ទីភ្នាក់ងារសន្តិសុខជាតិ (NSA) រងការវាយប្រហារ
កាលពីព្រឹកថ្ងៃចន្ទម្សិលមិញ មានការបាញ់ប្រហារគ្នាមួយបានផ្ទុះឡើងនៅច្រកចូលនៃទីស្នាក់ការ កណ្តាលនៃទីភ្នាក់ងារសន្តិសុខជាតិ (NSA) របស់សហរដ្ឋអាមេរិកនៅមូលដ្ឋាន Fort Meade ក្នុងរដ្ឋ Maryland ក្បែរក្រុងវ៉ាស៊ីនតោនដែលបានបណ្តាលឲ្យមនុស្សយ៉ាងហោចណាស់ពីរនាក់បានរងរបួស នេះបើតាមការបញ្ជាក់របស់អាជ្ញាធរកាលពីថ្ងៃចន្ទ។
ចុះផ្សាយនៅថ្ងៃ៖
យោងតាមសេចក្តីរាយការណ៍ពត៌មានតាមខ្សែទូរទស្សន៍ CNNបានឲ្យដឹងថា មានរថយន្តមួយគ្រឿងបានព្យាយាមសម្រុកទំលុះទ្វារនៅច្រកចូលនៃទីស្នាក់ការកណ្តាលនៃទីភ្នាក់ងារសន្តិសុខជាតិអាមេរិក មុននឹងមានស្នូរកាំភ្លើងបាញ់រះបានផ្ទុះឡើង។ ហេតុការណ៍នេះបានបណ្តាលឲ្យមនុស្សម្នាក់រងរបួស និងមនុស្សម្នាក់ទៀតក្នុងរថយន្តបង្កហេតុបានស្លាប់ នេះបើតាមប្រភពពត៌មាន CNN។ ដោយឡែក ពត៌មាន ក្នុងស្រុកបានគូសបញ្ជាក់ថាយ៉ាងហោចណាស់មាន មនុស្សពីរនាក់រងរបួស និងត្រូវបាននាំយក ទៅកាន់ មន្ទីរពេទ្យ ហើយបើតាម MyFoxDC របស់បណ្តាញទូរទស្សន៍ Fox News វិញ គឺមានមនុស្សម្នាក់បានស្លាប់។
ចំណែកខាងអាជ្ញាធរវិញ មានកងទ័ពអាមេរិកក៏បានបញ្ជាក់ថាពិតជាមានមនុស្សពីរនាក់ទទួលរងរបួសមែន តែកងទ័ពអាមេរិកមិនបានបញ្ជាក់ផងទេថាតើការរងរបួសមានភាពធ្ងន់ធ្ងរកំរិតណានោះទេ។ ហើយយ៉ាងណាក៏ដោយទាំង កងទ័ពអាមេរិកទាំង FBI ដែលបានចុះអន្តរាគមន៍ធ្វើអង្កេតការណ៍ហាក់ មិនចង់បញ្ជាក់ថាមានការស្លាប់នោះទេ។ ឯ ទីភ្នាក់ងារសន្តិសុខជាតិ NSA វិញមិនព្រមឆ្លើយសំណួរអ្វីទាំងអស់ទៅកាន់អ្នកយកសារពត៌មាន AFP ខណៈពេលដែលការិយាល័យស៊ើបអង្គេតរដ្ឋសហព័ន្ធ FBI យល់ថា ហេតុការណ៍នេះមិនមានចំណងទាក់ទងនឹងភេរវកម្មអ្វីនោះទ។
គួររំលឹកផងដែរថា ទីភ្នាក់ងារសន្តិសុខជាតិ NSA គឺជាទីភ្នាក់ងារស៊ើបការណ៍មួយរបស់អាមេរិកដែលទទួលបន្ទុកក្នុងការប្រមូល និងវិភាគសារ និងសញ្ញាអេឡិចត្រូនិកសំរាប់ការស៊ើបការណ៍សម្ងាត់ និងចារកម្មប្រឆាំងនឹងសហរដ្ឋអាមេរិក។ ទីស្នាក់ការដ៏ធំសម្បើមនៅ Fort Meade ក្នុងរដ្ឋ Maryland ក៏ប្រមូលផ្តុំផងដែរនូវ បញ្ជាការយោធាអាមេរិកសម្រាប់ប្រព័ន្ធអ៊ីនធឺណិត និងទីភ្នាក់ងារអាមេរិកជាច្រើនទៀត ជាសរុបមានទាហានប្រមាណជាង ១១ ០០០ នាក់ និងជនស៊ីវិលជាង ២៩ ០០០ ធ្វើការនៅមូលដ្ឋាន Fort Meade នោះ។ បើទោះជាស្ថានភាពដែលកើតឡើងនេះ ហាក់ត្រូវបានគ្រប់គ្រងបានយ៉ាងឆាប់រហ័សដោយអាជ្ញាធរ តែមូលហេតុនៃឧបទ្ទវហេតុនេះមកទល់នឹងម៉ោងនេះ នៅមិនទាន់ដឹងនៅឡើយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ