អង្គការសហប្រជាជាតិបង្ហាញតម្លាភាពក្នុងដំណើរការជ្រើសរើសអគ្គលេខាធិការថ្មី
ក្រោយពីរក្សាទម្លាប់ជ្រើសរើសអគ្គលេខាធិការ ដោយសម្ងាត់អស់រយៈពេល៧០ឆ្នាំ នៅលើកនេះអង្គការសហប្រជាជាតិបានសាកល្បងធ្វើប្រកបដោយតម្លាភាព។ ក្នុងរយៈពេលបីថ្ងៃ គិតចាប់ពីថ្ងៃអង្គារដល់ថ្ងៃព្រហស្បតិ៍ទី ១៤មេសានេះ បេក្ខជនទាំង៨នាក់ ដែលចង់ប្រជែងយកតំណែងបន្តពី លោកបាន គីមូន ចាប់ពីខែមករា២០១៧ ត្រូវបង្ហាញកម្មវិធីនិងត្រីវិស័យដឹកនាំរបស់ខ្លួនទៅកាន់អង្គមហាសន្និបាតអង្គការសហប្រជាជាតិ ដើម្បីបញ្ចុះបញ្ចូលគណៈមេប្រយោគ ដែលជាសមាជិកទាំង១៥របស់ក្រុមប្រឹក្សាសន្តិសុខ។ នេះជាទម្រង់បែបបទជ្រើសរើសអគ្គលេខាធិការថ្មីដែលពុំធ្លាប់មាននៅអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ជាករណីថ្មីស្រឡាងដែរ ក្នុងដំណើរការជ្រើសរើសអគ្គលេខាធិការអង្គការសហប្រជាជាតិថ្មី រដ្ឋជាសមាជិក ជាងមួយភាគបួន ចង់ឃើញអគ្គលេខាធិការថ្មី មានភេទស្រី ដោយនៅពេលនេះ ក្នុងចំណោមបេក្ខជនឈរឈ្មោះទាំង៨នាក់ មានពាក់កណ្តាលជាស្ត្រី។
- អគ្គនាយកអង្គការយូណេស្កូ ជាតិប៊ុលហ្ការី លោកស្រី Irina Bokova
- អតីតរដ្ឋមន្ត្រីការបរទេសក្រូអាស៊ី លោកស្រី Vesna Pusic
- អតីតរដ្ឋមន្ត្រីការបរទេសម៉ុលដាវី លោកស្រី Naalia Gherman
- អតីតនាយករដ្ឋមន្ត្រីនូវែហ្សេឡង់ និងបច្ចុប្បន្នជាប្រធានកម្មវិធីអភិវឌ្ឍន៍អង្គការសហប្រជាជាតិ លោកស្រី Helen Clark
- អតីតរដ្ឋមន្ត្រីក្រសួងការបរទេសម៉ុងតេណេក្រូ លោក Igor Luksic
- អតីតរដ្ឋមន្ត្រីការបរទេសម៉ាសេដ្វានលោក Srgjan Kerim
- អតីប្រធានាធិបតីស្លូវានីលោក Danilo Turk
- អតីតនាយករដ្ឋមន្ត្រីព័រទុយហ្គាល់ និងជាអតីតឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនលោក Antonio Guterres
ក្រោយពីមានប្តូរផ្លាស់ស្ថាប័នកាលពីឆ្នាំកន្លងទៅ អង្គការសហប្រជាជាតិ បានផ្សព្វផ្សាយជាសាធារណៈ ជាលើកមួយ ប្រវត្តិរូបសង្ខេបរបស់បេក្ខជននីមួយៗ ព្រមទាំងលិខិតសុំចុះឈ្មោះជាបេក្ខជន នៅក្នុងទំព័រវិបសៃត៍ http://www.un.org/pga/70/sg ។ ជាងនេះទៅទៀត នៅក្នុងរយៈពេលបីថ្ងៃនេះ បេក្ខជនទាំង៨ ត្រូវឆ្លងកាត់វិញ្ញាសាផ្ទាល់មាត់ ដែលមានរយៈពេលពីរម៉ោង សម្រាប់បង្ហាញនិងឆ្លើយនូវរាល់សំណួរ អង្គមហាសន្និបាតអង្គការសហប្រជាជាតិ។
សូមបញ្ជាក់ថា៧០ឆ្នាំកន្លងមកនេះ ការជ្រើសតាំងប្រមុខដឹកនាំអង្គការសហប្រជាជាតិ តែងប្រព្រឹត្តទៅដោយបិទទ្វារ ក្នុងរង្វង់សមាជិកក្រុមប្រឹក្សាសន្តិសុខ អចិន្ត្រៃយ៍និងមិនអចិន្ត្រៃយ៍ទាំង១៥ប៉ុណ្ណោះ។ ហើយជាទូទៅ គឺក្រុមប្រទេសមហាអំណាចទាំង៥ដែលមានសិទ្ធិវេតូ សហរដ្ឋអាមេរិក រុស្ស៊ី អង់គ្លេស ចិន និងបារាំង ជាអ្នកផ្តល់អនុសាសន៍ឱ្យសមាជិកទាំង១៩៣បោះឆ្នោតតាម ជាការបង្គប់កិច្ច។ ប៉ុន្តែនៅលើកនេះ អង្គការសហប្រជាជាតិបានប្រកាន់យកដំណើរការជ្រើសរើសអគ្គលេខាធិការថ្មី ដែលមានតម្លាភាពជាង ដោយមានទាំងលិខិតសុំចុះឈ្មោះ បង្ហាញប្រវត្តិរូប បង្ហាញប្រវត្តិការងារនិងបទពិសោធន៍ និងវិញ្ញាសាផ្ទាល់មាត់ទៀត។
ក្រោយវិញ្ញាសាផ្ទាល់មាត់បីថ្ងៃនេះរួច សមាជិកក្រុមប្រឹក្សាសន្តិសុខ នឹងបោះឆ្នោតជ្រើសរើស តាមរយៈសន្លឹកឆ្នោតសម្ងាត់ នៅខែកក្កដា បេក្ខជនម្នាក់ ជាអគ្គលេខាធិការថ្មី មុននឹងដាក់ជូនទៅកាន់អង្គមហាសន្និបាតទាំងមូលអនុម័តតាមក្រោយ នៅខែកញ្ញា។
បើតាមប្រភពឯកជនពីអ្នកការទូតខ្លះ បញ្ជាក់ថារុស្ស៊ីមិនពេញចិត្តជម្រើសបែបតម្លាភាពថ្មីនេះទេ ព្រោះរុស្ស៊ីចង់រក្សាប្រពៃណី ដែលថាតំបន់នីមួយៗត្រូវវិលប្តូរគ្នាកាន់តួនាទីនៅអង្គការសហប្រជាជាតិ។ ពេលនេះត្រូវដល់វេន ឥស្សរជនមកពីអឺរ៉ុបខាងកើតម្តង ឡើងអង្គុយកៅអី អនាគតអគ្គលេខាធិការថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ