កំណើនសេដ្ឋកិច្ចអាមេរិក ធ្លាក់ចុះនៅត្រីមាសទីបី
សេដ្ឋកិច្ចអាមេរិកនៅត្រីមាសទី៣ ឆ្នាំ២០១៥នេះ បានធ្លាក់ចុះយ៉ាងខ្លាំង បើប្រៀបធៀបទៅនឹងត្រីមាសទី២។ ផលិតផលដុលសរុប ក្នុងត្រីមាសទី៣នេះ បានកើនត្រឹមតែ១,៥% ប៉ុណ្ណោះ ឯកាលពីត្រីមាសមុន បានកើនរហូតដល់ ៣,៩%។ ទោះបីជាយ៉ាងនេះក្តី សេដ្ឋកិច្ចអាមេរិក បានខិតមករកលំនឹងឡើងវិញ បន្ទាប់ពីផុងនឹងវិបត្តិ នាប៉ុន្មានឆ្នាំចុងក្រោយនេះ។ ការប្រើប្រាស់ក្នុងស្រុក មានកំណើនល្អប្រសើរ ហើយអត្រាអ្នកអត់ការងារធ្វើ ក៏កាន់តែថយចុះខ្លាំងផងដែរ។
ចុះផ្សាយនៅថ្ងៃ៖
ស្តាប់ - ០២:១១
ក្រសួងពាណិជ្ជកម្មអាមេរិក ទើបបានបញ្ចេញតួលេខ នៃកម្រិតផលិតផលដុលក្នុងស្រុកសរុប សម្រាប់ត្រីមាសទី៣ ឆ្នាំ២០១៥ ដែលស្មើនឹង ១,៥%។ កំណើននេះ គឺមានកម្រិតទៀបខ្លាំងណាស់ បើប្រៀបធៀបទៅនឹង ៣,៩% កាលពីត្រីមាសទីពីរ ដែលកាលណោះ ធ្វើឲ្យគ្រប់គ្នា ញញឹមបិទមាត់មិនជិត។ ថ្វិត្បិតតែ ជួបវិបត្តិសេដ្ឋកិច្ច ប៉ុន្មានឆ្នាំមកនេះ អាមេរិក នៅតែរក្សាតំណែង ជាមហាអំណាចសេដ្ឋកិច្ច ទីមួយដដែល។ បើទោះបីជានៅត្រីមាសទីបីនេះ កំណើនសេដ្ឋកិច្ច មានមិនច្រើន ក៏ប៉ុន្តែនេះ វាត្រឹមត្រូវ ទៅតាមការស្មានទុក របស់អ្នកជំនាញ។
ផលិតផលដុលក្នុងស្រុក រឺហៅកាត់ថា PIB នៅត្រីមាសទីបីនេះ គឺស្មើនឹង ១៨០៣៥ ពាន់លានដុល្លារ ដែលក្នុងនេះ គឺមាន១២៣៦៤ពាន់លានដុល្លារ ជាការចំណាយរបស់អ្នកប្រើប្រាស់ក្នុងស្រុក។ ជាការពិតណាស់ ការប្រើប្រាស់ក្នុងស្រុករបស់ប្រជាជនអាមេរិក គឺជាសរសរទ្រូងសេដ្ឋកិច្ច ដ៏សំខាន់របស់អាមេរិក។ នៅត្រីមាសទីបីនេះ កម្រិតនៃការប្រើប្រាស់ក្នុងស្រុកមានចំនួន ៣,២% ពោលគឺថយចុះបន្តិច តែប៉ុណ្ណោះ បើប្រៀបធៀបទៅនឹង ៣,៦% នៅត្រីមាសមុន។
ប្រជាជនអាមេរិក បន្តធ្វើការចំណាយច្រើន ដែលនេះហើយ ជាចលករមួយ ធ្វើឲ្យសេដ្ឋកិច្ចមានសន្ទុះទៅមុខ។ ការចំណាយទូទៅរបស់ប្រជាជនអាមេរិក មានការកើនឡើង ក៏ដោយសារតែ តម្លែប្រេងបានចុះថោកច្រើន។ ដូចគ្នាដែរ ក្រសួងការងារអាមេរិក បានបញ្ចេញតួលេខ ស្តីពីចំនួនអ្នកអត់ការងារធ្វើ ដែលបានថយចុះ ទាបមិនធ្លាប់មាន ក្នុងរយៈពេល៤០ឆ្នាំកន្លងមកនេះ។ ឯការចំណាយសាធារណៈ មានការកើនឡើងបន្តិចបន្តួច ចំនួន ១,៧%ផងដែរ ប៉ុន្តែក្នុងវិស័យកងទ័ព ការចំណាយ បានថយចុះ ប្រហែល ១,៤%។
ផ្ទុយទៅវិញ នៅត្រីមាសនេះ សេដ្ឋកិច្ចអាមេរិកជួបបញ្ហា គឺទាក់ទងទៅនិងការនាំចេញ ដោយសារតែតម្លៃប្រាក់ដុល្លារ មានកម្រិតខ្ពស់ខ្លាំង បើទោះបីជាការនាំចេញ បានកើន២% ក៏ដោយ។ តម្លែប្រាក់ដុល្លារខ្ពស់ មានន័យថា ផលិតផលអាមេរិក ដែលនាំចេញទៅលក់នៅខាងក្រៅ ក៏ឡើងថ្លៃ ទៅតាមនោះដែរ។
ទោះបីជាយ៉ាងណាក៏ដោយ សេដ្ឋកិច្ចអាមរិក ហាក់កំពុងតែបោះជំហាន ទៅមុខឡើងវិញ បើទោះណាជាជំហាននេះ ម្តងធំម្តងតូចក៏ដោយ។ មហាអំណាចសេដ្ឋកិច្ចទីមួយពិភពលោក នឹងទាញអូសសេដ្ឋកិច្ចពិភពលោកទាំងមូល ឲ្យមានកំណើន ទៅតាមនោះដែរ។ តាមការសន្និដ្ឋាន តួលេខសរុបសម្រាប់ឆ្នាំ២០១៥នេះ អាមេរិកអាចនឹងមានកំណើនសេដ្ឋកិច្ច ចំនួន២,១% ពោលគឺថយចុះបន្តិច បើប្រៀបធៀបទៅឆ្នាំ២០១៤ ដែលមាន២,៤%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ