សារពត៌មានកំពុងផ្ទៀងចាំស្តាប់ពីការប្រកាសបេក្ខភាពប្រធានាធិបតីរបស់លោកស្រី Hillary Clinton
យុទ្ធនាការបាះឆ្នោតប្រធានាធិបតីអាមេរិកឆ្នាំ២០១៦ ទំនងជាកំពុងបន្ថែមល្បឿន បន្ទាប់ពីលោក Ted Cruz សមាជិកព្រឹទ្ធសភាអាមេរិកមកពីគណបក្សសាធារណរដ្ឋបានប្រកាសជាផ្លូវការពីបេក្ខភាពរបស់ ខ្លួនដំបូងគេកាលពីថ្ងៃចន្ទ។ ចំណែកខាងគណបក្សប្រជាធិបតេយ្យវិញ លោកស្រី Hillary Clinton មាន ប្រជាប្រិយភាពនាំមុខគេក្នុងការស្ទង់មតិ ហើយសារពត៌មានគ្រប់ទិសទីកំពុងផ្ទៀងចាំស្តាប់ពី ការប្រកាសបេក្ខភាពជាផ្លូវការរបស់លោកស្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
មកដល់ម៉ោងនេះយើងនៅមិនទាន់ឃើញមានការប្រកាស ឬការកំណត់កាលបរិច្ឆេទពីការប្រកាសជាផ្លូវការពីបេក្ខភាពប្រធានាធិបតី របស់លោកស្រី Hillary Clinton អតីតរដ្ឋមន្រ្តីការបរទេសអាមេរិក និង អតីតស្រ្តីទីមួយអាមេរិក នៅឡើយទេ។ តែកាលពីថ្ងៃចន្ទ លោកស្រី Hillary Clinton បានចូលជួបលោក ប្រធានាធិបតី បារ៉ាក់ អូបាម៉ា នៅឯសេតវិមាន ជាជំនួបឯកជន ដែលអ្នកនាំពាក្យសេតវិមានលោក Josh Earnest បានរៀបរាប់ថា លោកទាំងពីរចូលចិត្តជួបមុខគ្នាផ្ទាល់តាមតែអាចធ្វើទៅបាន ដើម្បីផ្តោះប្តូរ ពត៌មាន ហើយនាឱកាសនោះជំនួបមានរយៈពេលជាងមួយម៉ោង និងមានការជជែកពិភាក្សាលើប្រធានបទជាច្រើន។
នៅថ្ងែចន្ទដែលនោះ នាក្រុងវ៉ាស៊ីនតោន លោកស្រី Hillary Clinton បានធ្វើបទអន្តរាគមន៍ចំនួនពីរ។ ទីមួយនៅក្នុងព្រឹត្តិការណ៍របស់មជ្ឈមណ្ឌលសម្រាប់វឌ្ឍនភាពរបស់សហរដ្ឋអាមេរិក Center for American Progress និងមួយទៀតនៅឯពិធីប្រគល់ពានរង្វាន់ Toner Prize ដល់អ្នកសារពត៌មានពូកែ ខាងធ្វើបទយកការណ៍នយោបាយ។
សារនយោបាយរបស់លោកស្រីក្នុងបទអន្តរាគមន៍ទីមួយបានផ្តោតលើប្រធានបទចំនួនពីរ គឺ តម្លៃនៃការ ធ្វើការរួមគ្នា និងតម្រូវការក្នុងការប្រយុទ្ធប្រឆាំងនឹងវិសមភាពសេដ្ឋកិច្ច។ ប្រធានបទទាំងពីរនេះ ទំនងជាផ្នែកសំខាន់មួយនៃទ្រឹស្តីនយោបាយសម្រាប់ទីលានយុទ្ធនាការបោះឆ្នោតរបស់លោកស្រីនៅឆ្នាំ២០១៦នេះ។ ឯក្នុងបទអន្តរាគមន៍ទីពីរ ក្រៅពីបានសង្កត់ធ្ងន់ពីសារៈប្រយោជន៍របស់សារព័ត៌មាន ក្នុងលិទ្ធិប្រជាធិបតេយ្យ លោកស្រីក៏បានយកឱកាសនោះ ដើម្បីវាយបកទៅពួកគណបក្សសាធារណរដ្ឋ ដែលកំពុងគ្រប់គ្រងសភា ជាពិសេសក្នុងការគាំទ្រលើកំណែទម្រង់ប្រព័ន្ធសុខាភិបាល "Obamacare" របស់លោកស្រី។
ក្រៅពីបទអន្តរាគមន៍ទាំងពីរនៅដើមសប្តាហ៍នេះ គេមិនឃើញមានកាលបរិច្ឆេទកំណត់ពីអ្វីផ្សេងទៀត នៅក្នុងប្រតិទិនសាធារណៈរបស់លោកស្រីនោះទេ ដែលជាហេតុនាំឲ្យមានពាក្យចចាមអារាមថា លោកស្រីទំនងជារៀបចំដើម្បីប្រកាសពីបេក្ខភាពប្រធានាធិបតីរបស់លោកស្រីក្នុងពេលដ៏ឆាប់ៗខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ