លោកអូបាម៉ាមិនទាន់អើពើពីការជាប់ឆ្នោតថ្មីរបស់លោកនេតាន់យ៉ាហ៊ូ
នៅសហរដ្ឋអាមេរិកកាលពីថ្ងៃពុធម្សិលមិញគឺខាងគណបក្សសាធារណរដ្ឋដែលជាអ្នកបានផ្ញើសារអបអរសាទរមុនគេចំពោះការជាប់ឆ្នោតសាជាថ្មីរបស់លោកនាយករដ្ឋមន្រ្តីអ៊ីស្រាអែលនេតាន់យ៉ាហ៊ូបន្ទាប់ពីការធ្វើបទសុន្ទរកថាដ៏ចម្រូងចម្រាសរបស់លោកនៅឯសភាអាមេរិកកាលពីពីរសប្តាហ៍មុន។
ចុះផ្សាយនៅថ្ងៃ៖
ស្តាប់ - ០២:១៣
លោក Jeb Bush ដែលជាបេក្ខជនមិនទាន់ជាផ្លូវការសម្រាប់ការបោះឆ្នោតប្រធានាធិបតីសហរដ្ឋអាមេរិកនាពេលខាងមុខបានសរសេរក្នុងគណនី Twitter របស់លោកយ៉ាងដូច្នេះថា៖ សូមអបអរសាទរលោកនាយករដ្ឋមន្រ្តីនេតាន់យ៉ាហ៊ូចំពោះការជាប់ឆ្នោតជាថ្មីរបស់លោក។ លោកគឺជាអ្នកដឹកនាំដ៏ពិតប្រាកដដែលនឹងបន្តធានាសន្តិសុខ និងកំលាំងរបស់ប្រទេសអ៊ីស្រាអែល។ ចំណែកលោក Bob Corker សមាជិកព្រឹទ្ធសភាអាមេរិកមកពីគណបក្សសាធារណរដ្ឋ និងជាប្រធានគណៈកម្មការកិច្ចការបរទេសបានប្រកាសថា៖ ប្រជាធិបតេយ្យដែលចំណាស់ជាងគេ និងមានស្ថិរភាពជាងគេនៅក្នុងមជ្ឈិមបូព៌ាត្រូវបានគេបោះឆ្នោតជាថ្មីម្តងទៀតជាមួយនឹងការប្រកួតយ៉ាងក្តៅ គគុក ហើយនឹងបង្កើតនូវរដ្ឋាភិបាលថ្មីមួយដោយសន្តិវិធី និងយើងសូមអបអរសាទរដល់លោកនេតាន់ យ៉ាហ៊ូចំពោះការទទួលជ័យជម្នះ និងដល់លោក Herzog សម្រាប់យុទ្ធនាការប្រកួតប្រជែងរបស់លោក ហើយយើងរង់ចាំដើម្បីបន្តធ្វើការជាមួយគ្នាលើផលប្រយោជន៍រួមរបស់យើង។
លោក Ted Cruz សមាជិកព្រឹទ្ធសភាអាមេរិកបានសរសេរក្នុងសេក្តីថ្លែងការរបស់ខ្លួនថា៖ ការជាប់ឆ្នោតរបស់លោកនេតាន់យ៉ាហ៊ូ គឺជារឿងគួរឱ្យចាប់អារម្មណ៍ណាស់ ខណៈដែលកម្លាំងដ៏មានឥទ្ធិពលបានព្យាយាមធ្វើឲ្យនេតាន់យ៉ាហ៊ូចុះខ្សោយ ជាពិសេសពីក្រុមនយោបាយរបស់លោកអូបាម៉ា។ ជារួមយើងសង្កេតឃើញថាភាគច្រើន គឺអ្នកនយោបាយខាងអភិរក្សនិយម និងប្រឆាំងនឹងលោកអូបាម៉ាដែលរវាសរវៃជាងគេក្នុងការសរសេរសារអបអរសាទរលោកនេតាន់យ៉ាហ៊ូដើម្បីជាការចំអកឡកឡាយដោយមិនផ្ទាល់ចំពោះលោក ប្រធានធិបតីអូបាម៉ាដែលមានទំនាក់ទំនងមិនល្អជាមួយលោកនាយករដ្ឋមន្រ្តីអ៊ីស្រាអែលនេតាន់យ៉ាហ៊ូ។
ចំណែកអ្នកនយោបាយខាងប្រជាធិបតេយ្យវិញហាក់ដូចជានៅស្ងៀមស្ងាត់នៅថ្ងៃពុធនេះដោយមិនមានប្រតិកម្មអ្វីពីលទ្ធផលបោះឆ្នោតនេះទេ។ ហើយមកដល់ម៉ោងនេះនៅលើគណនី Twitter ទាំងរបស់លោកអូបាម៉ា ទាំងរបស់សេតវិមានក៏គ្មានអើពើពីរឿងនេះដែរ។ ប៉ុន្តែនៅក្នុងថ្ងៃមុនពេលការបោះឆ្នោត គេសង្កេតឃើញថាខាងគណបក្សប្រជាធិបតេយ្យបានចៀសវាងការរិះគន់ដោយផ្ទាល់លើលោកនេតាន់យ៉ាហ៊ូ ដោយបានលើកសរសើរតែពីទំនាក់ទំនងជាប្រវត្តិសាស្រ្ត និងវប្បធម៌រវាងប្រទេសអ៊ីស្រាអែល និងសហរដ្ឋអាមេរិកតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ