វ៉េណេស៊ុយអេឡាងាកទៅតំបន់បូព៌ា ពេលប្រឈមនឹងវិបត្តិប្រេង
ថ្ងៃទី៥ ខែមករានេះ ប្រធានាធិបតី នីកូឡា ម៉ាឌួរ៉ូ (Nicolas Maduro)បានកោះហៅបណ្តារដ្ឋមន្ត្រី មន្ត្រីរដ្ឋាភិបាល និងអភិបាលក្រុងទាំងឡាយ មកប្រជុំ។ ប្រមុខ រដ្ឋវ៉េណេស៊ុយអេឡាបានផ្តល់នូវការបញ្ជាក់បន្ថែមលើចំណុចខ្លះៗក្នុងផែនការសេដ្ឋកិច្ចរបស់ខ្លួនសម្រាប់ឆ្នាំ២០១។ នៅដើមឆ្នាំនេះ លោក ម៉ាឌួរ៉ូបានប្រកាសថានឹងធ្វើដំណើរជាប្រញាប់នៅពេលល្ងាច ទៅកាន់ប្រទេសចិន បន្ទាប់មកទៅបណ្តាប្រទេសខ្លះទៀត ក្នុងអង្គការនៃប្រទេសអ្នកនាំប្រេងចេញ ហៅកាត់ថាអូប៉ិប (Opep)។
ចុះផ្សាយនៅថ្ងៃ៖
ស្តាប់ - ០១:៥២
នៅក្នុងបទអន្តរាគមន៍ដ៏ធំដើមឆ្នាំ ប្រធានាធិបតីវ៉េណេស៊ុយអេឡា មិនអាចចៀសពីការទទួលស្គាល់ឥទ្ធិពលខ្លាំងនៃវិបត្តិប្រេងបានទេ។ លោកថ្លែងថា៖ «នៅចំពោះមុខការធ្លាក់ចុះខ្លាំងនៃតម្លៃប្រេង ខ្ញុំត្រូវតែកែតម្រូវផែនការវិនិយោគនានា»។
ជាពិសេស លោក នីកូឡា ម៉ាឌួរ៉ូ មិនលាក់លៀមទេ៖ គេត្រូវរកឱ្យបានការផ្តល់ហិរញ្ញវត្ថុថ្មីៗទៀត។ ត្បិតមានករណីសង្គ្រោះបន្ទាន់ដែលត្រូវធ្វើ៖ ថវិកាជាតិឆ្នាំ២០១៥ ត្រូវបានគិតដោយផ្អែកលើមូលដ្ឋាននៃតម្លៃប្រេង៦០ដុល្លារក្នុងមួយធុង ហើយសប្តាហ៍មុន តម្លៃប្រេងបានធ្លាក់ដល់៤៨ដុល្លារក្នុង១ធុង។
ក្នុងបរិបទថ្មីនេះ ប្រមុខរដ្ឋវ៉េណេស៊ុយអេឡាប្រាថ្នាប្រើឥទិ្ធពលរបស់ខ្លួន ដើម្បីងាកទៅរកចិន។ ជាគោលដៅដែលគ្មានអ្វីគួរឱ្យភ្ញាក់ផ្អើលឡើយ ដោយហេតុថា តាំងពីច្រើនខែមកហើយ ដែលលោក ម៉ាឌួរ៉ូ បង្កើនការផ្លាស់ប្តូរពាណិជ្ជកម្មជាមួយមហាអំណាចសេដ្ឋកិច្ចទី២លើលោកនេះ។ ជានិមិត្តរូបនៃទំនាក់ទំនងដ៏ជិតស្និទ្ធរវាងប្រទេសទាំងពីរ គឺកិច្ចព្រមព្រៀងដែលបានចុះហត្ថលេខាឆ្នាំមុន ដើម្បីធ្វើអាជីវកម្មប្រេង៦សែនធុងក្នុងមួយថ្ងៃ។
លោកប្រធានាធិបតីវ៉េណេស៊ុយអេឡាប្រហែលជានឹងត្រូវធ្វើទស្សនកិច្ចនៅប្រទេសខ្លះ ដែលជាសមាជិកនៃអង្គការប្រទេសអ្នកនាំប្រេងចេញ ហៅកាត់ថាអូប៉ិប (Opep) ក្នុងក្របខ័ណ្ឌនៃការទូតប្រេង។ ប៉ុន្តែ គេត្រូវធ្វើកិច្ចការច្រើនណាស់ ពីព្រោះប្រទេសរបស់លោកកំពុងស្ថិតក្នុងបរាជ័យដ៏ធំមួយ។ អំឡុងពេលប្រជុំសំខាន់របស់អង្គការអូប៉ិប កាលពីខែវិច្ឆិកាមុន ប្រទេសវ៉េណេស៊ុយអេឡាបានបង្កើនការចរចាដើម្បីឱ្យគេបន្ថយការផលិតប្រេង ប៉ុន្តែមិនបានសម្រេច។
ដូច្នេះ នៅថ្ងៃទី៥ ខែមករា ឆ្នាំ២០១៥ លោក នីកូឡា ម៉ាឌួរ៉ូ បានបង្ហាញការប្រឹងប្រែងផ្ទាល់ខ្លួនក្នុងសំណុំរឿងប្រេង លោកបានសន្យាថា«ធ្វើអ្វីៗគ្រប់បែបយ៉ាងដើម្បីបង្កើតយុទ្ធសាស្ត្រពិតប្រាកដមួយ ក្នុងការគ្រប់គ្រងទីផ្សារប្រេងជាមួយអង្គការអូប៉ិបឡើងវិញ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ