សន្ទរកថាចុងក្រោយរបស់លោកស្រី Hillary Clinton អតីតប្រមុខការទូតអាមេរិក
លោកស្រី Hillary Clinton ដែលជាអតីតប្រមុខការទូតអាមេរិក នឹងចាកចេញពីរដ្ឋាភិបាល នៅថ្ងៃសុក្រទី ០១ កុម្ភៈ នេះហើយ។ លោក Jonh Kherry នឹងឡើងមកបន្តតំណែងជាប្រមុខការទូត បន្តពីលោកស្រី។ មុននឹងចាកចេញពីឆាកនយោបាយអាមេរិក Hillary Clinton បានធ្វើសេចក្តីថ្លែងសន្ទរកថាចុងក្រោយមួយ កាលពីថ្ងៃព្រហស្បតិ៍ ម្សិលមិញនេះ នៅទីក្រុង Washington។ សន្ទរកថារបស់លោកស្រី មានលក្ខណៈរំជើបរំជួលបែបមនោសញ្ចេតនា លាយឡំទៅដោយនយោបាយ។
ចុះផ្សាយនៅថ្ងៃ៖
ស្តាប់ - ០១:៣៩
កាលពីថ្ងៃព្រហស្បតិ៍ ម្សិលមិញនេះ លោកស្រី Hillary Clinton បង្ហាញនូវភាពស្រងូតស្រងាត់បន្តិចបន្តួចដែរ ក្នុងសន្ទរកថារបស់លោកស្រី មុននឹងលាចាកពីឆាកនយោបាយអាមេរិក។ ទោះយ៉ាងនេះក្តី អតីតប្រមុខការទូតអាមេរិករូបនេះ មានមោទនភាពក្នុងលទ្ធផលនៃការដឹកនាំរបស់ខ្លួន ក្នុងវិស័យនយោបាយការបរទេសរបស់អាមេរិក រយៈពេលបួនឆ្នាំកន្លងមក ហើយបានប្រគល់តុល្យការនៃកិច្ចការរបស់ខ្លួន អោយក្រសួងការបរទេសអាមេរិក។
ក្នុងសន្ទរកថា កាលពីម្សិលមិញនេះ លោកស្រីមានប្រសាសន៍ថា៖ “ក្នុងអណត្តិប្រធានាធិបតីរបស់លោក បារ៉ាក់ អូបាម៉ា យើងបានបញ្ចប់សង្គ្រាមនៅអ៊ីរ៉ាក់ យើងផ្តើមធ្វើការងារនៅអាហ្វហ្កានីស្ថាន និងបានស្វែងរកយុត្តិធម៌ តាមរយៈការប្រយុទ្ធប្រឆាំង អ៊ូសាម៉ា បេន ឡាដេន”។ ចំនុចចុងក្រោយក្នុងប្រសាសន៍របស់លោកស្រី ទាក់ទងនឹងយុត្តិធម៌តាមរយៈការកំចាត់ បេន ឡាដេន នៅតែជាប្រធានបទពិភាក្សាសំខាន់ ក្នុងផ្នែកច្បាប់នៅឡើយ ហើយបានបង្ហាញថា សន្ទរកថារបស់លោកស្រី មានលក្ខណៈជាបែបផែននយោបាយដ៏ជ្រាលជ្រៅ។
អតីតស្ត្រីទីមួយនៃសហរដ្ឋអាមេរិក បានអួតសរសើរអំពីសក្តានុពលនៃវិស័យយោធាអាមេរិក នៅលើពិភពលោក ហើយបានបង្ហាញនូវគោលជំហររបស់ខ្លួន ចង់អោយយោធាអាមេរិក នៅតែបន្តអានុភាពនេះតទៅទៀត។
“អំណាចការទូតរបស់យើងមានប្រសិទ្ធិភាពខ្ពស់ ព្រោះថាសហរដ្ឋអាមេរិកអាចធ្វើសកម្មភាពរបស់ខ្លួន ដើម្បីគាំទ្រដល់អ្វីដែលខ្លួនបាននិយាយ។ យើងនឹងបន្តការប្រយុទ្ធជាប់ជានិច្ចប្រឆាំងនឹងក្រុម អាល់ កៃដា ហើយយើងនឹងធ្វើគ្រប់សកម្មភាពចាំបាច់ ដើម្បីមិនអោយអ៊ីរ៉ង់សំរេចបាននូវនុយក្លេអ៊ែរ”, នេះជាប្រសាសន៍បន្ថែមរបស់លោកស្រី Clinton។
មានគេប្រដូចសន្ទរកថាចុងក្រោយរបស់លោកស្រី Clinton នេះថាដូចជាសន្ទរកនយោបាយ បែបប្រធានាធិបតី។ ប៉ុន្តែលោកស្រី Clinton ធ្លាប់បានប្រាប់ជាផ្លូវការថានឹងមិនត្រលប់ មកកាន់ឆាកនយោបាយទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ