អង្គការសហប្រជាជាតិបានបញ្ជាក់ជាថ្មីពីការហាមឃាត់ការប្រើប្រាស់អាវុធគីមី
នៅថ្ងៃសុក្រ ទី២២ វិច្ឆិកា សមាជិកទាំង ១៥ប្រទេសនៃក្រុមប្រឹក្សាសន្តិសុខអង្គការសហប្រជាជាតិបានអនុម័តជាឯកច្ឆន្ទលើសេចក្តីថ្លែងការណ៍មួយស្តីពីការហាមឃាត់ការប្រើប្រាស់អាវុធគីមី។ ការមូលមតិគ្នាលើសំណុំរឿងមួយនេះបានធ្វើឡើង បន្ទាប់ពីមានការប្រើប្រាស់អាវុធគីមីនៅក្នុងប្រទេសស៊ីរី ការប្រើអាវុធគីមីលើជនជាតិរុស្ស៊ីលោក Skripal នៅក្នុងប្រទេសអង់គ្លេស ឬមួយលើលោកគីម ជុងណាមដែលជាបងប្រុសម្តាយទីទៃរបស់ប្រមុខដឹកនាំកូរ៉េខាងជើងលោកគីម ជុងអ៊ុននៅអាកាសយានដ្ឋានទីក្រុងគូឡាឡាំពួរក្នុងប្រទេសម៉ាឡេស៊ីជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ផ្អែកតាមសេចក្តីថ្លែងការណ៍ដែលបានអនុម័តជាឯកច្ឆន្ទតាមគំនិតផ្តួចផ្តើមរបស់ប្រទេសអង់គ្លេស ក្រុមប្រឹក្សាសន្តិសុខបញ្ជាក់ជាថ្មីថា ការប្រើប្រាស់អាវុធគីមីជាការបំពានច្បាប់អន្តរជាតិ និងថ្កោលទោសយ៉ាងខ្លាំងចំពោះការប្រើប្រាស់អាវុធគីមី។ សេចក្តីថ្លែងការណ៍ដដែលបានបញ្ជាក់ថា ការប្រើប្រាស់អាវុធគីមីនៅទីកន្លែងណាក៏ដោយ ដោយអ្នកណាក៏ដោយ ក្នុងគោលដៅអ្វីក៏ដោយ និងនៅក្នុងបរិបទណាមមួយក៏ដោយជារឿងមិនអាចទទួលយកបានទេ និងជាការគំរាមកំហែងដល់សន្តិភាព និងសន្តិសុខអន្តរជាតិ។
ការឯកភាពគ្នារបស់ក្រុមប្រឹក្សាសន្តិសុខដើម្បីបញ្ជាក់ជាថ្មីពីការហាមឃាត់អាវុធគីមីពេលនេះបានធ្វើឡើង បន្ទាប់ពីអាវុធគីមីត្រូវបានគេយកទៅប្រើនៅក្នុងសង្រ្គាម ឬទៅសម្លាប់មនុស្សជាផ្ទាំងស៊ីបណាមួយ។ ជាក់ស្តែងក្នុងខែកុម្ភៈ ឆ្នាំ ២០១៧ អាវុធគីមីដ៏មានឥទ្ធិពលត្រូវបានគេយកទៅប្រើដើម្បីសម្លាប់លោកគីម ជុងណាមដែលជាបងប្រុសម្តាយទីទៃរបស់ប្រមុខដឹកនាំកូរ៉េខាងជើងលោកគីម ជុងអ៊ុននៅអាកាសយានដ្ឋានទីក្រុងគូឡាឡាំពួរក្នុងប្រទេសម៉ាឡេស៊ី។ តែរឿងអាស្រូវដែលបានធ្វើឲ្យអង្គការសហប្រជាជាតិបែកបាក់ខ្លាំងជាងគេ គឺជុំវិញការប្រើអាវុធគីមីបំពុលអតីតចារបុរសរុស្ស៊ីលោក Skripal និងកូនស្រីគាត់ឈ្មោះ Loulia នៅក្នុងប្រទេសអង់គ្លេស។
ទន្ទឹមនឹងបញ្ជាក់ជាថ្មីពីការហាមឃាត់ការប្រើប្រាស់អាវុធគីមី ក្រុមប្រឹក្សាសន្តិសុខបានជំរុញគ្រប់ប្រទេសដែលនៅមិនទាន់បានចុះហត្ថលេខា និងនៅមិនទាន់បានឲ្យសច្ចាប័នលើអនុសញ្ញាស្តីពីការហាមឃាត់ការស្រាវជ្រាវ ការផលិត ការស្តុកទុក និងការប្រើប្រាស់អាវុធគីមី ឲ្យរួសរាន់ចុះហត្ថលេខា និងឲ្យសច្ចាប័ន។ គួររម្លឹកថា អនុសញ្ញាមួយនេះត្រូវបានអនុម័តក្នុងឆ្នាំ ១៩៩៣ និងបានចូលជាធរមានក្នុងឆ្នាំ ១៩៩៧។ ប្រទេសស៊ីរីទើបបានភ្ជាប់ខ្លួននឹងអនុសញ្ញានេះក្នុងឆ្នាំ ២០១៣ ហើយអ៊ីស្រាអែលបានចុះហត្ថលេខា តែនៅមិនទាន់បានឲ្យសច្ចាប័ននៅឡើយទេ។ ចំណែកកូរ៉េខាងជើង អេហ្ស៊ីប និងប្រទេសស៊ូដង់ខាងត្បូងបន្តបដិសេធមិនចូលខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ