អាមេរិកគ្រោងផលិតយន្តហោះទម្លាក់គ្រាប់បែកប្រភេទថ្មី សម្រាប់ជំនួស B-52
មន្ទីរបញ្ចកោណអាមេរិកនឹងប្រកាសនៅពេលឆាប់ៗ ខាងមុខ ពីឈ្មោះក្រុមហ៊ុនដែលឈ្នះដេញថ្លៃ យកបានកុងត្រាផលិតយន្តហោះទម្លាក់គ្រាប់បែក។ ក្រសួងការពារជាតិ គ្រោងនឹងប្រើយន្តហោះទម្លាក់គ្រាប់បែក ថ្មីចុងក្រោយ ដើម្បីដាក់ឲ្យដំណើរការជំនួសយន្តហោះទម្លាក់គ្រាប់បែក ធុន B-52 ដ៏ល្បីល្បាញ ដែលអាមេរិកធ្លាប់ប្រើកន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
ក្រសួងការពារជាតិអាមេរិកត្រូវសម្រេចនៅខែកញ្ញានេះ ថា តើក្រុមហ៊ុនណាមួយ ដែលនឹងទទួលបានសិទ្ធិផលិតយន្តហោះ ទម្លាក់គ្រាប់បែកប្រភេទថ្មី ដែលនឹងត្រូវគេយកទៅប្រើជំនួស បន្ត ពីយន្តហោះទម្លាក់គ្រាប់បែក B-52។ តើក្រុមហ៊ុនNorthrop ឬក្រុមហ៊ុនBoeing ដែលចងសម្ព័ន្ធជាមួយក្រុមLockheed Martin ដែលនឹងទទួលបានកុងត្រាសង់ផលិតយន្តហោះទម្លាក់គ្រាប់បែកអាមេរិកដែលមានតម្លៃរាប់ពាន់លានដុល្លារនោះ?
រហូតមក រាល់ដំណឹងស្តីពីគម្រោងផលិតយន្តហោះទម្លាក់គ្រាប់បែក ជំនាន់ចុងក្រោយ ត្រូវបានមន្ទីរបញ្ចកោនអាមេរិកបិទលាក់យ៉ាងជិត។ នៅក្នុងសប្តាហ៍នេះ លោកវីលីយ៉ាម ឡាផ្លេន William Laplante អ្នកទទួលខុសត្រូវលើគម្រោងទិញ យន្តហោះ សម្រាប់កងទ័ពអាមេរិក បាននិយាយ បែបលេងសើចថា ក្រៅតែពីតម្លៃយន្តហោះ ដែលមានប្រមាណ ៥០០លានដុល្លារ ក្នុងមួយគ្រឿង ព័ត៌មានអ្វីផ្សេងទៀត សុទ្ធតែសម្ងាត់ មិនអាចបញ្ចេញឲ្យសាធារណជនដឹងបាន។
តាមCSBA ក្រុមសិក្សាលើកម្មវិធីការពារជាតិអាមេរិក កម្មវិធីផលិត អនាគតយន្តហោះទម្លាក់គ្រាប់បែកអាចមានតម្លៃ ៧៣ ពាន់លានដុល្លារ។ កម្មវិធីនេះ ជាប់ចំណាត់ថ្នាក់ទី ៦ ក្នុងចំណោមកម្មវិធីសព្វាវុធអាមេរិក ដែលតម្លៃថ្លៃ កប់ពពក ជាពិសេស កម្មវិធីផលិតយន្តហោះប្រដេញ F 35 ដែលមានតម្លៃដល់ទៅ ៤០០ពាន់លានដុល្លារ។
កងទ័ពអាមេរិកធ្លាប់បានពន្លយឲ្យដឹងរួចហើយ គេត្រូវការយន្តហោះទម្លាក់គ្រាប់បែកទំនើបចុងក្រោយ នេះ ពី៨០ ទៅ ១០០គ្រឿង សម្រាប់បំពាក់ឲ្យកងទ័ពជើងអាកាសអាមេរិក នៅអំឡុងឆ្នាំ ២០២០។
សម្រាប់មន្រ្តីយោធាអាមេរិក គម្រោងផលិតយន្តហោះថ្មី ដែលនឹងត្រូវដាក់ឲ្យដំណើរការជំនួស យន្តហោះទម្លាក់គ្រាប់ដ៏ល្បីឈ្មោះ B-52 នៅជារឿងសម្ងាត់នៅឡើយ។ ប៉ុន្តែ តាមលោកRichard Aboulafia អ្នកជំនាញខាងយានអវកាសអាមេរិក គេដឹងខ្លះៗហើយពីលក្ខណៈពិសេសរបស់អនាគតយន្តហោះទម្លាក់គ្រាប់បែក ដែលត្រូវកសាងឡើងដោយបច្ចេកវិទ្យាទំនើបចុងក្រោយរបស់អាមេរិក។ អាចមានរូបរាងស្តើង ដូចប្រភេទ B២ យន្តហោះទម្លាក់គ្រាប់បែកថ្មី មិនសូវបញ្ចេញលឺសូរសំឡេងខ្លាំង និងវាអាច ដឹកគ្រាប់បែកនុយក្លេអ៊ែរ។ លក្ខណៈពិសេសរបស់វាមួយទៀត គឺមិនឲ្យគេចាប់សញ្ញារ៉ាដារបស់វាបាន ជាពិសេស នៅពេលហោះក្នុងតំបន់របស់ គូសត្រូវ ដែលមានបំពាក់ប្រព័ន្ធរ៉ាដា ចាប់សញ្ញាយន្តហោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ