បិន ឡាដិនស្លាប់៖ តំបន់ដើមបូព៌ាសង្ឃឹមថារូបភាពនៃសាសនាអ៊ីស្លាមអាចកាត់ផ្តាច់ខ្លួនចេញពីភេរវនិយម
ចុះផ្សាយនៅថ្ងៃ៖
ស្តាប់ - ០៤:៤៣
ក្រោយពីមរណភាពរបស់មេដឹកនាំចលនាភេរវនិយមអាល់កៃដា បិន ឡាដិន រដ្ឋាភិបាលនិងប្រជាជននៃតំបន់ដើមបូព៌ាបានសម្ដែងបង្ហាញឲ្យឃើញនូវការធូរចិត្តរបស់ពួកគេ។ ហើយគេសង្ឃឹមថា រូបភាពនៃសាសនាអ៊ីស្លាមអាចកាត់ផ្តាច់ខ្លួនចេញពីភេរវនិយម។
ការប្រកាសឲ្យដឹងដោយសហរដ្ឋអាមេរិកស្ដីពីការបាញ់សម្លាប់មេដឹកនាំចលនាភេរវនិយមអាល់កៃដា បិន ឡាដិនបានបង្កឲ្យមានប្រតិកម្មប្លែកៗគ្នា។ អ្នកខ្លះមានការសោកស្ដាយ អ្នកខ្លះទៀតបានសម្ដែងឲ្យឃើញនូវការធូរចិត្តរបស់ពួកគេ។ ដោយហេតុថា ប្រទេសរបស់ពួកគេក៏បានទទួលរងអំពើហិង្សាពីចលនាភេរវនិយមអាល់កៃដារបស់ បិន ឡាដិនផងដែរ ហើយពួកគេសង្ឃឹមថា អន្តរាគមន៍យោធារបស់ប្រទេសលោកខាងលិចនឹងត្រូវបិទបញ្ចប់នៅពេលខាងមុខ។ ប្រជាជនភាគច្រើននៃតំបន់ដើមបូព៌ាក៏សង្ឃឹមផងទៀតថា រូបភាពនៃសាសនាអ៊ីស្លាមអាចកាត់ផ្តាច់ខ្លួនចេញពីរូបភាពភេរវនិយមរបស់អាល់កៃដា។
ប្រទេសអារ៉ាប៊ីសាអ៊ូឌីតដែលជាប្រទេសដើមកំណើតរបស់មេដឹកនាំចលនាភេរវនិយមអាល់កៃដា អ៊ូសាម៉ា បិន ឡាដិន បានសម្ដែងតាមរយៈសេចក្តីថ្លែងការណ៍ថា “ប្រជាជននៃប្រទេសអារ៉ាប៊ីសាអ៊ូឌីតបានទទួលរងគ្រោះដោយឧក្រិដ្ឋកម្មរបស់ចលនាភេរវនិយមអាល់កៃដាយ៉ាងសែនឈឺចាប់ ហើយប្រទេសអារ៉ាប៊ីសាអ៊ូឌីតសង្ឃឹមថា មរណភាពរបស់បិន ឡាដិននឹងអនុញ្ញាតឲ្យការខិតខំរបស់អន្តរជាតិក្នុងការប្រយុទ្ធប្រឆាំងទល់នឹងអំពើភេរវកម្មសម្រេចបានជោគជ័យ ហើយមនោគមវិជ្ជាដ៏ហិង្សារបស់បិន ឡាដិនក៏វិនាសហិនហោចតាមនោះដែរ”។
ប្រទេសយេម៉ែនដែលតាំងពីឆ្នាំ២០០៩បានក្លាយទៅជាមូលដ្ឋានរបស់ពួកអាល់កៃដាដែលដកខ្លួនចេញពីប្រទេសអារ៉ាប៊ីសាអ៊ូឌីត រដ្ឋអំណាចបានថ្លែងនិងសង្ឃឹមថា “មរណភាពរបស់បិន ឡាដិនអាចជាជំហានឈានទៅរកអវសានភាពនៃទង្វើភេរវនិយម”។
ចំណែកឯប្រទេសអេហ្ស៊ីបដែលជាដែនដីដំបូងគេបង្អស់នៅចុងទសវត្សរ៍ឆ្នាំ១៩៧០ក្នុងការជួយបណ្តុះបណ្តាលយុទ្ធជនអាល់កៃដាដែលក្នុងនោះមានរូបលោកAyman Al-Zawahiriដែលបច្ចុប្បន្ននេះជាមេដឹកនាំទីពីររបស់ចលនាភេរវនិយមអាល់កៃដា ចលនាភាតរបុត្រអ៊ីស្លាមLes Frères Musulmans នៅអេហ្ស៊ីបបានថ្កោលទោសអំពើហិង្សានិងឧក្រិដ្ឋកម្មរបស់ពួកអាល់កៃដា ហើយចលនាភាតរបុត្រអ៊ីស្លាមLes Frères Musulmansបានប្រកាសអំពាវនាវឲ្យរដ្ឋាភិបាលនៃប្រទេសលោកខាងលិចឈប់ចងភ្ជាប់រូបភាពរបស់សាសនាអ៊ីស្លាមទៅនឹងក្រុមភេរវនិយមអាល់កៃដាទៀត។ Les Frères Musulmansបានថ្លែងបញ្ជាក់ទៀតថា “ការប្រយុទ្ធប្រឆាំងនឹងវត្តមាននៃយោធាបរទេសគឺជាសិទ្ធិមួយដ៏ស្របច្បាប់”។
ហើយចលនាភាតរបុត្រអ៊ីស្លាមLes Frères Musulmansបានអំពាវនាវឲ្យសហរដ្ឋអាមេរិក សហភាពអឺរ៉ុប និងបក្សសម្ព័ន្ធអូតង់បិទបញ្ចប់វត្តមានរបស់ខ្លួននៅប្រទេសអៀរ៉ាក់និងនៅប្រទេសអាហ្វហ្កានិស្តង់ ហើយឲ្យទទួលស្គាល់សិទ្ធិដ៏ស្របច្បាប់របស់ប្រជាជនប៉ាលេស្ទីន។
នៅឯដែនដីប៉ាលេស្ទីនឯណោះ អ្នកនាំពាក្យនៃរដ្ឋអំណាចប៉ាលេស្ទីនបានថ្លែងឲ្យដឹងថា “មរណភាពរបស់បិន ឡាដិនគឺជាការមួយដ៏ល្អប្រពៃសម្រាប់សន្តិភាពពិភពលោក”។ ទាំងនេះខុសផ្ទុយពីប្រតិកម្មរបស់នាយករដ្ឋមន្ត្រីប៉ាលេស្ទីនហាម៉ាស លោក ហានីយេហ៍នៅតំបន់ហ្កាហ្សាដែលបានថ្កោលទោសសហរដ្ឋអាមេរិកថាបានធ្វើឃាតទៅលើបិន ឡាដិនដែលជាយុទ្ធជនបម្រើសាសនាអ៊ីស្លាម។
រីឯសាធារណរដ្ឋអ៊ីស្លាមអៀរ៉ង់ដែលមានប្រជាជនភាគច្រើនជាអ្នកកាន់សាសនាអ៊ីស្លាមនិកាយChiites ដែលបានត្រូវមេដឹកនាំអាល់កៃដានៅអៀរ៉ាក់ឈ្មោះAbou Moussab Al-Zarkaoui ចាត់ទុកជាផ្ទាំងស៊ីប្លឹ៍ដ៏សំខាន់ បានបញ្ចេញប្រតិកម្មរបស់ខ្លួនតាមរយៈអ្នកនាំពាក្យនៃក្រសួងការបរទេសថា “មរណភាពរបស់បិន ឡាដិនពិតជាកត្តាដ៏វិជ្ជមានសម្រាប់ជួយឲ្យមានស្ថិរភាពនិងសន្តិភាពពិភពលោក ហើយទាំងសហរដ្ឋអាមេរិក ទាំងប្រទេសសម្ព័ន្ធមិត្តរបស់ខ្លួនគ្មានសិទ្ធិអ្វីទៀតនឹងបន្តមានវត្តមានរបស់ខ្លួននៅតំបន់ដើមបូព៌ាទៀតឡើយ"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ