ធនាគារអាមេរិកនឹងមិនដំឡើងអត្រាការប្រាក់ទេ
នៅពេលនេះ ធនាគារកណ្តាលសហរដ្ឋអាមេរិក កំពុងតែពិភាក្សាលើការកំណត់អត្រាការប្រាក់។ នៅយប់នេះ ក្រោយការប្រជុំចប់ គេរំពឹងថា ធនាគារនេះនឹងសម្រេចរក្សាអត្រាការប្រាក់របស់ខ្លួនឲ្យនៅទាបដដែល បើទោះជាគេបានទទួលស្គាល់ថា ស្ថានភាពសេដ្ឋកិច្ចអាមេរិកបានប្រសើរឡើងហើយក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សេង ឌីណា
មន្រ្តីធនាគារកណ្តាលសហរដ្ឋអាមេរិកបានប្រជុំគ្នាតាំងពីថ្ងៃអង្គារ ម្សិលមិញម៉្លេះ ដើម្បីកំណត់នយោបាយរូបិយវត្ថុរបស់ខ្លួន។ គេរំពឹងថា ធនាគារកណ្តាលអាមេរិកនឹងមិនដំឡើងអត្រាការប្រាក់របស់ខ្លួនមកវិញទេ។
កាលពីខែធ្នូ ឆ្នាំ២០០៨ អាមេរិកបានកាត់បន្ថយអត្រាការប្រាក់របស់ខ្លួនដល់កម្រិតមួយទាបបំផុត គឺស្ទើរតែដល់ ០% ដើម្បីទប់ទល់នឹងវិបត្តិសេដ្ឋកិច្ច។
ជាការពិតថា នាពេលបច្ចុប្បន្ននេះ សេដ្ឋកិច្ចរបស់អាមេរិកមានភាពរឹងមាំជាងមុន។ តួលេខថ្មីៗនេះបានបង្ហាញថា តម្លៃអចលនវត្ថុបានចាប់ផ្តើមកើនឡើងវិញ ហើយនៅតែបន្តកើនឡើងតទៅទៀត។ ការចំណាយទូទៅរបស់ប្រជាជនអាមេរិកក៏មានការកើនឡើងជាលំដាប់ដែរ។
ក៏ប៉ុន្តែ អត្រាអ្នកអត់ការងារធ្វើនៅតែមានកម្រិតខ្ពស់។ ម្យ៉ាងវិញទៀត ស្ថានភាពទីផ្សារហិរញ្ញវត្ថុនៅទូទាំងពិភពលោកកំពុងតែវឹកវរ ដោយមកពីវិបត្តិនៅក្នុងប្រទេសក្រិក និងព័រទុយហ្កាល់។ លុយអឺរ៉ូបានធ្លាក់ថ្លៃ មកនៅត្រឹមតែជាង ១,៣១ដុល្លារប៉ុណ្ណោះ ក្នុង១អឺរ៉ូ ដែលជាកម្រិតមួយទាបបំផុតមិនធ្លាប់មាន ក្នុងរយៈពេល ១ឆ្នាំមកនេះ។
ទាំងនេះហើយដែលជាកត្តាជំរុញឲ្យអាមេរិករក្សាអត្រាការប្រាក់របស់ខ្លួនឲ្យនៅទាប។
គួរបញ្ជាក់ថា ការរក្សាអត្រាការប្រាក់ឲ្យនៅទាប ទី១ អាចជួយបង្កើនការចំណាយប្រចាំថ្ងៃរបស់ប្រជាជនអាមេរិក និងការបោះទុនវិនិយោគ ដែលនឹងធ្វើឲ្យសកម្មភាពសេដ្ឋកិច្ចកើនឡើង។ ទី២ វាអាចជួយទប់ដុល្លារកុំឲ្យឡើងថ្លៃ នៅក្នុងពេលដែលលុយអឺរ៉ូកំពុងតែផុយស្រួយ។ ការរក្សាលុយដុល្លារឲ្យនៅទាប គឺវាអាចជួយជំរុញការនាំចេញផលិតផលរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ