បវេសនកាលនយោបាយនៃរដ្ឋសភាថ្មី
អ្នកតំណាងរាស្ត្រទាំង៤៣៥រូបនិងសមាជិកព្រឹទ្ធសភាចំនួន១/៣ត្រូវបាន ផ្លាស់ថ្មី នៅដើមខែវិច្ឆិកាឆ្នាំទៅ២០១០។ឥឡូវ គណបក្សសាធារណរដ្ឋជាគណបក្សប្រឆាំងមានអាសនៈភាគច្រើននៅសភាជាន់ទាប ។ ពួកអ្នកប្រជាធិបតេយ្យរបស់លោកបារ៉ាក អូបាម៉ានៅតែកាន់ក្តាប់ព្រឹទ្ធសភា ប៉ុន្តែមានអាសនៈភាគច្រើនលើសពួកអ្នកសាធារណរដ្ឋតែបន្តិចបន្តួច ប៉ុណ្ណោះ។បវេសនកាលលើកនេះច្បាស់ជានឹងមានការប្រឈមមុខគ្នាខាង នយោបាយដ៏ច្រើន។
ចុះផ្សាយនៅថ្ងៃ៖
សេចក្តីរាយការណ៍របស់ Raphaël REYNES ពីវ៉ាស៊ីនតោន ប្រែសំរួលដោយ វីនស្តុន រតនា
ការតស៊ូមតិជុំវិញកំណែទម្រង់ប្រព័ន្ធសុខាភិបាលនឹងចាប់ផ្តើមចាប់ពីថ្ងៃ១២មករាទៅ។គឺនៅថ្ងៃនោះឯងដែលពួកអ្នកតំណាងរាស្ត្រសាធារណរដ្ឋមានបំណងនឹងបោះឆ្នោតលុបចោលអត្ថបទគម្រោងច្បាប់ដែលគេយល់ឃើញថា នឹងធ្វើឱ្យរដ្ឋចាយវាយប្រាក់ថវិកាច្រើនណាស់ហើយនិងបំផ្លាញការងារ។ប៉ុន្តែពួកអ្នកសាធារណរដ្ឋជាពួកអ្នកប្រឆាំងគន់គិតនឹងប្រឆាំងជំទាស់អ្វីៗទៀតខ្លាំងជាងនេះទៅទៀត។
មេដឹកនាំថ្មីនៃពួកអ្នកតំណាងរាស្ត្រសាធារណរដ្ឋភាគច្រើន នៅសភាអ្នកតំណាងគឺលោកEric Cantorបានអះអាងនៅថ្ងៃ៤មករាម្សិលមិញថា គណបក្សគាត់នឹងដាក់ជូនសភាពិនិត្យអត្ថបទច្បាប់មួយរាល់សប្តាហ៍ ដើម្បីវាយប្រហារទៅលើប្រាក់ចំណាយរបស់សហព័ន្ធ។ថវិការបស់កងទ័ពនិងប្រាក់ចំណាយទៅលើដំណើរការប្រព្រឹត្តទៅនៃរដ្ឋសភាក៏ជាទីដៅនៃការវាយប្រហាររបស់ពួកអ្នកសាធារណរដ្ឋដែរ។
ពួកអ្នកប្រជាធិបតេយ្យដែលខឹងក្តៅក្រហាយបាននិយាយអំពី” ឆាកល្ខោននយោបាយ “ ។មុននឹងបោះបង់ចោលកន្លែងខ្លួនជាប្រធានសភាអ្នកតំណាង លោកស្រីNancy Pelosi នៅថ្ងៃអង្គារម្សិលមិញ បានដៀលត្មះរាល់ឆន្ទៈចង់លុបចោលកំណែទម្រង់ប្រព័ន្ធសុខាភិបាល។លោកស្រីជាមេកើយសែនអប្រជាប្រិយនៃពួកអ្នកតំណាងរាស្ត្រប្រជាធិបតេយ្យបានរំលឹកប្រាប់ថាអត្ថបទគម្រោងច្បាប់បានអនុញ្ញាត ជាអាទិ៍ ឱ្យបង្កើត “ ធម្មនុញ្ញនៃសិទ្ធិអ្នកជម្ងឺ “ ។ធម្មនុញ្ញនេះនឹងត្រូវរលាយសាបសូន្យ ប្រសិនបើអត្ថបទគម្រោងច្បាប់ទាំងមូលនឹងត្រូវលុបចោល។
នៅក្នុងយន្តហោះដែលគាត់ជិះវិលត្រឡប់ពីកោះហាវ៉ៃមកវិញ លោកបារ៉ាក អូបាម៉ាបានស្តីបន្ទោសពួកអ្នកប្រឆាំងគឺពួកអ្នកសាធារណរដ្ឋដែលតាមប្រសាសន៍របស់គាត់ត្រូវតែ” យល់ថា ពួកគេនឹងមានពេលគ្រប់គ្រាន់ ដើម្បីធ្វើយុទ្ធនាការឃោសនាបោះឆ្នោតជ្រើសរើសប្រធានាធិបតីនៅឆ្នាំ២០១២ “ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ