អាមេរិកមានប៉ូលិសបាញ់ស្បែកខ្មៅមួយករណីទៀត
នៅរដ្ឋមីស៊ូរី របស់សហរដ្ឋអាមេរិក មានយុវជនស្បែកខ្មៅម្នាក់ទៀតហើយត្រូវបានប៉ូលិសបាញ់សម្លាប់។ ព្រឹត្តិការណ៍កើតឡើង នៅយប់ថ្ងៃអង្គារ ចូលដល់ថ្ងៃពុធ នៅពេលនោះ ប៉ូលិសបានបាញ់ទៅលើយុវជនម្នាក់ ដែលប៉ូលិសអះអាងថា បានលើកកាំភ្លើងសំដៅប៉ូលិសល្បាត នៅ ទីក្រុងនៅBerkeley។ រឿងរ៉ាវ ប៉ូលិសបាញ់សម្លាប់ប្រជាជនស្បែកខ្មៅកំពុងបង្កឲ្យមានការខឹងសម្បារ និងបាតុកម្មតវ៉ា ជាច្រើន នៅសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៣២
យោងតាមសេចក្តីប្រកាសព័ត៌មានរបស់ប៉ូលិសក្រុងSaint Louis ក្នុងរដ្ឋមីស៊ូរី នៅក្នុងប្រតិបត្តិការត្រួតពិនិត្យជាប្រចាំ នៅតាមស្ថានីយ៍ចាក់សាំង ប៉ូលិសល្បាតម្នាក់បានដើរចេញពីរថយន្ត បន្ទាប់ពីបានសង្កេតឥរិយាបថរបស់យុវជនពីរនាក់។ ប៉ុន្តែ នៅពេលដើរសំដៅទៅរក ប៉ូលិសបានបាញ់ភ្លាមទៅលើយុវជនម្នាក់ ដែលប៉ូលិសឃើញថា បានដកកាំភ្លើង និងបែរកាណុងមករកខ្លួន។ ចំណែកយុវជនម្នាក់ទៀតបានរត់គេចខ្លួនពីកន្លែងកើតហេតុ។
តាមប៉ូលិសក្រុង ប៉ូលិសបាញ់យុវជនស្បែកខ្មៅ ដើម្បីស្វ័យការពារខ្លួនតែប៉ុណ្ណោះ។ យុវជនស្បែកខ្មៅ ដែលប៉ូលិសបាញ់សម្លាប់ កាលពីអធ្រាត្រថ្ងៃអង្គារ ត្រូវបានម្តាយរបស់ខ្លួនប្រាប់ប្រព័ន្ធផ្សព្វផ្សាយក្នុងស្រុកថា មានឈ្មោះ Antonio Martin អាយុ ១៨ឆ្នាំ។
តាមឪពុកម្តាយរបស់Martin យុវជនរូបនេះបានប្រាប់ថា គេចេញទៅជួបសង្សាររបស់ខ្លួន គឺគ្មានជួបនរណាផ្សេងទៀតទេ។ តាមម្តាយរបស់យុវជនMartin ដែលទើបត្រូវ បណ្តេញចេញ ពីសាលា មានបំណងចង់កសាងជីវិតថ្មី និងចង់ចូលបម្រើការងារផ្នែកប៉ូលិសសន្តិសុខ។
តាមពិត កន្លែងដែលប៉ូលិសបាញ់សម្លាប់យុវជនស្បែកខ្មៅ កាលពីយប់ថ្ងៃអង្គារ នៅទីក្រុងBerkeley ស្ថិតនៅតែប៉ុន្មានគីឡូម៉ែត្រប៉ុណ្ណោះពីកន្លែងយុវជនស្បែកខ្មៅម្នាក់ ឈ្មោះ Michael Brown ត្រូវប៉ូលិសបាញ់សម្លាប់ ទាំងគ្មានអាវុធក្នុងដៃ កាលពី៤ខែមុន។ កាលពីខែវិច្ឆិកា ការសម្រេច របស់តុលាការក្នុងការមិនចោទប្រកាន់ប៉ូលិសដែលបាញ់យុវជនBrown បានបង្កឲ្យមានការខឹង សម្បារយ៉ាងខ្លាំងក្លា និងបាតុកម្មថ្នាក់ជាតិ ប្រឆាំងប៉ូលិសអាមេរិក។ ថ្មីៗនេះទៀត បាតុកម្មតវ៉ាបានកើតមានជាថ្មី នៅទីក្រុងញូវយ៉ក បន្ទាប់ពីតុលាការបានសម្រេចមិនផ្តន្ទាទោសលើប៉ូលិសដែលបានធ្វើបុរសស្បែកខ្មៅម្នាក់ស្លាប់ នៅក្នុងប្រតិបត្តិការចាប់ឃាត់ខ្លួន របស់ប៉ូលិស។
សកម្មភាពបាញ់សម្លាប់យុវជនAntonio Martin កាលពីយប់ថ្ងៃអង្គារទំនងមិនជួយបន្ថយកំហឹង ប៉ុន្តែរឹតតែដុតកំហឹងរបស់សហគមន៍ប្រជាជនស្បែកខ្មៅ ដែលចោទប៉ូលិសស្បែកសថា មានការរើសអើងទៅលើពួកគេ។ ជាក់ស្តែង គ្រាន់តែប្រព័ន្ធផ្សព្វផ្សាយក្នុងស្រុកបានចាក់បញ្ចាំងរូបភាពយុវជនស្បែកខ្មៅត្រូវប៉ូលិសបាញ់សម្លាប់ មនុស្សជាច្រើននាក់បានសម្រុកទៅកាន់កន្លែងកើតហេតុ និងប្រតាយប្រតប់ជាមួយប៉ូលិស ដែលត្រូវបញ្ជូនយ៉ាងសន្ធឹកទៅពង្រឹងសន្តិសុខនៅជុំវិញ កន្លែងដែលសាកសពយុវជនស្បែកខ្មៅនៅដេកស្តូកស្តឹងនឹងដី មុននឹងត្រូវលើកបញ្ជូនចូលឡានពេទ្យ។ ប៉ូលិសបានបាញ់ផ្សែងម្រេចដើម្បីបំបែកហ្វូងបាតុករ ក្នុងពេលដែល បុរសបីនាក់ត្រូវប៉ូលិសចាប់ឃាត់ខ្លួន ក្នុងបទប្រព្រឹត្តអំពើហិង្សាលើកងរក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ