FMIកែប្រែការព្យាករណ៍ និងថា កំណើនសេដ្ឋកិច្ចពិភពលោកល្អប្រសើរបន្តិចវិញ នៅឆ្នាំ២០១៥ និងឆ្នាំ ២០១៦
កំណើនសេដ្ឋកិច្ចពិភពលោក នឹងល្អប្រសើរឡើងបន្តិច នៅឆ្នាំនេះ និងឆ្នាំក្រោយ។ តាមការព្យាករណ៍ទុករបស់អង្គការមូលនិធិរូបិយវត្ថុអន្តរជាតិ ដែលគេឃើញមាននៅក្នុងរបាយការណ៍ប្រចាំឆមាស ចុះផ្សាយ កាលពីថ្ងៃអង្គារ ទី ១៤មេសា កំណើនសេដ្ឋកិច្ចរបស់អឺរ៉ុប និងជប៉ុនមានលក្ខណៈវិជ្ជមាន ប៉ុន្តែ អវិជ្ជមានសម្រាប់ប្រទេសដែលទើបមានសេដ្ឋកិច្ចទើបរីកលូតលាស់ថ្មី ដូចជាចិន ជាដើម។ អង្គការFMIបានចេញរបាយការណ៍ស្តីពីសេដ្ឋកិច្ចពិភពលោក នៅមុនការបើកកិច្ចប្រជុំរបស់ខ្លួន ដែលត្រូវធ្វើនៅសប្តាហ៍នេះ នៅទីក្រុងវ៉ាស៊ីនតោន។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងរបាយការណ៍ប្រចាំឆមាស អង្គការមូលនិធិរូបិយវត្ថុ អន្តរជាតិ FMIបានលើកឡើងពីកំណើនសេដ្ឋកិច្ច ជាវិជ្ជមានរបស់ពិភពលោកទាំងមូល។ តាម FMI ផលិតក្នុងស្រុកសរុបរបស់ពិភពលោក PIBនឹងកើនឡើងបន្ថែម១% គឺច្រើនជាងការរំពឹងទុកដែលមានត្រឹម ០,៦ភាគរយប៉ុណ្ណោះ។ ជាទូទៅ កំណើនសេដ្ឋកិច្ចចាប់ល្អឡើងវិញ នៅអឺរ៉ុប និងនៅប្រទេសជប៉ុន ក្នុងពេលដែលកំណើនរបស់អាមេរិកស្ថិតនៅនឹងថ្កល់។ ជាមួយគ្នានេះ គេចាប់ឃើញសញ្ញាមិនសូវល្អ នៅបណ្តាប្រទេសដែលទើបមានសេដ្ឋកិច្ចរីកលូតលាស់ថ្មី។ កំណើនសេដ្ឋកិច្ចរបស់ចិន រុស្ស៊ី និងប្រេស៊ីលនឹងធ្លាក់ថយចុះ នៅឆ្នាំក្រោយ ជាពិសេស រុស្ស៊ី ដែលឃើញកំណើនសេដ្ឋកិច្ចរបស់ខ្លួនធ្លាក់ចុះពី៣,៨%នៅឆ្នាំនេះ ដល់១,១% នៅឆ្នាំក្រោយ។ ក្នុងចំណោមប្រទេសសមាជិកBRICS មានតែឥណ្ឌា កូនសិស្សល្អ ដែលមានកំណើនសេដ្ឋកិច្ចល្អ និងថេរ នៅឆ្នាំនេះ និងឆ្នាំ ក្រោយ គឺប្រមាណ ៧,៥%។
កំណើនសេដ្ឋកិច្ចពិភពលោកកើនឡើងបន្តិច ដោយមកពីតម្លៃប្រេងចុះថោក ជាទូទៅ ក្នុងពិភពលោក។ តាមអ្នកសរសេររបាយការណ៍របស់ FMI សេដ្ឋកិច្ចជប៉ុន និងអឺរ៉ុបបានទទួលផលប្រយោជន៍ ពីតម្លៃប្រេង ដែលធ្លាក់ចុះ ជាង ៤៥ភាគរយ គិតតាំងពីខែកញ្ញាឆ្នាំមុខ។
កំណើនសេដ្ឋកិច្ចល្អប្រសើរ ប៉ុន្តែ គេមិនត្រូវត្រេកអរ ខ្វះការប្រុងប្រយ័ត្នដែរ។ តាម FMI កំណើនសេដ្ឋកិច្ចរបស់ប្រទេសដែលទើបមានសេដ្ឋកិច្ចរីកលូតលាស់ថ្មី ហៅថា BRICS ដែលនៅក្នុងនោះ មានចិន រុស្ស៊ី ប្រេស៊ីល អាហ្វ្រិកខាងត្បូង បានធ្លាក់ចុះ៤ឆ្នាំជាប់គ្នា។ គេបានពន្យល់ថា ដោយសារតែសេដ្ឋកិច្ចរបស់ចិនមិនបោះជំហានទៅមុខ ដូចការព្យាករទុកមុន ប្រទេស កំពុងអភិវឌ្ឍន៍ មួយចំនួន ដែលរស់ពឹងអាស្រ័យលើការធ្វើពាណិជ្ជកម្ម នាំចេញវត្ថុធាតុដើម ឬប្រេង ជាមួយប្រទេសចិន ក៏កំពុងរងប៉ះពាល់ដោយសារតែកំណើនសេដ្ឋកិច្ចមិនសូវល្អរបស់ចិន ដែរ។ រុស្ស៊ី និងវេណេស៊ុយអេឡា ជាដើម កំពុងខាតបង់ ដោយសារតែតម្លៃប្រេងនៅទីផ្សារអន្តរជាតិ ធ្លាក់ចុះជិត ជិត ៥០%។ មួយវិញទៀត តាមអង្គការ FMI ការឡើងថ្លៃនៃប្រាក់ដុល្លារ អាមេរិកក៏អាចជាគ្រោះថ្នាក់សំខាន់មួយសម្រាប់ប្រទេសដែលមានជាប់បំណុលជាប្រាក់ដុល្លារ។ គ្រោះថ្នាក់ក៏មានកាន់តែធំ ទៅទៀត សម្រាប់ប្រទេសនាំចេញប្រេង ដែលកំពុងមានសេដ្ឋកិច្ចផុយស្រួយរួចទៅហើយនោះ។
ជាចុងក្រោយ អង្គការ FMIដែលមានមូលដ្ឋាននៅទីក្រុងវ៉ាស៊ីនតោន បានផ្តល់ដំបូន្មាន ដល់ប្រទេសកំពុងអភិវឌ្ឍន៍ ឲ្យធ្វើកំណែទម្រង់ រចនាសម្ព័ន្ធឡើងវិញ។ កំណែទម្រង់រចនាសម្ព័ន្ធ ដែល FMIធ្លាប់តែប្រាប់ទៅប្រទេសអ្នកមានកន្លងមក។ ក្នុងកំណែទម្រង់ស្នើដោយ FMI គេឃើញមានការកែលម្អ ហេដ្ឋារចនាសម្ព័ន្ធ ដើម្បីទទួលយកបានថាមពល អគ្គសិនី ការលុបចោល របងរនាំងដែលជាឧបសគ្គនៃការធ្វើជំនួញ ការវិនិយោគ។ ចុងក្រោយ គឺការធ្វើកំណែទម្រង់លើប្រព័ន្ធអប់រំ និងទីផ្សារការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ