Super Tuesday ៖ លោក Mitt Romney ទទួលជោគជ័យទាំងប្រផុតប្រផើយ
លោក Mitt Romney បានទទួលជោគជ័យក្នុងការបោះឆ្នោតវគ្គជ្រើសតាំងបេក្ខជនប្រធានាធិបតីតំណាងគណបក្សសាធារណរដ្ឋនៃថ្ងៃ Super Tuesday ឬថ្ងៃអង្គារដ៏សំខាន់ដែលបានប្រព្រឹត្តទៅនៅថ្ងៃទី៦មីនាឆ្នាំ២០១២។ ក៏ប៉ុន្តែ ជោគជ័យរបស់លោក Mitt Romney បានត្រូវកាត់បន្ថយដោយគូប្រជែងដូចជាលោក Rick Santorum និងលោក Newt Gingrich ដែលដណ្តើមយកបានរដ្ឋមួយចំនួនដែលមានជំហរអភិរក្សនិយម។ ដូច្នេះ ការប្រយុទ្ធដណ្តើមគ្នាដើម្បីធ្វើជាបេក្ខជនប្រធានាធិបតីតំណាងគណបក្សសាធារណរដ្ឋនៅមានបន្តវែងឆ្ងាយទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ជាមួយនឹងសន្លឹកឆ្នោតប្រមាណ១២ ០០០សំឡេងលើសគូប្រជែងរបស់ខ្លួន លោក Mitt Romney ទទួលជោគជ័យបានទាំងប្រផុតប្រផើយ។ ក៏ប៉ុន្តែជាជោគជ័យមួយដ៏សំខាន់សម្រាប់រដ្ឋ Ohio ដែលគេតែងតែដណ្តើមយកឲ្យបាន ដើម្បីឈានឆ្ពោះទៅធ្វើការប្រកួតប្រជែងដើម្បីកាន់កាប់តំណែងប្រធានាធិបតីអាមេរិក។
លោក Mitt Romney ដែលជាបេក្ខជនប្រធានាធិបតីពុំមានជំហរអភិរក្សនិយមជ្រុល ក៏ទទួលបានជោគជ័យផងដែរនៅក្នុងរដ្ឋមួយចំនួនដូចជា៖ រដ្ឋ Massachussetts Vermont Virginia Idaho និងរដ្ឋAlaska ។ ក៏ប៉ុន្តែ លោក Mitt Romney បានទទួលបរាជ័យនៅក្នុងរដ្ឋដែលមានជំហរអភិរក្សនិយម។
រដ្ឋ Géorgie បានធ្លាក់ទៅក្នុងដៃរបស់លោក Newt Gingrich រីឯរដ្ឋ Dakota ខាងជើង Tennessee និងរដ្ឋ Oklahoma វិញបានធ្លាក់ទៅលើដៃរបស់លោក Rick Santorum ។ ដូច្នេះ លោក Rick Santorum ដែលជាអ្នកសាធារណរដ្ឋមានជំហរអភិរក្សនិយមខ្លាំង ពិតជាកំពុងបង្ហាញឲ្យគេឃើញថា លោកជាគូប្រជែងដ៏ស្វិតស្វាញម្នាក់ក្នុងការប្រយុទ្ធតទល់នឹង លោក Mitt Romney។
ក៏ប៉ុន្តែ អ្វីដែលសំខាន់គឺចំនួនប្រតិភូដែលគេដណ្តើមយកបាន ដោយហេតុថា ដើម្បីក្លាយជាបេក្ខជនប្រធានាធិបតីតំណាងគណបក្សសាធារណរដ្ឋ គេត្រូវតែយកឲ្យបាន១ ១៤៤ប្រតិភូ។
ក្រោយពីថ្ងៃ Super Tuesday លោក Mitt Romney ទទួលបាន៣៨០ប្រតិភូ។ លោក Rick Santorum ទទួលបាន១៦០ប្រតិភូ។
ដូច្នេះ ការប្រយុទ្ធតទល់គ្នារវាង លោក Mitt Romney និងលោក Rick Santorum នៅមានវែ
ងឆ្ងាយតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ