Human Rights Watch ៖"អគ្គលេខាធិការអសប មានជំហរទន់ជ្រាយនៅលើវិស័យការពារសិទ្ធិមនុស្ស”
អង្គការ ក្រៅរដ្ឋាភិបាល Human Rights Watch ដែលមានទីស្នាក់ការនៅ ទីក្រុង New york បានទិតៀនយ៉ាងចាស់ដៃ តុល្យាការការងារ នៅក្នុងវិស័យការពារសិទ្ធិមនុស្សរបស់លោកអគ្គលេខាធិការអសប Ban Ki-moon។ នៅក្នុងរបាយការណ៍ប្រចាំឆ្នាំមួយរបស់ខ្លួនកាលពីថ្ងៃចន្ទម្សិលមិញ អង្គការការពារសិទ្ធិមនុស្សនេះ បានបរិហារ អំពីគោលជំហរនយោបាយទន់ជ្រាយមួយនិងសហប្រតិបត្តិការរបស់លោក Ban Ki-moon នៅចំពោះមុខរបបផ្តាច់ការនានា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
លោក អគ្គលេខាធិការអសប បាន គីមូន ត្រូវបានគេប្រសិទ្ធនាមថាជា « បុរសដែលមើលមិនឃើញ »នៅរបៀងនៃទីស្នាក់ការ អសប។
របាយការណ៍របស់អង្គការ Human Rights បានគូសបញ្ជាក់ ថា សា្នដៃ របស់អគ្គលេខាធិការ អសបនៅ ក្នុងវិស័យការពារសិទ្ធិមនុស្ស បានធ្វើឲ្យមតិសាធារណៈមានការខកចិត្តគ្រប់ៗគ្នា។ លោក Philippe Bolopion នាយកអង្គការ Human Rights Watchនៅអសប បានបរិហារអំពី « ជម្រើសនយោបាយការទូតសម្ងំយកសុខរបស់លោកអគ្គ លេខាធិការ អសប »។ ពុំមែនជាវិធានការដ៏ស័ក្តិសិទ្ធិមួយទេ ក្នុងការដាក់គំនាប ទៅលើបណ្តារដ្ឋាភិបាលខ្លះដែលប្រើអំណាចផ្តាច់ការនៅក្នុងប្រទេស ។
ជាពិសេស រដ្ឋាភិបាល នៅប្រទេសសេរីលង្កា ភូមា និងប្រទេសចិន។ ចំពោះប្រទេសចិនវិញ អង្គការ Human Rights Watch បានសម្តែងការសោកស្តាយយ៉ាងខ្លាំង ចំពោះភាពស្ងាត់ស្ងៀមរបស់លោក បានគីមូន នៅឱកាសជួបប្រាស្រ័យជាមួយលោកប្រធានាធិបតីចិន ហ៊ូ ជិនតាវ ស្តីពីបញ្ហាសិទ្ធិមនុស្សនៅក្នុងប្រទេសចិន និងស្តីពី ករណីរបស់លោក Luy Xiaobo ដែលជាអ្នកប្រឆាំងរបបកុម្មុយនិស្តចិននិងជាជ័យលាភីរង្វាន់ណូបែលសន្តិភាពឆ្នាំ២០១០។ « ការខកខានមិនលើកនិយាយអំពីបញ្ហាសិទ្ធិមនុស្សនៅក្នុងប្រទេសចិន នៅឱកាសដំណើរទស្សនកិច្ចដ៏សំខាន់របស់លោកបានគីមូននេះ បានជំរុញ ឲ្យបណ្តាអ្នកការពារសិទ្ធិមនុស្សនៅក្នុងប្រទេសចិន មានការខកចិត្តខ្លាំងណាស់។
យោងតាម អង្គការ Human Rights Watch « លោក បាន គីមូន ពុំបានបំពេញភារកិច្ចរបស់ខ្លួនឲ្យបានដិតដល់និងស័ក្តិសមទេ ក្នុងឋានៈលោកជាអគ្គលេខាធិការអសប អាណាព្យាបាលលើពិភពលោក »។
ផ្ទុយទៅវិញ អង្គការ Human Rights Watch បានផ្តល់ ពិន្ទុល្អមួយដែរឲ្យលោកបាន គីមូន ចំពោះ ការសន្យានិងសេចក្តីថ្លែងការណ៍របស់លោកយ៉ាងម៉ឺងម៉ាត់ស្តីពី វិបត្តិនៅក្នុងប្រទេសកូត ឌីវ័រ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ