មួយឆ្នាំក្រោយហេតុការណ៍នៅFerguson ពលរដ្ឋអាមេរិកបាត់ទំនុកចិត្តលើប៉ូលិស
នៅថ្ងៃអាទិត្យទី៩សីហានេះ ត្រូវជាខួបមួយឆ្នាំគត់នៃហេតុការណ៍ប៉ូលិសអាមេរិកស្បែកស បាញ់សម្លាប់យុវជនស្បែកខ្មៅ គ្មានអាវុធនឹងដៃ។ មរណភាពរបស់យុវជន ម៉ៃខល ប្រោន អាយុ១៨ឆ្នាំ បានធ្វើឱ្យវិបត្តិរើសអើងពណ៌សម្បុរបានរស់រវើកឡើងវិញនៅសហរដ្ឋអាមេរិក។ អំពើហិង្សាបានរាលដាលដល់រដ្ឋនិងក្រុងផ្សេងទៀត ស្ទើរពេញផ្ទៃសហរដ្ឋអាមេរិក បន្ទាប់ពីតុលាការផ្តល់សាលក្រមដោះលែងប៉ូលិសស្បែកសជាអ្នកបាញ់កាំភ្លើង ថាគ្មានទោស។ មួយឆ្នាំក្រោយ ភាពតានតឹងនៅដដែល ! វិបត្តិទំនុកចិត្តបានកើតឡើង ! មានពលរដ្ឋអាមេរិកប្រមាណតែ៤០%ជឿជាក់លើប៉ូលិស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៤
នាំមុខដោយឪពុកនិងក្រុមគ្រួសាររបស់ម៉ៃខល ប្រោន ក្បួនបាតុកម្ម បានដង្ហែចេញតាមផ្លូវនៅក្រុងFerguson។ ជាការដើរក្បួនដោយសន្តិវិធី មានទម្រង់ជាក្បួនបុណ្យ ក្រោមការត្រួតពិនិត្យរបស់ប៉ូលិស ស្រែកជាជ័យឃោស “លើដៃ កុំបាញ់" ឬ “យើងនៅទីនេះដើម្បីមៃខលប្រោន” “សូមឈប់បាញ់សម្លាប់យើង” ... ឪពុកម៉ៃខលប្រោន បានអះអាងទៅកាន់អ្នកកាសែត ថានឹងធ្វើគ្រប់យ៉ាង ដើម្បីឱ្យរក្សាព្រលឹងកូនប្រុសឱ្យនៅជាចងចាំ និងដើម្បីសហគមន៍ស្បែកខ្មៅ។ ក្បួនដង្ហែបាននាំគ្នាដើរដល់មុខសាលារៀនរបស់ម៉ៃខលប្រោន ហើយសង្រួមឥរិយាបថគោរពវិញ្ញាណក្ខន្ធបួននាទីកន្លះ ដើម្បីរំលឹកដល់រយៈពេលបួនម៉ោងកន្លះដែលគេទុកសពម៉ៃខលប្រោនកណ្តាលថ្នល់ មុននឹងដឹកទៅកន្លែងទុកខ្មោច។ ប៉ុន្តែដល់ពេលល្ងាចក្រុមបាតុករជាង២រយនាក់ ហាក់ដូចជាឆួលកំហឹងឡើង ទៅទម្លុះរនាំងប៉ូលិស និងមានការប៉ះទង្គិចគ្នាបន្តិចបន្តួច។
នៅថ្ងៃនេះ ការដើរក្បួននឹងបន្តរៀបចំធ្វើទៀតនៅរសៀលនេះ ដោយមានតំណាងចលនាសិទ្ធិជនស៊ីវិល និងតំណាងសាសនា មកពីគ្រប់ជ្រុងនៃសហរដ្ឋអាមេរិកចូលរួមប្រារព្ធខួបមួយឆ្នាំនេះដែរ។
វិបត្តិប្រកាន់ពូជសាសន៍រើបឡើង ទំនុកចិត្តលើប៉ូលិសធ្លាក់ចុះ
ការស្លាប់របស់ម៉ៃខលប្រោន កាលពីថ្ងៃទី ៩ សីហា ២០១៤ គ្រាន់តែជាផ្កាភ្លើង ព្រាកឡើងដាស់ឱ្យឃើញ អំពី ភាពអយុត្តិធម៌ និងការរើងអើងពូជសាសន៍ ប្រកាន់ពណ៌សម្បុរ ក្នុងសង្គមអាមេរិកតាំងពីយូរយារប៉ុណ្ណោះ ប៉ុន្តែមិនមែនថាអ្វីៗត្រូវដោះស្រាយរួចទាំងអស់ទេ។
ក្រោយពីហេតុការណ៍ប៉ូលិសស្បែកស បាញ់សម្លាប់យុវជនម៉ៃខលប្រោន ដែលគ្មានអាវុធ និងបន្ទាប់មក នៅតែវិច្ឆិកាតុលាការអាមេរិកប្រកាសថាប៉ូលិសនោះគ្មានទោស ភាពតានតឹងនិងអំពើហិង្សាសហគមន៍ស្បែកខ្មៅ ជាមួយប៉ូលិសស្បែកស បានរីករាលដាល ស្ទើរពេញផ្ទៃសហរដ្ឋអាមេរិក។
វិបត្តិរើសអើងពូជសាសន៍ប្រកាន់ពណ៌សម្បុរ ចាស់ឬចាក់គល់ក្នុងស្ថាប័នប៉ូលិសអាមេរិក បានចោទឡើងជាថ្មី ជាងពេលណាៗទាំងអស់ និងបានធ្វើឱ្យគ្រប់គ្នានឹកឃើញឡើងវិញ នូវចលនាប៉ះបោរប្រមូលផ្តុំកាលពីកន្លះសតវត្សរ៍មុន។ ចលនាសិទ្ធិស៊ីវិល ដែលធ្លាប់បានប្រមូលផ្តុំគ្នាស្រែកជ័យឃោសថាជនជាតិស្បែកខ្មៅក៏មានជីវិតដែរ ដើម្បីបរិហារភាពកំណាចឃោឃៅរបស់ប៉ូលិសចំពោះពលរដ្ឋស្បែកខ្មៅ។
ប្រឈមមុខស្ថានការណ៍បែបនេះ រដ្ឋាភិបាលរបស់លោកប្រធានាធិបតី អូបាម៉ា ជាស្បែកខ្មៅដែរ ចេញវិធានការផ្សេងៗ ដើម្បីលុបបំបាត់រូបភាពប៉ូលិសអាមេរិកកាច ប៉ូលិសប្រកាន់វិន័យយោធា បង្កប់ទៅដោយការស្អប់ខ្ពើមនិងរើសអើងពូជសាសន៍។ ប៉ុន្តែគ្មានទេ ការធ្វើកំណែទម្រង់ស៊ីជម្រៅ ដើម្បីព្យាបាលជំងឺដែលចាក់កប់ក្នុងគ្រឹះសង្គមនិងនយោបាយអាមេរិក។ នៅក្នុងប្រព័ន្ធអាមេរិក ប៉ូលិសមិនមែនស្ថិតនៅក្រោមបង្គាប់ថ្នាក់ជាតិ ក្រសួងមហាផ្ទៃទេ គឺជាប៉ូលិសជារបស់ឃុំស្រុក ដូច្នេះក្នុងរយៈពេលមួយឆ្នាំ គេពិតជាមិនអាចប្តូរផ្លាស់អ្វីបានទាំងអស់។
គឺមានតែផលវិបាកទេ ដែលមើលឃើញច្បាស់និងឆាប់ជាង។ បើតាមអ្នកឯកទេសខ្លះ ហេតុការណ៍នៅហ្វេហ្គូសាន់ បានបង្កផលប៉ះពាល់ជាក់ស្តែងមួយ គឺការបាត់បង់ទំនុកចិត្ត។ ភាពជឿជាក់លើគ្នា រវាងពលរដ្ឋអាមេរិក និងប៉ូលិស បានបន្តធ្លាក់ចុះជាលំដាប់ គិតចាប់ពីថ្ងៃ៩សីហា ២០១៤មក។ បើតាមការស្ទង់មតិថ្មីៗ បង្ហាញថាមានពលរដ្ឋអាមេរិកដើម្បីកំណើតស្បែកខ្មៅ តែ៣០%ប៉ុណ្ណោះ មានទំនុកចិត្តលើប៉ូលិស ហើយអ្វីដែលគួរឱ្យភ្ញាក់ផ្អើលជាងនេះទៅទៀត បើនិយាយជាលក្ខណៈទូទៅ ពលរដ្ឋអាមេរិកស្បែកស-និងស្បែកខ្មៅ ចំនួន៦០% មិនទុកចិត្តលើប៉ូលិស។ គឺជាវិបត្តិខ្វះទំនុកចិត្ត លើស្ថាប័នប៉ូលិស ! ថ្ងៃណាក៏គេឃើញមានរូប ឬវីដេអូប៉ូលិសប្រើកម្លាំងបង្ក្រាប បង្ហោះលើប្រព័ន្ធសង្គមដែរ។ ពលរដ្ឋអាមេរិកៗទុកចិត្តលើវិសោធនកម្មច្បាប់ឱ្យពលរដ្ឋកាន់អាវុធច្រើនជាង។
សារភាព តែគ្មានវិប្បដិសារី
មានឈ្មោះថា Darren Wilson អាយុ២៩ឆ្នាំ អតីតប៉ូលិសជាអ្នកបាញ់សម្លាប់ម៉ៃខលប្រោន ដែលត្រូវបានដកចេញពីតំណែង បានរួចពីទោសភ័យអ្វីទាំងអស់ ! ព្រោះតុលាការគ្មានភស្តុតាងគ្រប់គ្រាន់សម្រាប់ធ្វើការចោទប្រកាន់។
ដោយមិនសូវបញ្ចេញត្រកូល ពេលនេះ Darren Wilson បន្តរស់នៅក្នុងតំបន់ជាយក្រុង មិនឆ្ងាយប៉ុន្មានពីFerguson មានផ្ទះថ្មីបានមកពីប្រាក់ជំនួយឧបត្ថម្ភពីអ្នកគាំទ្រ។ មានតែអ្នកកាសែតអាមេរិកម្នាក់គត់ដែលអាចចេញចូលសាកសួរព័ត៌មានបាន។ ទទួលខុសត្រូវចំពោះទង្វើរបស់ខ្លួនក្នុងពេលបំពេញភារកិច្ចជាប៉ូលិស តែ Darren Wilson គ្មានវិប្បដិសារីទេ និងបន្តជីវិតធម្មតានៅក្នុងស្មារតីស្ងប់ស្ងាត់ ជាមួយប្រពន្ធកូន នេះបើតាមប្រភពព័ត៌មានThe New Yorker៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ