ប្រទេសអារ៉ាប៊ីសាអូឌីតនៅក្រោយការវាយប្រហារថ្ងៃ១១កញ្ញា?
បន្ទាប់ពីការឆ្លើយរបស់ Zacarias Moussaoui ដែលបានចោទប្រកាន់ប្រទេសអារ៉ាប៊ីសាអូឌីតថាបាន ផ្តល់ជំនួយហិរញ្ញវត្ថុទៅឲ្យក្រុម ភេវកម្មអាល់កៃដាសម្រាប់ការវាយប្រហារភេវរកម្មនៅ ទីក្រុង ញ៉ូវយ៉ក កាលពី ថ្ងៃ ១១ កញ្ញា ឆ្នាំ ២០០១ សមាជិក សភាអាមេរិកស្នើសុំឲ្យទម្លាយការសម្ងាត់លើផ្នែកនៃរបាយការណ៍ស៊ើបអង្កេតជុំវិញប្រភពហិរញ្ញវត្ថុរបស់ក្រុមភេវកម្មអាល់កៃដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ជនជាប់ទោសឈ្មោះ Zacarias Moussaoui មានសញ្ជាតិបារាំង និងដែលត្រូវបានតុលាការសហរដ្ឋអាមេរិកផ្តន្ទាទោសដាក់ពន្ធនាគារមួយជីវិតកាលពីឆ្នាំ២០០៦ ពីបទដែលបានចូលរួមក្នុងការរៀបចំភេវរកម្មកាលពីថ្ងៃទី ១១កញ្ញាឆ្នាំ២០០១។ ក្នុងពេលសួរចំលើយនៅឯពន្ធនាគារក្នុងរដ្ឋ Colorado នាពេលថ្មីៗនេះ ជននេះបានទម្លាយការសម្ងាត់ ដោយបានចោទថា គឺប្រទេសអារ៉ាប៊ីសាអូឌីតឋិតនៅ ក្រោយការផ្តល់ហិញ្ញប្បទានទៅឲ្យក្រុមភេវរកម្មអាល់កៃដា។ ពត៌មាននេះត្រូវបានឲ្យដឹងជាសាធារណៈ កាលពីដើមសប្តាហ៍នេះ។ បន្ទាប់មក ការស៊ើបអង្កេតថ្មីមួយ ក៏ទើបនឹងផ្តើមធ្វើឡើងវិញផងដែរ តាំងពី ថ្ងៃព្រហស្បតិ៍កន្លងទៅនេះ។
ចំណែកសមាជិកសភាអាមេរិកក៏បានប្រតិកម្មថាវាដល់ពេលហើយដែលត្រូវដឹងថា ការអះអាងរបស់ ពិរុទ្ធជនសញ្ជាតិបារាំងម្នាក់នេះត្រឹមត្រូវដែរឬក៏អត់។ ការសម្ងាត់ដែលសមាជិកសភាអាមេរិកចង់ឲ្យមាន ការលាតត្រដាងនោះ គឺជាឯកសារចំនួន២៨ទំព័រ ទាក់ទងនឹងប្រភពហិរញ្ញវត្ថុរបស់ក្រុមអាល់កៃដាផ្តល់ ដោយប្រទេសអារ៉ាប៊ីសាអូឌីត ដែលមិនត្រូវបានលាតត្រដាងម្តងណានោះទេ ក្រោយការស៊ើបអង្កេត និង ការបង្កើតគណៈកម្មការសភាសិក្សាលើភេវរកម្មថ្ងៃ១១កញ្ញានោះមក។
ទាំងគ្រួសារជនរងគ្រោះនៃសោកនាដកម្មថ្ងៃ១១កញ្ញា ទាំងសមាជិកសភានិងព្រឹទ្ធសភាអាមេរិក បានព្យាយាមស្វះស្វែងតាំងពីជាង១០ឆ្នាំមកហើយ ក្នុងការបង្ហាញការពិតនេះ។
ចំណោមអ្នកដែលបានដឹងពីអត្ថន័យនៃឯកសារសម្ងាត់កំពូលនេះ មានមតិពីរខ្វែងគ្នា។ មួយចំនួនយល់ឃើញថា មិនមានភស្តុតាងណាមួយត្រូវបានគេបង្ហាញពីចំណងទាក់ទងរវាងរដ្ឋាភិបាលអារ៉ាប៊ីសាអូឌីត និង ភេវរកម្មដែលបានកើតឡើងនោះទេ។ តែមួយចំនួនទៀតបានអះអាងថា ក្នុងឯកសារនោះពិតជាមាន ការបង្ហាញពីហិរញ្ញប្បទានដោយមន្ត្រីអារ៉ាប៊ីសាអូឌីតទៅវិញ។ បើយោងតាមអ្នក យកពត៌មានរបស់ New York Time សូម្បីតែស្ថានទូតអារ៉ាប៊ីសាអូឌីត ក៏ចង់ឲ្យមានការទំលាយការសម្ងាត់លើឯកសារទាំងនោះ ដើម្បីបញ្ចប់ការកេងចំនេញនយោបាយលើពត៌មាននេះ។
អំណាចគឺឋិតក្នុងដៃរបស់ប្រធានាធិបតីក្នុងការសម្រេចលាតត្រដាងឬមិនលាតត្រដាងនូវឯកសារនោះ។ លោកអតីតប្រធានាធិបតី George W Bush ធ្លាប់បានពន្យល់ថាការលាតត្រដាងនូវឯកសារសម្ងាត់នោះនឹង អាចគំរាមកំហែងដល់សន្តិសុខជាតិ។ ចំណែកប្រធានាធិបតីបច្ចុប្បន្ន លោកបារ៉ាក់អូបាម៉ា ក៏មិនដែល ធ្លាប់ហ៊ានបរិយាយពីសំណុំឯកសារនោះដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ