លោកប្រធានាធិបតីអូបាម៉ាផ្តល់យោបល់លើបញ្ហាភាពក្រីក្រ
នៅប៉ុន្មានម៉ោងមុននេះលោកប្រធានាធិបតីអាមេរិក បារ៉ាក់ អូបាម៉ា បានចូលរួមក្នុងកិច្ចពិភាក្សាស្តីពី ប្រធានបទយកឈ្នះលើភាពក្រីក្រ នៅឯសាកលវិទ្យាល័យចចថោន ក្នុងទីក្រុងវ៉ាស៊ីនតោន។ សារដ៏សំខាន់របស់លោកគឺ គ្មានហេតុផលណាមួយដែលគេគួរគិតថា សហរដ្ឋអាមេរិកមិនអាចប្រយុទ្ធប្រឆាំងនឹងភាពក្រីក្របានដោយប្រសិទ្ធិភាពនោះទេ។
ចុះផ្សាយនៅថ្ងៃ៖
ក្នុងកិច្ចពិភាក្សានោះមានការចូលរួមពីលោក Robert Putnam សាស្រ្តាចារ្យខាងគោលនយោបាយសាធារណៈ នៃសាកលវិទ្យាល័យហាវឺដ និង លោក Arthur Brooks ប្រធានវិទ្យាស្ថានសហគ្រាសអាមេរិក ដោយមានលោក E.J. Dionne, Jr., សាស្រ្តាចារ្យមហាវិទ្យាល័យគោលនយោបាយសាធារណៈ នៃសាកលវិទ្យាល័យចចថោនជាអ្នកសម្របសម្រួលកិច្ចពិភាក្សា។
នាឱកាសនោះលោកប្រធានាធិបតីអូបាម៉ាបាននិយាយពីបរិបទទាក់ទងនឹងភាពក្រីក្រនៅក្នុងសង្គមអាមេរិកបច្ចុប្បន្ន ដោយលើកឡើងថា៖ ភាពចលាចលក្នុងទីក្រុង Baltimore និង Ferguson នៃរដ្ឋមីស៊ូរី ថ្មីៗនេះ បានបង្កើនការយល់ដឹងពីបញ្ហាក្រីក្រ ដែលមានទំនាក់ទំនងជាមួយវិសមភាពទ្រព្យសម្បត្តិ និងបានបង្កើតការយកចិត្តទុកដាក់ជាថ្មីទៅលើការស្វែងរកដំណោះស្រាយ។
លោកក៏បានមានប្រសាសន៍ផងដែរថា៖ វាជាកំហុសឆ្គងមួយដែលគិតថា កិច្ចខិតខំប្រឹងប្រែងដើម្បីលុបបំបាត់ភាពក្រីក្របានបរាជ័យ ហើយរដ្ឋាភិបាលគឺគ្មានអំណាចក្នុងការដោះស្រាយនោះទេ។ លោកបានបន្ថែមថា៖ តាមពិតយើងមានកម្មវិធីជាច្រើនដែលដាក់ឲ្យដំណើរការនៅទូទាំងប្រទេស ប៉ុន្តែអ្វីដែលជាគន្លឹះគឺ ត្រូវធ្វើយ៉ាងណាឲ្យកម្មវិធីទាំងនោះអនុវត្តឲ្យបានទូលាយជាងនេះ។
លោកអូបាម៉ាបានអះអាងថាប្រសិនបើយើងចង់បញ្ចប់ភាពក្រីក្រ៖ យើងគួរមានការផ្លាស់ប្តូររបៀបដែល ប្រព័ន្ធផ្សព្វផ្សាយធ្វើសេចក្តីរាយការណ៍អំពីបញ្ហាទាំងនេះ។ លោកបានចង្អុលចំឈ្មោះសារពត៌មាន Fox News ដែលលោកអះអាងថា Fox News មានចេតនាបែងចែកប្រទេស ដោយការរំលេចចេញតែពី ប្រជាជនក្រីក្រមួយចំនួនដែលមិនដឹងថាគេរកបានមកពីណានោះទេ ដែលសុទ្ធតែជាបុគ្គលប្រភេទខ្ជិល ច្រអូស មិនចង់ធ្វើការ តែចង់បានគ្រប់សព្វដូចជាទូរស័ព្ទដោយឥតគិតថ្លៃដែលគេនាំគ្នាឲ្យឈ្មោះថា Obamaphone ជាដើម។ គេកំរឃើញណាស់ពីស្ថានភាព ដូចជាអ្នករត់តុម្នាក់ដែលជាសមញ្ញជនធម្មតា ដែលត្រូវរកទទួលទានចិញ្ចឹមកូននិងដែលធ្វើអ្វីគ្រប់យ៉ាងដែលត្រឹមត្រូវតែនៅមិនអាចផ្គត់ផ្គង់ជីវភាព ប្រចាំខែបាន។ ដូចនេះ យើងត្រូវមានការផ្លាស់ប្តូរអំពីរបៀបដែលប្រព័ន្ធផ្សព្វផ្សាយឆ្លុះបញ្ចាំងពីជនក្រីក្រ និងអំពីរបៀប ដែលប្រជាជនមានចំណាប់អារម្មណ៍ថាអ្វីទៅជាការជួបការលំបាកនៅក្នុងសង្គមសេដ្ឋកិច្ចនេះ និងថាតើវាមានចំណងទាក់ទងយ៉ាងដូចម្តេចជាមួយនឹងថវិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ