ការទម្លាក់សពបិន ឡាដិនចោលទៅក្នុងសមុទ្រក្លាយជាសង្គ្រាមប៉ាកកា
តាំងពីថ្ងៃចន្ទទី២ឧសភាម្សិលមិញមក សំណួរជាច្រើនកំពុងចោទឡើងជុំវិញសពរបស់ បិន ឡាដិន ដែលត្រូវបានកងទ័ពអាមេរិកទម្លាក់ទៅក្នុងទឹកសមុទ្រ។ ហេតុអ្វីបានជាអាមេរិកសម្រេចធ្វើដូច្នេះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២១
ប៉ុន្មានម៉ោងប៉ុណ្ណោះក្រោយពីសម្លាប់បិន ឡាដិនហើយ កងទ័ពអាមេរិកបានរៀបចំធ្វើពិធីឈាបនកិច្ច នៅលើនាវាផ្ទុកយន្តហោះCarl-Vinson រួចហើយបានទម្លាក់សពទៅក្នុងទឹកសមុទ្រ។
ទីក្រុងវ៉ាស៊ីនតោនបានប្រាប់ឲ្យដឹងថា ពិធីបុណ្យសពបានប្រព្រឹត្តទៅជិតមួយម៉ោងនៅលើនាវា ដោយគោរពតាមប្រពៃណីនៃសាសនាអ៊ីស្លាម។ យ៉ាងណាក៏ដោយ ចំពោះប្រមុខនៃAl-Azhar ដែលជាឧត្តមស្ថាប័នសាសនាអ៊ីស្លាមនិកាយSunniteនៅទីក្រុងគែរប្រទេសអេហ្ស៊ីប អ៊ីស្លាមប្រឆាំងមិនឲ្យទម្លាក់សពចោលក្នុងសមុទ្រទេ តែតម្រូវឲ្យយកខ្មោចទៅកប់។
ដូចគ្នាអ៊ីចឹងដែរ តំណាងនៃវិហារសាសនាអ៊ីស្លាមនៅប៉ារីសប្រទេសបារាំង ក៏បានគូសបញ្ជាក់ថា ការទម្លាក់សពបិន ឡាដិនទៅក្នុងសមុទ្រគឺជាទង្វើដែលផ្ទុយពីប្រពៃណីសាសនាអ៊ីស្លាម។
ផ្ទុយទៅវិញ ចំពោះសហគមន៍អ្នកកាន់សាសនាអ៊ីស្លាមនៅសហរដ្ឋអាមេរិក សង្គ្រាមប៉ាកកាជុំវិញសពរបស់ប្រមុខដឹកនាំ Al-Qaïda ជារឿងកំប៉ិកកំប៉ុកឥតបានការ ហើយអ្វីដែលសំខាន់គឺ បិន ឡាដិនបានស្លាប់ យុត្តិធម៌ត្រូវបានផ្តល់ទៅឲ្យអ្នករងគ្រោះរាប់ពាន់នាក់នៅអាមេរិកនិងនៅគ្រប់ទីកន្លែងក្នុងពិភពលោក។
តាមមើលទៅ អាជ្ញាធរអាមេរិកប្រហែលជាចង់បំបាត់ចោលឲ្យបានលឿននិងជាស្ថាពរនូវសាកសពរបស់បិន ឡាដិន។ ការយកខ្មោចទៅកប់នៅទីកន្លែងណាមួយ នឹងអាចបង្កឲ្យមានផលវិបាកអាក្រក់តទៅថ្ងៃមុខ ពីព្រោះបើធ្វើបែបនេះ ផ្នូររបស់បិន ឡាដិននឹងអាចក្លាយជាទីសក្ការៈសម្រាប់ពួកអ៊ីស្លាមជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ