អាមេរិក៖រដ្ឋអំណាចរដ្ឋហាវ៉ៃចេញមុខពន្យល់ពីមូលហេតុនៃការបញ្ជូនសារអាសន្នមិនពិតស្តីពីគ្រាប់មីស៊ីលបាលីស្ទិក
នៅសហរដ្ឋអាមេរិក ពលរដ្ឋក្នុងរដ្ឋហាវ៉ៃបាននាំគ្នារួសរាន់រត់រកទីជម្រកគេចពីគ្រាប់មីស៊ីលបាលីស្ទិក បន្ទាប់ពីទទួលបានសារអាសន្នស្តីពីការមកដល់នៃគ្រាប់មីស៊ីលបាលីស្ទិកនាព្រឹកព្រលឹមថ្ងៃសៅរ៍ ទី១៣ មករា។ ភ្លាមៗនោះ រដ្ឋអំណាចរដ្ឋហាវ៉ៃក៏បានបញ្ជាក់ថា សារអាសន្ននោះមិនពិតទេ។ តែយ៉ាងណាក៏ដោយ ភាពភ័យស្លន់ស្លោ និងចលាចលបានកើតមានរួចហើយ ពិសេសក្នុងពេលដែលពលរដ្ឋនៅរដ្ឋហាវ៉ៃបានដឹងថា ពួកគេជាផ្ទាំងស៊ីបនៃការវាយប្រហារគ្រាប់មីស៊ីលបាលីស្ទិកពីកូរ៉េខាងជើង។ ភាពភ័យស្លន់ស្លោ និងចលាចលដែលបានបង្ខំឲ្យអភិបាលរដ្ឋហាវ៉ៃលោកដាវីដ អ៊ីហ្គេចេញមុខពន្យល់ពីមូលហេតុនៃការបញ្ជូនសារអាសន្នមិនពិតនោះ។
ចុះផ្សាយនៅថ្ងៃ៖
ស្តាប់ - ០១:៤០
« នៅព្រលឹមស្រាងៗព្រឹកមិញ កំហុសឆ្គងមួយបានកើតមានឡើង ហើយសារមិនពិតមួយត្រូវបានផ្សព្វផ្សាយនៅលើទូរស័ព្ទដៃ នៅលើកញ្ចក់ទូរទស្សន៍ និងនៅតាមវិទ្យុ។ យើងបានពិនិត្យផ្ទៀងផ្ទាត់លើព័ត៌មាននោះភ្លាម ហើយបន្ទាប់ពីយើងបានដឹងថាជាកំហុសឆ្គង យើងក៏បានចាត់វិធានការភ្លាមៗដើម្បីជូនដំណឹងប្រាប់ពលរដ្ឋថាជាសារអាសន្នមិនពិតទេ។
រឿងរ៉ាវមួយនេះមិនគួរនឹងកើតមានឡើយ ហើយយើងក៏កំពុងស្វែងរកមូលហេតុពិតនៃព្រឹត្តិការណ៍នោះ។ អ្វីដែលយើងអាចនិយាយបានពេលនេះ កំហុសឆ្គងនោះបានកើតមានឡើងក្នុងពេលដែលមានការប្តូរក្រុមការងារ។ ក្រុមការងារវេនទី២ ដែលចូលផ្លាស់ក្រុមការងារវេនទី១ បានធ្វើការផ្ទៀងផ្ទាត់មើលថា តើប្រព័ន្ធប្រកាសអាសន្នមានដំណើរការល្អ ឬអត់ ហើយនៅពេលនោះ បុគ្គលិកម្នាក់បានចុចប៊ូតុងច្រឡំ។
ក្នុងករណីដែលមានការវាយប្រហារគ្រាប់មីស៊ីលបាលីស្ទិក រយៈពេលនៃការបញ្ចេញប្រតិកម្មគឺខ្លីណាស់។ អ៊ីចឹងហើយបានជាយើងបង្កើតឲ្យមានប្រព័ន្ធប្រកាសអាសន្នមួយដែលអនុញ្ញាតិជូនព័ត៌មានដល់ពលរដ្ឋឲ្យបានឆាប់រហ័សបំផុត។ ច្បាស់ណាស់ គឺមានបញ្ហានៅក្នុងនីតិវិធី។ ខ្លួនខ្ញុំផ្ទាល់ក៏ត្រូវបានដាស់ពីដំណេកដោយសារតែសារអាសន្នមិនពិតនោះដូចជាពលរដ្ឋក្នុងរដ្ឋហាវ៉ៃដែរ។ វាពិតជារឿងអកុសល និងគួរឲ្យសោកស្តាយខ្លាំងណាស់។
យើងនឹងពិនិត្យមើលថា តើនឹងត្រូវកែលម្អនីតិវីធីរបៀបណាដើម្បីចៀសវាងកុំឲ្យបញ្ហានេះកើតមានជាថ្មីម្តងទៀត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ