លោកអូបាម៉ាសន្យាបញ្ចេញរបាយការណ៍ដែលនិយាយពីរបៀបសួរចម្លើយរបស់ទីភ្នាក់ងារCIA
ចាប់តាំងពីថ្ងៃអង្គារ ទីភ្នាក់ងារស៊ើបអង្កេត CIA របស់អាមេរិកកំពុងរងការចោទប្រកាន់ បន្ទាប់ពីគណៈកម្មការស៊ើបការណ៍សម្ងាត់របស់ព្រឹទ្ធសភាអាមេរិក បានលើកឡើងថា មន្រ្តី របស់CIA បានលួចចូលមើលកុំព្យូទ័រ និងលុបចោលឯកសារដែលពាក់ព័ន្ធនឹងរបៀបសួរចម្លើយរបស់មន្រ្តី CIA និងដែលគណៈកម្មការរបស់ព្រឹទ្ធសភាកំពុងស៊ើបអង្កេត។ ឆ្លើយទៅនឹងសំណួររបស់អ្នកកាសែត កាលពីថ្ងៃពុធទី ១២ មីនា លោកប្រធានាធិបតីអាមេរិកសន្យាថា នឹងទម្លាយជាសាធារណៈរបាយការណ៍ដែលនិយាយពីបច្ចេកទេសសួរចម្លើយរបស់ CIAកន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
តាមរយៈការផ្សព្វផ្សាយជាសាធារណៈរបាយការណ៍ស៊ើបអង្កេតរបស់ព្រឹទ្ធសភា លោកបារ៉ាក់ អូបាម៉ាចង់ឲ្យប្រជាជនអាមេរិកបានស្គាល់ និងដឹង សកម្មភាពកន្លងមករបស់ទីភ្នាក់ងារស៊ើបអង្កេត CIA។ ប៉ុន្តែ លោកត្រូវរង់ចាំឲ្យមន្រ្តី របស់គណៈកម្មការរបស់ព្រឹទ្ធសភាបិទបញ្ចប់របាយការណ៍ស៊ើបអង្កេតសិន។
ជម្លោះពាក្យសំដីដ៏កម្ររវាងព្រឹទ្ធសភា និងទីភ្នាក់ងារ CIAបានផ្ទុះឡើង ជាសាធារណៈ នៅដើមសប្តាហ៍នេះ បន្ទាប់ពីលោកស្រីប្រធានគណៈកម្មការស៊ើបការណ៍សម្ងាត់ ដែលជាសមាជិកព្រឹទ្ធសភាដ៏មានឥទ្ធិពលម្នាក់របស់ព្រឹទ្ធសភាអាមេរិក បានចោទប្រកាន់ចំៗទីភ្នាក់ងារCIAថា បានរំលោភរដ្ឋធម្មនុញ្ញ និងរារាំងការងារស៊ើបអង្កេតរបស់ គណៈកម្មការ។ ឲ្យពិតប្រាកដនោះ គឺគណៈកម្មការរបស់ព្រឹទ្ធសភាបានចោទមន្រ្តី CIAថា លួចចូលមើលកុំព្យូទ័ររបស់គណៈកម្មការ និងលុបចោលឯកសារទាំងឡាយណា ដែលអាចពាក់ព័ន្ធនឹងការប្រព្រឹត្តិកំហុសរបស់ CIA។ លោកJonh Brennan ប្រធាន CIAបានរុញច្រានចោលការចោទប្រកាន់។ ផ្ទុយទៅវិញ ប្រធានរបស់ CIAបានអះអាងថា ខ្លួនក៏កំពុងដាក់ពាក្យបណ្តឹងប្តឹងគណៈកម្មការស៊ើបការណ៍ទៅក្រសួងយុត្តិធម៌។ តាមប្រធាន CIA គណៈកម្មការរបស់ព្រឹទ្ធសភាក៏បានបើកមើលឯកសារដែលគេចាត់ទុកជាកិច្ចការសម្ងាត់ជាតិដែរ។ ពាក្យបណ្តឹងដែលលោកស្រីប្រធានគណៈកម្មការព្រឹទ្ធសភាចាត់ទុកជាសកម្មភាពបំភិតបំភ័យ។
សូមបញ្ជាក់ថា ចាប់តាំងពីឆ្នាំ ២០០៩ ដល់ឆ្នាំ ២០១២ អ្នកជំនាញរបស់គណៈកម្មការស៊ើបការណ៍សម្ងាត់របស់ព្រឹទ្ធសភាអាមេរិកបានបើកការស៊ើបអង្កេតទៅលើរបៀបសួរចម្លើយដែលមន្រ្តី CIAបានធ្វើទៅលើជនសង្ស័យ ក្នុងចន្លោះឆ្នាំ ២០០២ ដល់ឆ្នាំ ២០០៦ គឺក្នុងអាណត្តិរបស់លោកប្រធានាធិបតីប៊ូស។ បុគ្គលិករបស់គណៈកម្មការផ្តោតខ្លាំងជាងគេទៅលើវិធីសាស្រ្តសួរចម្លើយបែបក្តៅរបស់មន្រ្តី CIA ជាពិសេសគឺវិធីសាស្រ្តជ្រមុជក្បាលជនសង្ស័យ ទៅក្នុងទឹកដើម្បី ឈ្លេចសួររកចម្លើយ។
នេះជាលើកទីមួយ ដែលទីភ្នាក់ងារ CIAត្រូវជាប់សំណាញ់ស៊ើបអង្កេត និងរងការចោទប្រកាន់ពីគណៈកម្មការស៊ើបការណ៍សម្ងាត់ ដែលកន្លងមក ធ្លាប់តែចេញមុខជួយការពារការងាររបស់ CIA៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ