បុណ្យសមុទ្រលើកទី៦ត្រឡប់មករៀបចំឡើងវិញនៅខេត្តកែប
ក្រសួងទេសចរណ៍ នឹងរៀបចំពិធីបុណ្យសមុទ្រលើទី៦ នៅខេត្តកែបនាចុងខែធ្នូ ដែលនេះគឺជាដំណើរវិលជុំទី២ បន្ទាប់ពីខេត្តកែបទទួលរៀបចំបុណ្យសមុទ្រម្ដងរួចមកហើយ។ អ្នករៀបចំកម្មវិធីបានអះអាងថា ពិធីបុណ្យសមុទ្រនៅឆ្នាំនេះ មានលក្ខណៈពិសេសជាងបណ្ដាឆ្នាំមុនៗដោយមានការ ប្រណាំងទូកក្ដោង និងមានសិល្បៈនៃការបាញ់ទឹករួមបញ្ចូលជាមួយបទភ្លេង។
ចុះផ្សាយនៅថ្ងៃ៖
ស្តាប់ - ០២:០៧
ការប្រណាំងទូកក្ដោង នឹងមានការចូលរួមប្រឡងប្រណាំងរវាងកីឡាករកម្ពុជាជាមួយកីឡាករ ឬកីឡាការិនីមកពីប្រទេសវៀតណាម និងថៃ។ កីឡាប្រភេទនេះ ក៏ធ្លាប់ដាក់តាំងបង្ហាញម្ដងរួចហើយដែរ នៅក្នុងអំឡុងពេលបុណ្យសមុទ្រនៅខេត្តព្រះសីហនុកាលពីឆ្នាំទៅមិញ តែមិនមានការអុំប្រឡងប្រណាំងដូចដែរគេគ្រោងធ្វើនៅឆ្នាំនេះទេ។
ត្បិតតែកីឡាប្រភេទនេះ ត្រូវបានបន្ថែមនៅក្នុងពិធីបុណ្យសមុទ្រនេះក៏ដោយ តែប្រភេទកីឡារបស់កម្ពុជានៅតែរក្សាទុកដដែលដោយក្នុងនោះរួមមានៈ ការប្រកួតប្រដាល់ក្បាច់គុណបុរាណខ្មែរ ការបង្ហាញក្បាចគុណល្បុក្កតោ ការប្រកួតបាល់ទះឆ្នេរខ្សាច់ ការប្រឆាំងទូក និងការរត់ប្រណាំងជាដើម។
ដោយឡែកចំពោះ ការបង្ហាញសិល្បៈនៃការបាញ់ទឹករួមបញ្ចូលជាមួយបទភ្លេងវិញគឺជាសិល្បៈមួយប្លែកមិនធ្លាប់ពីមុនមកទេ។ សិល្បៈនេះគឺមានកិច្ចសហការពីក្រុមជំនាញបច្ចេកទេមកពីប្រទេសចិនជួយរៀបចំ។ ថ្លែងប្រាប់វិទ្យុបារាំង លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាចាត់ទុកពិធីបុណ្យសមុទ្រនៅឆ្នាំនេះមានលក្ខណៈប្លែកជាងបណ្ដាលឆ្នាំមុនៗ។
ទន្ទឹមនឹងនេះចំពោះទីកន្លែងស្នាក់នៅ តម្លៃម្ហូបអាហារ ដែលត្រូវដោះស្រាយនៅក្នុងពិធីបុណ្យសមុទ្រនៅឆ្នាំនេះគឺអនុវត្តតាមរូបមន្តដដែល ។ នោះគឺការបិទតម្លៃមុខម្ហូបនៅកន្លែងលក់ផ្ទាល់តែម្ដង។
ចំណែកទីកន្លែងស្នាក់នៅលោក វ៉ាត់ ចំរើន លើកទឹកចិត្តឲ្យអ្នកចូលរួម ជួលផ្ទះប្រជាពលរដ្ឋស្នាក់នៅបណ្ដោះអាសន្ន ជំនួសឲ្យការខ្វះខាតបន្ទប់សណ្ឋាគារ ឬផ្ទះសំណាក់។ ទាក់ទងបញ្ហាសំរាម ក្រសួងទេសចរណ៍នឹងបំផុសទៅអាជីករឲ្យមានទម្លាប់វេចខ្ចប់ត្រឹមត្រូវ និងលើកទឹកចិត្តឲ្យពួកគាត់ជួយណែនាំទៅពលរដ្ឋជួយរក្សាអនាម័យ។ បន្ថែមពីលើនេះទៀតនៅមានបណ្ដាលក្រុមយុវជនស្ម័គ្រចូលរួមដោះស្រាយបញ្ហាសំរាមនេះដែរ។ នេះបើតាមលោក វ៉ាត់ ចំរើន។
សូមបញ្ជាក់ថា ពិធីបុណ្យសមុទ្ររៀបចំឡើងនៅខេត្តជុំវិញសមុទ្ររួមមាន៖ កំពត ព្រះសីហនុ កែប និងកោះកុង ក្នុងគោលបំណងការពារ និងអភិរក្សតំបន់ឆ្នេរសមុទ្របន្ទាប់ពីឆ្នេរសមុទ្រកម្ពុជាជាប់ចំណាត់ថ្នាក់ជាឆ្នេរស្អាតបំផុតក្នុងពិភពលោក។ ម្យ៉ាងទៀតដើម្បីបង្វែគោលដៅភ្ញៀវទេសចរ ឲ្យងាកមកចាប់អារម្មណ៍តំបន់ឆ្នេរកម្ពុជាក្រៅពីរមណីយដ្ឋានអង្គរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ