អតីតចុងភៅរបស់ Ben Laden បានត្រូវកាត់ទោសឲ្យជាប់គុក១៤ឆ្នាំ
នៅថ្ងៃពុធទី១១សីហាឆ្នាំ២០១០ តុលាការសឹកនៅមូលដ្ឋានយោធាGuantanamoបានកាត់ទោសឲ្យអតីតចុងភៅរបស់Ben Ladenជាប់គុក១៤ឆ្នាំ។ នេះជាការកាត់សេចក្តីលើកទីមួយហើយ ចាប់តាំងពីលោកបារ៉ាក់អូបាម៉ាបានឡើងមកកាន់តំណែងជាប្រធានាធិបតីអាមេរិកនៅខែមករាឆ្នាំ២០០៩។លោកអូបាម៉ាចង់បិទមូលដ្ឋានយោធាGuantanamo ក៏ប៉ុន្តែមានការប្រឆាំងពីសំណាក់សភាអាមេរិក។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
អតីតចុងភៅរបស់Ben Ladenឈ្មោះIbrahim al-Qosiជាជនជាតិស៊ូដង់បានត្រូវតុលាការសឹកនៅមូលដ្ឋានយោធាGuantanamoកាត់ទោសឲ្យជាប់គុក១៤ឆ្នាំ។ ក៏ប៉ុន្តែIbrahim al-Qosiអាចជាប់ពន្ធនាគារដោយមានរយៈកាលខ្លីជាងនេះ ហើយនិងអាចត្រូវបញ្ជូនឲ្យវិលត្រឡប់ទៅប្រទេសស៊ូដង់វិញផងទៀត។ នៅដើមខែកក្កដាកន្លងទៅអតីតចុងភៅរបស់Ben Ladenបានទទួលស្គាល់ថា ខ្លួនបានគាំទ្រភេរវនិយមដោយបានជួយផ្តល់គ្រឿងសម្ភារៈឲ្យពួកអាល់កៃដា។
គួរកត់សម្គាល់ថា កិច្ចព្រមព្រៀងរវាងអតីតចុងភៅរបស់Ben Ladenឈ្មោះIbrahim al-Qosiនិងរដ្ឋាភិបាលអាមេរិកក្នុងការទទួលស្គាល់ទោសកំហុសនេះគឺជារឿងសម្ងាត់។ ហើយគេពុំអាចដឹងឡើយថា តើIbrahim al-Qosiនឹងត្រូវឋិតនៅក្នុងគុកប៉ុន្មានឆ្នាំទៀតឡើយ។ ពាក់ព័ន្ធនឹងបញ្ហានេះ មេធាវីរបស់Ibrahim al-Qosiបានថ្លែងប្រាប់ថា ការឃុំឃាំងនៅក្នុងគុកនៅមូលដ្ឋានយោធាGuantanamoមានលក្ខខណ្ឌសែនលំបាក បើប្រៀបធៀបទៅនឹងពន្ធនាគារអាមេរិកាំងដទៃទៀត ដោយហេតុថា អ្នកជាប់ពន្ធនាគារនៅGuantanamoគ្មានសិទ្ធិនឹងទទួលជួបបងប្អូនឬមិត្តភក្តិឡើយ។ ហើយម៉្យាងទៀតIbrahim al-Qosiបានត្រូវគេឃុំឃាំងខ្លួនអស់រយៈពេលជាង៨ឆ្នាំរួចមកហើយ។
អតីតចុងភៅរបស់Ben Ladenបានត្រូវគេចាប់ឃាត់ខ្លួននៅខែធ្នូឆ្នាំ២០០១។ Ibrahim al-Qosiបានសារភាពប្រាប់ថា ខ្លួនបានចាកចេញពីប្រទេសស៊ូដង់នៅឆ្នាំ១៩៩៦ដើម្បីតាមBen Ladenទៅប្រទេសអាហ្វហ្កានីស្តង់។ ហើយនៅទីនោះហើយដែល Ibrahim al-Qosiបានក្លាយទៅជាមេចុងភៅរបស់Oussama Ben Laden ហើយបានទាំងទទួលស្គាល់ថា បានជួយឲ្យមេអាល់កៃដារត់គេចផុតពីការតាមដេញចាប់របស់កងកម្លាំងអាមេរិកាំងនៅភ្នំTora Bora។
ដូច្នេះប្រធាននៃគណៈកម្មការយោធាអាមេរិកនៅមន្ទីរប៉ង់តាហ្កូនត្រូវទទួលយល់ព្រមតាមការកាត់សេចក្តីរបស់តុលាការសឹកនៅមូលដ្ឋានយោធាGuantanamo។ ក៏ប៉ុន្តែចៅក្រមយោធាម្នាក់ទទួលបន្ទុកសំណុំរឿងIbrahim al-Qosiនេះបានសម្ដែងឲ្យដឹងពីការទើសទាល់ ដោយហេតុតែលក្ខខណ្ឌនៃការឃុំឃាំង Ibrahim al-Qosiមានកង្វះលក្ខណៈគតិយុត្ត ពីព្រោះបើយោងតាមច្បាប់អាមេរិកាំង អ្នកដែលបានត្រូវគេកាត់ទោសហើយជាប់ឃុំឃាំងខ្លួន ត្រូវគេដាក់ឲ្យឋិតនៅដាច់ឆ្ងាយពីអ្នកជាប់ចោទដទៃទៀត។ ក៏ប៉ុន្តែកិច្ចព្រមព្រៀងរវាងIbrahim al-Qosiនិងរដ្ឋាភិបាលបានគ្រោងឃុំខ្លួនIbrahim al-Qosiនៅជំរំលេខ៤នៃមូលដ្ឋានយោធាGuantanamo ដែលនៅទីនោះ Ibrahim al-Qosiនឹងមានការរួមរស់ជាប្រចាំថ្ងៃជាមួយអ្នកជាប់ចោទនិងជាប់ឃុំដទៃទៀតជាច្រើនម៉ោងក្នុង១ថ្ងៃៗ។ ចៅក្រមយោធាទទួលបន្ទុកសំណុំរឿងIbrahim al-Qosiបានទុកពេល៦០ថ្ងៃឲ្យក្រសួងមានសមត្ថកិច្ចអាមេរិកាំងដោះស្រាយពីបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ