លោកអូបាម៉ាស្នើឲ្យសភាអាមេរិកដកគុយបាចេញពីបញ្ជីខ្មៅនៃប្រទេសគំាទ្រភេរវនិយម
នៅថ្ងៃអង្គារ ទី១៤ មេសា លោកប្រធានាធីបតីអាមេរិកបារ៉ាក់ អូបាម៉ាបានប្រាប់សភាអាមេរិកពីគោលបំណងរបស់លោកក្នុងការលុបឈ្មោះប្រទេសគុយបាចេញពីបញ្ជីខ្មៅនៃក្រុមប្រទេសគំាទ្រភេរវនិយម។ ការសម្រេចចិត្តរបស់លោកអូបាម៉ាយ៉ាងដូច្នេះបានធ្វើឡើង ៣ថ្ងៃក្រោយពីលោកបានជួបសន្ទនាផ្ទាល់ជាមួយលោកប្រធានាធិបតីគុយបារ៉ាអ៊ូល កាស្រ្តូនាឱកាសជំនួបកំពូលអាមេរិកលើកទី៧ ក្នុងប្រទេសបាណាម៉ា។ គួររម្លឹកជូនថា អាមេរិកបានដាក់គុយបាក្នុងបញ្ជីក្រុមប្រទេសគំាទ្រភេរវនិយមតំាងពីឆ្នំា ១៩៨២ មកម្ល៉េះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៥
ការដែលលោកអូបាម៉ាបានស្នើឲ្យសភាអាមេរិកដកគុយបាចេញពីបញ្ជីខ្មៅនៃក្រុមប្រទេសគំាទ្រភេរវនិយមពេលនេះ ជារឿងគួរឲ្យភ្ញាក់ផ្អើល និងមិនភ្ញាក់ផ្អើល។ ភ្ញាក់ផ្អើលព្រោះវាបានធ្វើឡើង ៣ថ្ងៃក្រោយពីមានជំនួបជាប្រវត្តិសាស្រ្តរវាងលោកអូបាម៉ា និងសមភាគីគុយបារ៉ាអ៊ូ កាស្រ្តូនាឱកាសជំនួបកំពូលអាមេរិកលើកទី៧ ក្នុងប្រទេសបាណាម៉ា។ គឺជាជំនួបលើកទី១ រវាងប្រមុខរដ្ឋអាមេរិក និងគុយបាតំាងពីទីក្រុងវ៉ាស៊ីតោន និងទីក្រុងឡាហាវ៉ានបានផ្តាច់ទំនាក់ទំនងការទូតរវាងគ្នាក្នុងឆ្នំា ១៩៦១ ដែលជាឆ្នំាកំណើតរបស់លោកអូបាម៉ា។ តែវាជារឿងមិនភ្ញាក់ផ្អើល ព្រោះការលប់ឈ្មោះគុយបាចេញពីបញ្ជីខ្មៅអាមេរិកនៃក្រុមប្រទេសគំាទ្រភេរវនិយម គឺជាល័ក្ខខ័ណ្ឌមួយក្នុងចំណោមល័ក្ខខ័ណ្ឌផ្សេងទៀតដែលគុយបាបានទាមទារ មុននឹងគុយបាអាចភ្ជាប់ទំនាក់ទំនងផ្លូវទូតជាមួយអាមេរិកឡើងវិញ។
គួររម្លឹកជូនបន្តិចថា តំាងពីក្រោយការប្រកាសគួរឲ្យភ្ញាក់ផ្អើលរបស់លោកអូបាម៉ានាខែធ្នូ ឆ្នំា ២០១៤ ក្នុងការចាប់ដៃជាមួយគុយបាឡើងវិញមក ប្រធានបទនៃការលុបឈ្មោះគុយបាចេញពីប្រទេសគំាទ្រភេរវនិយមត្រូវបានអតីតគូសត្រូវជិតខាងទំាងពីរលើកយកទៅជជែកគ្នាចំនួនពីរដង គឺក្នុងខែមករានៅទីក្រុងឡាហាវ៉ាន និងក្នុងខែកុម្ភៈនៅទីក្រុងវ៉ាស៊ីនតោន។
ហេតុផលដែលបានជម្រុញឲ្យលោកអូបាម៉ាសម្រេចចិត្តពេលនេះ
ការសម្រេចចិត្តរបស់លោកអូបាម៉ាត្រូវបានធ្វើឡើងតាមរយៈសេចក្តីជូនដំណឹងមួយផ្ញើទៅកាន់សភានៅថ្ងៃអង្គារ ទី១៤ មេសា។ នៅក្នុងសេចក្តីជូនដំណឹងនោះ លោកអូបាម៉ាបានបញ្ជាក់យ៉ាងខ្លីថា រដ្ឋាភិបាលនៃប្រទេសគុយបាមិនបានផ្តល់ការគាំទ្រណាមួយចំពោះអង្គការភេរវនិយមអន្តរជាតិនារយៈពេល ៦ខែចុងក្រោយនេះទេ។ គួរជម្រាបជូនថា ពីដំបូងឡើយ រដ្ឋបាលអាមេរិកំាងមិនបានចាត់ទុករឿងដកគុយបាចេញពីបញ្ជីប្រទេសគំាទ្រភេរវនិយមជាប្រធានបទអាទិភាពនៅក្នុងកិច្ចចរចាទេ តែគឺក្រសួងការបរទេសអាមេរិកដែលបានផ្តល់អនុសាសន៍ឲ្យគិតគូរលើបញ្ហានេះមុនគេ ព្រោះវាជាឆ្អឹងទទឹង ក សម្រាប់ឈានទៅដោះស្រាយបញ្ហាផ្សេងទៀត។
លោកប្រមុខការទូតអាមេរិកចន ឃ៊ែរីបានគូសបញ្ជាក់ថា កាលៈទេសៈ និងបរិបទពិភពលោកសព្វថ្ងៃមានការផ្លាស់ប្តូរច្រើន បើធៀបនឹងឆ្នំា ១៩៨២ ពោលគឺខុសគ្នាឆ្ងាយណាស់បើធៀបនឹង ៣៣ឆ្នំាមុន។ ក្រៅពីក្រសួងការបរទេស បំណងចង់ឲ្យដកប្រទេសគុយបាចេញពីបញ្ជីខ្មៅនៃក្រុមប្រទេសគំាទ្រភេរវនិយមក៏ជាអនុសាសន៍របស់ក្រសួងស៊ើបការណ៍សម្ងាត់អាមេរិកំាងដែរ។ បច្ចុប្បន្ននេះ មាន ៤ប្រទេសកំពុងស្ថិតក្នុងបញ្ជីខ្មៅអាមេរិកនៃប្រទេសគំាទ្រភេរវនិយម គឺស៊ីរីក្នុងឆ្នំា ១៩៧៩ គុយបាក្នុងឆ្នំា ១៩៨២ អ៊ីរ៉ង់ក្នុងឆ្នំា ១៩៨៤ និងប្រទេសស៊ូដង់ក្នុងឆ្នំា ១៩៩៤។
គឺរដ្ឋបាលអាមេរិកក្នុងជំនាន់លោកប្រធានាធិបតី Reagan ដែលបានចុះគុយបាក្នុងបញ្ជីខ្មៅជាប្រទេសគំាទ្រភេរវនិយមក្នុងឆ្នំា ១៩៨២។ កាលណោះ អាមេរិកបានចោទគុយបាពីបទបានគំាទ្រក្រុមឧទ្ទាម Farc ក្នុងប្រទេសកូឡុំប៊ី និងក្រុមអ្នកទាមទារផ្តាច់ទឹកដីនិយម ETA ក្នុងប្រទេសអេស្បាញ។
បើសភាបដិសេធ លោកអូបាម៉ាប្រើសិទ្ធិវ៉េតូ
នៅពេលនេះ សំណើរបស់លោកអូបាម៉ាកំពុងស្ថិតក្នុងដៃសភាអាមេរិកដែលគណបក្សប្រឆំាង គឺគណបក្សសាធាណរដ្ឋកំពុងមានសម្លេងភាគច្រើន។ បើគេពិនិត្យមើលលើប្រតិកម្មទូទៅឃើញថា សំណើរបស់លោកអូបាម៉ាបានទទួលការគំាទ្រផង និងប្រឆំាងពីគណបក្សប្រឆំាង គឺគណបក្សសាធារណរដ្ឋក៏ដូចជាគណបក្សប្រជាធិបតេយ្យរបស់លោក។ ជារួម សមាជិកព្រឹទ្ធសភា និងសមាជិកសភាដែលចេញមុខប្រឆំាងនឹងលោកអូបាម៉ាច្រើនជាមនុស្សដែលមានដើមកំណើតជាជនជាតិគុយបា។ យ៉ាងណាក៏ដោយ និងបើផ្អែកតាមនីតិវិធី សភាអាមេរិកមានរយៈពេល ៤៥ថ្ងៃដោយគិតចាប់ពីថ្ងៃអង្គារ ទី១៤ មេសាដើម្បីទទួលយក ឬបដិសេធសំណើរបស់លោកអូបាម៉ា។
នៅក្នុងករណីណាដែលសភាច្រានចោលសំណើរបស់លោកអូបាម៉ានោះ លោកអូបាម៉ានឹងប្រើសិទ្ធិវ៉េតូដើម្បីប្រឆំាងតបវិញ មានន័យថា ការលុបគុយបាចេញពីបញ្ជីខ្មៅនៃប្រទេសគំាទ្រភេរវនិយមនៅតែអាចធ្វើបានដដែល។ ដូច្នេះឃើញថា ក្រុមគណបក្សប្រឆំាងប្រហែលជាគ្មានប្រយោជន៍អ្វីនឹងបោះឆ្នោតប្រឆំាងសំណើរបស់លោកអូបាម៉ាឡើយ។ អ៊ីចឹង ពន្លឺនៃក្តីសង្ឃឹមសម្រាប់ប្រទេស និងប្រជាជនគុយបានៅតែមាន។ ប្រជាជនគុយបាភាគច្រើនបាននំាគ្នាសាទរចំពោះការសម្រេចចិត្តរបស់លោកអូបាម៉ា ព្រមទំាងចាត់ទុកការសម្រេចចិត្តរបស់លោកថា ប្រកបដោយភាពក្លាហាន។
ប្រសិនបើគុយបាលែងស្ថិតក្នុងបញ្ជីខ្មៅអាមេរិកហើយ នោះគុយបាអាចនឹងផ្តើមបើកស្ថានទូតរបស់ខ្លួននៅក្នុងទឹកដីអាមេរិកឡើងវិញ អាចប្រើប្រាស់ប្រព័ន្ធធនាគារអាមេរិក ឬមួយក៏ខ្ចីលុយកាក់ពីស្ថាប័នអន្តរជាតិនានាដើម្បីអភិវឌ្ឍន៍ប្រទេស។ ជំហានបន្ទាប់របស់គុយបា គឺសុំឲ្យអាមេរិកលើទ័ណ្ឌកម្មសេដ្ឋកិច្ចដែលបានដាក់លើគុយបាតំាងពីឆ្នំា ១៩៦២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ