លោកអូបាម៉ាបន្តទស្សនកិច្ចនៅគុយបាដោយជួបពលរដ្ឋគុយបា និងក្រុមសកម្មជនប្រឆាំង
ថ្ងៃអង្គារ ទី២២ មីនានេះ ជាថ្ងៃទី២ និងថ្ងៃចុងក្រោយនៃដំណើរទស្សនកិច្ចជាប្រវត្តិសាស្រ្តរបស់លោកប្រធានាធិបតីអាមេរិកអូបាម៉ាក្នុងប្រទេសគុយបា។ បន្ទាប់ពីបានជួបសន្ទនាជាមួយសមភាគីគុយបារ៉ាអ៊ូល កាស្រ្តូនាថ្ងៃចន្ទ ទី២១ មីនាមក លោកអូបាម៉ាថ្លែងផ្ទាល់ទៅកាន់ប្រជាជនគុយបា និងចូលជួបសន្ទនាជាមួយក្រុមសកម្មជនប្រឆាំងគុយបានៅថ្ងៃនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ការជួបផ្ទាល់ជាមួយពលរដ្ឋគុយបារបស់លោកបារ៉ាក់ អូបាម៉ាធ្វើឡើងនៅក្នុងសាលដ៏ធំមួយតាមរយៈការថ្លែងសង្កថារយៈពេល ៤០នាទី។ សង្កថារបស់ប្រធានាធិបតីអាមេរិកត្រូវដាក់ផ្សាយបន្តផ្ទាល់នៅតាមវិទ្យុ និងទូរទស្សន៍សាធារណៈគុយបា។ នេះជាលើកទី១ គិតតាំងពី ៨៨ឆ្នាំកន្លងមកដែលពលរដ្ឋគុយបាបានស្តាប់ឮសម្តីរបស់ប្រធានាធិបតីអាមេរិកដោយផ្ទាល់ក្នុងទឹកដីរបស់ខ្លួន។ ពលរដ្ឋគុយបាទូទៅយល់ឃើញថា ខ្លឹមសារនៃសង្កថារបស់លោកអូបាម៉ានឹងខុសពីខ្លឹមសារនៃសង្កថារបស់ថ្នាក់ដឹកនាំជាន់ខ្ពស់គុយបាដែលគេបានឮសឹងតែរាល់ថ្ងៃ។
នៅក្នុងសន្និសីទកាសែតជាមួយសមភាគីគុយបាលោករ៉ាអ៊ូល កាស្រ្តូនៅថ្ងៃចន្ទ ទី២១ មីនា លោកបារ៉ាក់ អូបាម៉ាបាននិយាយពីតម្លៃលទ្ធិប្រជាធិបតេយ្យដែលអាមេរិកបន្តរក្សាការពារមិនថាសម្រាប់ប្រទេសណាទេ និងថា គ្មាននរណាម្នាក់អាចសម្រេចជោគវាសនារបស់ប្រទេស និងពលរដ្ឋគុយបា ក្រៅពីប្រជាជនគុយបាខ្លួនឯងទេ។ គួររម្លឹកជូនថា គុយបាជាប្រទេសកាន់អំណាចផ្តាច់ការអស់ជាច្រើនទសវត្សមកហើយ និងដែលកំពុងបន្តស្ថិតក្រោមទ័ណ្ឌកម្មសេដ្ឋកិច្ចអាមរិកាំងមកដល់សព្វថ្ងៃ នោះបើទោះបីជាប្រទេសអតីតគូសត្រូវទាំងពីរទើបបានផ្តើមរកិលរកគ្នាវិញក៏ដោយ។
ក្រៅពីថ្លែងសង្កថាទៅកាន់ពលរដ្ឋគុយបា លោកអូបាម៉ាក៏ជួបជាមួយក្រុមសកម្មជនប្រឆាំងចំនួន ១៥នាក់ដែរ។ ជំនួបនោះត្រូវធ្វើនៅក្រៅក្រសែភ្នែកថ្នាក់ដឹកគុយបា ព្រោះត្រូវរៀបចំនៅខាងក្នុងស្ថានទូតអាមេរិកប្រចាំទីក្រុងឡាហាវ៉ាន។ បន្ទាប់មក និងមុននឹងចាកចេញពីគុយបា លោកអូបាម៉ាទៅចូលរួមទស្សនាការប្រកួតកីឡាបេស្បលរវាងក្រុមកីឡាករជាតិគុយបា និងក្រុមកីឡាករអាមេរិកមកពីរដ្ឋ Floride៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ