លោកTom Donilon ជាទីប្រឹក្សាសន្តិសុខជាតិថ្មីរបស់លោកបារ៉ាក អូបាម៉ា
លោក Tom Donilonជាទីប្រឹក្សាសន្តិសុខជាតិថ្មីរបស់លោកប្រធានាធិបតីបារ៉ាក អូបាម៉ាជំនួសនិងបន្តពីលោកឩត្តមសេនីយ James Jonesដែលបានសុំលាឈប់ពីមុខតំណែងនេះ។ គឺប្រាកដជាសញ្ញាមួយដែលចង្អុលបង្ហាញថា ស.រ.អា.ចង់ពន្លឿនការចាកចេញនៃកងទ័ពរបស់ខ្លួនពីអាហ្វហ្កានិស្តង់។ទីប្រឹក្សាថ្មីរបស់លោកបារ៉ាក អូបាម៉ាទទួលបន្ទុកខាងសន្តិសុខជាតិ ត្រូវគេស្គាល់ថាមានទស្សនៈយល់ឃើញ មិនជឿថាស.រ.អា.អាចនឹងឈ្នះសង្គ្រាមនៅអាហ្វហ្កានិស្តង់នោះទេ។លោកTom Donilon ជាញាតិម្នាក់និងថែមទាំងជាអ្នកស្និទ្ធស្នាលម្នាក់របស់លោកប្រធានាធិបតីទៀតផង។
ចុះផ្សាយនៅថ្ងៃ៖
សេចក្តីរាយការណ៍របស់ Jean-Louis POURTET ពីទីក្រុង Washingtonដែលប្រែសម្រួលដោយ វីនស្តុន រតនា
លោកTom Donilon បានចូលប្រឡូកក្នុងឆាកនយោបាយ ជំនាន់លោកអតីតប្រធានាធិបតីJimmy Carter។កាលណោះ គាត់រ៉ាប់រងទំនាក់ទំនងរវាងសេតវិមាននិងរដ្ឋសភា។ក្នុងអំឡុងពេលប៉ុន្មានសិបឆ្នាំក្រោយមក គាត់នៅតែបន្តដើរតួនាទីមួយ នៅក្នុងផ្ទៃគណបក្សប្រជាធិបតេយ្យ។នៅពេលដែលលោកBill Clinton ជាប់ឆ្នោតជាប្រធានាធិបតី គាត់ក្លាយជានាយខុទ្ទកាល័យរបស់លោករដ្ឋមន្ត្រីក្រសួងការបរទេស Warren Christopher។បន្ទាប់មក គាត់ប្រកបមុខរបរគាត់ជាមេធាវីឡើងវិញ។
ដូចដែលទិនានុប្បវត្តិហិរញ្ញវត្ថុWall Street Journal រំលឹកប្រាប់ដោយវៀចវេរថា លោក Tom Donilon ពីឆ្នាំ ១៩៩៩ មកដល់ឆ្នាំ ២០០៥ បានធ្វើជាអនុប្រធាននៃមហាក្រុមហ៊ុនដ៏ធំមួយឈ្មោះ Fannie Mae ខាងផ្តល់ឥណទានដែលហុចសិទ្ធិឲ្យកាន់កាប់របស់ដាក់បញ្ចាំ គឺ ក្រុមហ៊ុននេះហើយដែលទទួលខុសត្រូវចំពោះវិបត្តិអចលនទ្រព្យ។ នៅឆ្នាំ២០០៧ គាត់បានមកចូលរួមជាមួយលោក Barack Obama ដើម្បីជួយលោក Obama ឲ្យជាប់ឆ្នោត។ ដោយជ្រើសរើសលោក Tom Donilon ជាអ្នកស្នងតំណែងបន្តពីលោក Jim Jones លោកប្រធានាធិបតី ជាជាងហៅមនុស្សថ្មីមក បែរជាបានជ្រើសរើសសហការីម្នាក់ដែលបានស្ថិតក្នុងចំណោមពួកអ្នកស្និទ្ធស្នាលនឹងគាត់។
ទីប្រឹក្សាថ្មីខាងសន្តិសុខជាតិមានមតិយល់ឃើញដូចលោក Obama ថាត្រូវតែដកខ្លួនថយចេញពី Afghanistan ឲ្យបានឆាប់រហ័សបំផុតតាមលទ្ធភាពអាចធ្វើទៅបាន។ គាត់បានគាំទ្រពេញទីផែនការដកកងទ័ពអាមេរិកាំងចេញពី Afghanistan ចាប់ពីខែកក្កដាឆ្នាំក្រោយ២០១១។ ជាអ្នកជំនាញការដ៏ប្រសប់ខាងកិច្ចការបរទេស លោក Tom Donilon ក៏ជាអ្នកប៉ិនប្រសប់ឆាប់យល់ដឹងខាងកិច្ចការនយោបាយផងដែរ។ ដូច្នេះ គាត់អាចនឹងអនុលោមការទូតអាមេរិកាំងឲ្យត្រូវនឹងសេចក្តីត្រូវការខាងបញ្ហាបោះឆ្នោតរបស់លោកប្រធានាធិបតីដែលគាត់ជាត្រចៀក។
គាត់ មានអារម្មណ៍ នៅសេតវិមានដូចជានៅផ្ទះខ្លួន ។ ប្រពន្ធគាត់ឈ្មោះ Catherine ពុំស្ថិតនៅឆ្ងាយណាស់ពីគាត់ទេ គឺ ថា ប្រពន្ធគាត់ ធ្វើជានាយខុទ្ទកាល័យនៃភរិយារបស់លោកអនុប្រធានាធិបតី Joe Biden៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ