ខ្យល់ព្យុះកំបុតត្បូងសាបព្រោះវិនាសកម្មនិងផ្តាច់ជីវិតមនុស្សអស់ជាច្រើន
នៅស.រ.អា. ជនជាង៤០នាក់បានបាត់បង់ជីវិត នៅចុងសប្តាហ៍ទើបកន្លងផុតទៅនេះ នៅក្នុងព្យុះសង្ឃរាដ៏ខ្លាំងអមកំដរទៅដោយខ្យល់កំបុតត្បូង។ដំបូលផ្ទះត្រូវបានខ្យល់បក់របើកកន្ត្រាក់កួចយកទៅ ដើមឈើរលើងឫស សង្កាត់ទាំងមូលៗបានវិនាសហិនហោច ខ្យល់ព្យុះកំបុតត្បូងដ៏កាចសាហាវបានបំផ្លិចបំផ្លាញ ជាពិសេស នៅភាគខាងត្បូងនិងភាគកណ្តាលប្រទេស ប៉ះពាល់មណ្ឌលមួយដែលគេឱ្យឈ្មោះថាជា” របៀងខ្យល់ព្យុះកំបុតត្បូង” ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់Raphaël REYNES, ពីទីក្រុងWashington ប្រែសម្រួលដោយវីនស្តុនរតនា
កើតមានកាលពីថ្ងៃព្រហស្បតិ៍មុន នៅរដ្ឋOklahoma TexasនិងKansas ខ្យល់ព្យុះកំបុតត្បូងបានបក់សន្សឹមៗឆ្ពោះទៅកាន់ទិសខាងកើត ពេញមួយចុងសប្តាហ៍ទើបកន្លងផុតទៅនេះ ដោយឆ្លងកាត់រដ្ឋMississippiនិងAlabamaជាទីដែលខ្យល់ព្យុះកំបុតត្បូងចំនួនប្រមាណជា២០ត្រូវបានសង្កេតឃើញ។ខ្យល់ព្យុះកំបុតត្បូងបានបញ្ចប់ដំណើររបស់វា នៅរដ្ឋការ៉ូលីនខាងជើងជាទីដែលវាបានបន្សល់ទុកអ្នករងគ្រោះចំនួនជាងពាក់កណ្តាល។
ពេញមួយចុងសប្តាហ៍ទើបកន្លងផុតទៅនេះ បណ្តាញទូរទស្សន៍អាមេរិកាំងនានាបានបណ្តាក់គ្នាផ្សាយជាបន្តបន្ទាប់រូបភាពដើមឈើរលើងឫស ដំបូលផ្ទះត្រូវបានខ្យល់បក់របើកកន្ត្រាក់កួចយកទៅបាត់គឺជារូបភាពវិនាសហិនហោចនិងសក្ខីកម្មសំដែងក្តីអស់សង្ឃឹម។នៅRaleighជារដ្ឋធានីនៃការ៉ូលីនខាងជើង ខ្យល់ព្យុះដ៏ខ្លាំងបែបនេះពុំត្រូវបានគេសង្កេតឃើញតាំងពីជាង២០ឆ្នាំមកហើយ។ស្រុកBertieដ៏តូចស្ថិតចម្ងាយប៉ុន្មានគីឡូម៉ែត្រពីឆ្នេរសមុទ្រ អាត្លង់ទិក មានអ្នករងគ្រោះស្លាប់ជាង១៣នាក់និងអ្នករងគ្រោះដេកពេទ្យរាប់សិបនាក់។
នៅថ្ងៃអាទិត្យល្ងាចមិញ ជនជាង៨ម៉ឺននាក់គ្មានអគ្គិសនីប្រើប្រាស់ នៅការ៉ូលីនខាងជើង។អាជ្ញាធរយល់ឃើញថា គេត្រូវការពេលប៉ុន្មានថ្ងៃទៀត មុននឹងស្ថានភាពប្រែត្រឡប់ជាធម្មតាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ