវដែលអាចធានានូវដំណើរការកាត់ទោសដោយយុត្តិធម៌បាននៅឡើយ។
នៅក្នុងហេតុផលនេះហើយបានជាក្រុមការងារដែលសរសេររបាយការណ៍នេះបានដាក់ជាអនុសាសន៍ឲ្យបង្កើតជាតុលាការពិសេសអន្តរជាតិ ដើម្បីទទួលបន្ទុកជំនុំជម្រះទាហានមួកខៀវ ឬបុគ្គលិកអ.ស.បផ្សេងទៀត ដែលប្រព្រឹត្តបទល្មើសនៅក្នុងពេលកំពុងបំពេញបេសកកម្ម ក្រោមអាណត្តិរបស់អ.ស.ប។
ទោះជាយ៉ាងណា នេះគ្រាន់តែជាអនុសាសន៍របស់អ្នកជំនាញឯករាជ្យតែប៉ុណ្ណោះ។ ការបង្កើត ឬមិនបង្កើតតុលាការពិសេសអន្តរជាតិនេះ គឺវាអាស្រ័យទៅលើប្រទេសសមាជិកក្រុមប្រឹក្សាសន្តិសុខ ឬប្រទេសសមាជិកភាគច្រើនរបស់អ.ស.ប ប្រសិនបើជាការបង្កើតក្នុងក្របខ័ណ្ឌអនុសញ្ញាអន្តរជាតិ ដូចករណីតុលាការព្រហ្មទណ្ឌអន្តរជាតិក្រុងឡាអេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ