លោក David Petraeus លាលែងពីតំណែងនាយក CIA ដោយសាររឿងស្រីញី
លោក David Petraeus នាយកទីភ្នាក់ងារស៊ើបការណ៍សម្ងាត់អាមេរិក (CIA) បានសុំលាលែងពីតំណែង កាលពីថ្ងៃសុក្រម្សិលមិញ ដោយសារភាពទទួលស្គាល់ថា លោកមានទំនាក់ទំនងស្នេហាក្រៅចំណងអាពាហ៍ពិពាហ៍។ បើយោងតាមកាសែត The New York Times រឿងអាស្រូវស្រីញីរបស់លោក Petraeus នេះ ត្រូវបានបើកកកាយ ក្រោយពីមានការស៊ើបអង្កេតរបស់ FBI។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
លោក David Petraeus មានវ័យ ៦០ឆ្នាំ គឺជាអតីតឧត្តមសេនីយ៍ផ្កាយបួន ដ៏មានឈ្មោះល្បីមួយរូបរបស់អាមេរិក។ លោកទើបនឹងបានកាន់តំណែងជានាយក CIA បាន ១៤ខែប៉ុណ្ណោះ។ មុននឹងត្រូវលោកអូបាម៉ាតែងតាំងជានាយក CIA ឧត្តមសេនីយ៍ Petraeus ធ្លាប់ជាមេបញ្ជាការកងទ័ពអាមេរិកប្រចាំប្រទេសអ៊ីរ៉ាក់ អាហ្វហ្កានីស្ថាន និងតំបន់មជ្ឈិមបូព៌ា។
នៅក្នុងលិខិតលាលែង ដែលដាក់ជូនលោកអូបាម៉ា លោក Petraeus បានលើកហេតុផលពីរឿងអាស្រូវជុំវិញទំនាក់ទំនងស្រីញី ក្រៅអាពាហ៍ពិពាហ៍ ប៉ុន្តែ គេនៅតែមិនទាន់ដឹងច្បាស់ថា តើរឿងនេះមានទំហំប៉ុណ្ណា ទើបជំរុញឲ្យលោក Petraeus លាលែងចេញពីតំណែងបែបនេះ? តើវាគ្រាន់តែជារឿងផ្ទាល់ខ្លួនរបស់លោក Petraeus ឬក៏វាមានប៉ះពាល់ទៅដល់កិច្ចការណ៍សម្ងាត់របស់ CIA?
បើតាមការចុះផ្សាយរបស់កាសែត The New York Times ទីភ្នាក់ងារ FBI បានបើកការស៊ើបអង្កេតមួយ កាលពីប៉ុន្មានខែមុន ដោយសង្ស័យក្រែងមានអ្នកលួចព័ត៌មានពីកុំព្យូទ័ររបស់លោក Petraeus។ នៅក្នុងការស៊ើបអង្កេតនេះ FBI ក៏បានរកឃើញពីទំនាក់ទំនងមិនគួរគប្បីរបស់លោកនាយក CIA ជាមួយនឹងនារីម្នាក់ ដែលជាមន្រ្តីយោធាអាមេរិក ហើយជាអ្នកសរសេរសៀវភៅ ស្តីពីប្រវត្តិរូបរបស់លោក Petraeus។
កាសែត The New York Times ក៏បានសរសេរផងដែរថា នៅពេលបានទទួលពាក្យសុំលាលែង និងបានជួបជែកជាមួយ លោក Petraeus កាលពីល្ងាចថ្ងៃព្រហស្បតិ៍ លោកអូបាម៉ាមិនបានទទួលយកការសុំលាលែងនេះភ្លាមៗទេ ដោយសុំពេលគិតមួយយប់។ រហូតដល់រសៀលថ្ងៃសុក្រ (ត្រូវនឹងព្រឹកថ្ងៃសៅរ៍ នៅកម្ពុជា) ទើបលោកអូបាម៉ា ទទួលយកការសុំលាលែងរបស់លោក Petraeus ហើយបានចេញសេចក្តីថ្លែងការណ៍មួយ លើកសរសើរពីស្នាដៃរបស់លោក Petraeus ទាំងការងារនៅ CIA និងការដឹកនាំកងទ័ពអាមេរិក នៅអ៊ីរ៉ាក់ និងអាហ្វហ្កានីស្ថាន។
លោកអូបាម៉ាក៏បានបញ្ជាក់ផងដែរ អំពីទំនុកចិត្តរបស់លោក ទៅលើនាយករង CIA គឺ លោក Michael Morell ក្នុងការគ្រប់គ្រង CIA ជាបណ្តោះអាសន្ន ទម្រាំដល់ពេលមានការតែងតាំងនាយកថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ