Jemaah Islamiyah សាខារបស់Al-Qaïda នៅអាស៊ីអាគ្នេយ៍
នៅអាស៊ីអាគ្នេយ៍ ចលនាភេរវកម្មដែលគេសង្ស័យថាមានទំនាក់ទំនងស្និទ្ធជាងគេជាមួយ អង្គការAl-Qaïdaរបស់បិន ឡាដិន ឈ្មោះJemaah Islamiyah។ Jemaah Islamiyah បានបង្កភេរវកម្មខ្លាំងនៅក្នុងភូមិភាគ ជាពិសេសនៅប្រទេសឥណ្ឌូណេស៊ី ចាប់ពីឆ្នាំ២០០២មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
មានចំណុចរួមគ្នានិងដូចគ្នាមួយ រវាងភេរវកម្មនានាដែលបានកើតឡើងនៅប្រទេសឥណ្ឌូណេស៊ី ក្នុងអំឡុងពេលជិត១០ឆ្នាំចុងក្រោយនេះ ជាពិសេសភេរវកម្មនៅបាលីខែតុលាឆ្នាំ២០០២ដែលបានបណ្តាលឲ្យមានស្លាប់២០២នាក់ នោះគឺវាសុទ្ធសឹងជាស្នាដៃរបស់Jemaah Islamiyah។
Jemaah Islamiyah ត្រូវបានបង្កើតឡើងដោយ Abdullah Sungkar និងAbou Bakar Bachir នៅឆ្នាំ១៩៩៣ និងផ្តើមបង្កសកម្មភាពភេរវកម្មខ្លាំងនៅលើកោះMoluques ជាទីដែលពីឆ្នាំ១៩៩៩ដល់ឆ្នាំ២០០២ សហគមន៍អ៊ីស្លាមនិងសហគមន៍អ្នកកាន់គ្រិស្តសាសនាបានកាប់សម្លាប់គ្នាយ៉ាងសាហាវព្រៃផ្សៃជាទីបំផុត។
មហាភេរវកម្មថ្ងៃ១១កញ្ញាឆ្នាំ២០០១នៅសហរដ្ឋអាមេរិក គឺជាព្រឹត្តិការណ៍មួយសំខាន់ដែលបានធ្វើឲ្យចលនាអ៊ីស្លាមជ្រុលនិយមJemaah Islamiyah នៅឥណ្ឌូណេស៊ីរីកធំនិងមានឥទ្ធិពលខ្លាំងក្លាឡើង។ ពីព្រោះចំពោះពួកសកម្មជនអ៊ីស្លាមជ្រុលនិយមទាំងនេះ មហាភេរវកម្មនៅអាមេរិកថ្ងៃ១១កញ្ញាឆ្នាំ២០០១គឺជាការផ្តើមឡើងនៃសង្គ្រាមរវាងអារ្យធម៌អ៊ីស្លាមនិងអារ្យធម៌នៃគ្រិស្តសាសនា។ អ៊ីចឹងហើយបានជាប៉ុន្មានថ្ងៃក្រោយព្រឹត្តិការណ៍ថ្ងៃទី១១កញ្ញាឆ្នាំ២០០១ Jemaah Islamiyah បានអំពាវនាវឲ្យអ្នកកាន់សាសនាអ៊ីស្លាមទាំងអស់ក្នុងលោកពួតដៃគ្នាក្នុងនាមព្រះAllahដើម្បីធ្វើសង្គ្រាមប្រឆាំងនឹងសហរដ្ឋអាមេរិកនិងសម្ព័ន្ធមិត្ររបស់អាមេរិក។ គឺនៅក្នុងបរិបទនេះហើយ ដែលជាងមួយឆ្នាំក្រោយមក ប្រទេសឥណ្ឌូណេស៊ីបានក្លាយជាផ្ទាំងស៊ីបនៃពួកភេរវជន។ ឧទាហរណ៍ជាក់ស្តែងគឺភេរវកម្មនៅបាលី ខែតុលាឆ្នាំ២០០២ ភេរវកម្មមួយទៀតនៅបាលីដែរ ក្នុងខែតុលាឆ្នាំ២០០៥ ភេរវកម្មទៅលើសណ្ឋាគារMarriot នៅហ្សាការតាខែសីហាឆ្នាំ២០០៣ ភេរវកម្មទៅលើស្ថានទូតអូស្ត្រាលី ប្រចាំនៅឥណ្ឌូណេស៊ីខែកញ្ញាឆ្នាំ២០០៤ និងភេរវកម្មពីរផ្សេងទៀតទៅលើសណ្ឋាគារល្អៗ នៅហ្សាការតាដែរ ក្នុងខែកក្កដាឆ្នាំ២០០៩។
Jemaah Islamiyah មានមហិច្ឆតាបង្កើតរដ្ឋអ៊ីស្លាមដ៏ធំមួយដែលគ្របយកឥណ្ឌូណេស៊ី ម៉ាឡេស៊ី សិង្ហបូរី និងតំបន់អ៊ីស្លាមនៃប្រទេសហ្វីលីពីននិងប្រទេសថៃ។ ម៉្លោះហើយបានជាគេនាំគ្នានិយាយថាភេរវកម្មឥតឈប់ឈរ នៅខាងត្បូងប្រទេសថៃសព្វថ្ងៃអាចជាស្នាដៃរបស់ពួកJemaah Islamiyah។
ប៉ុន្មានឆ្នាំចុងក្រោយនេះ សហរដ្ឋអាមេរិកនិងអូស្រ្តាលីបាននិងកំពុងបន្តធ្វើសហប្រតិបត្តិការ ជាមួយឥណ្ឌូណេស៊ី ដើម្បីកំទេចJemaah Islamiyah។ មេកើយធំៗ ដូចជាAbou Bakar Bachir ឬក៏Hambali ត្រូវបានចាប់ខ្លួន ភេរវជនជាច្រើននាក់ត្រូវបានសម្លាប់ និងរចនាសម្ព័ន្ធមួយចំនួនត្រូវបានកំទេច ជាហេតុធ្វើឲ្យអង្គការនេះថមថយកម្លាំងមិនតិចទេ។ យ៉ាងណាមិញ មរណភាពរបស់បិន ឡាដិន មិនមែនបានន័យថាជាអវសានរបស់Jemaah Islamiyahទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ