Venezuelaផ្តាច់ទំនាក់ទំនងទូតជាផ្លូវការជាមួយColombie
លោកប្រធានាធិបតីVenezuela Hugo Chavezបានប្រកាសនៅថ្ងៃព្រហស្បតិ៍នេះឲ្យដឹងពីការផ្តាច់ទំនាក់ទំនងទូតជាផ្លូវការជាមួយColombieដែលជាប្រទេសជិតខាង។ ដោយបានប្រកាសដាក់យោធារបស់ខ្លួនឲ្យឋិតនៅក្រោមភាពអាសន្ន ក្រោយពីមានការចោទប្រកាន់របស់ប្រទេសColombieថា បច្ចុប្បន្ននេះមេដឹកនាំឧទ្ទាមColombieមានវត្តមាននិងមានសកម្មភាពនៅប្រទេសVenezuela។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
លោកប្រធានាធិបតីVenezuela Hugo Chavezបានប្រកាសពីវិមានប្រធានាធិបតីMirafloresថា « ខ្ញុំធ្វើសេចក្តីប្រកាសទាំងតឹងតែងចិត្តថា ប្រទេសVenezuelaផ្តាច់ទំនាក់ទំនងទូតជាផ្លូវការជាមួយប្រទេសColombieចាប់ពីពេលនេះទៅ »។ មួយម៉ោងកន្លះក្រោយមកលោកប្រមុខការទូតVenezuelaបានប្រកាសទុកពេល៧២ម៉ោងឲ្យអ្នកការទូតColombieបិទទ្វារស្ថានទូតរបស់ខ្លួននិងចាកចេញពីទីក្រុងបូហ្កូតា។
ចំណែកឯឯកអគ្គរដ្ឋទូតកូឡុំប៊ីនៅអង្គការនៃរដ្ឋអាមេរិកOEAវិញ បានបរិហាថា ការផ្តាច់ទំនាក់ទំនងទូតជាផ្លូវការរបស់ប្រទេស Venezuelaនេះជាសេចក្តីសម្រេចចិត្តពុំត្រឹមត្រូវ។ ហើយបានទាំងទាមទារឲ្យប្រទេសVenezuelaផ្តាច់ទំនាក់ទំនងជាមួយក្រុមឧទ្ទាមColombie១ ៥០០នាក់ដែលមានវត្តមាននៅ ប្រទេសVenezuelaផងទៀត។
រីឯលោកប្រធានាធិបតីVenezuela Hugo Chavezវិញ បានទម្លាក់ការទទួលខុសត្រូវនៃវិបត្តិនេះទៅលើលោកប្រធានាធិបតីផុតអាណត្តិកូឡុំប៊ីAlvaro Uribeដែលត្រូវចាកចេញពីមុខតំណែងនៅថ្ងៃទី៧សីហាខាងមុខនេះ។ ក៏ប៉ុន្តែលោក Hugo Chavezនៅមានការទុកចិត្តទៅលើសុឆន្ទៈរបស់លោកJuan Manuel Santosដែលត្រូវទទួលស្នងតំណែងពីលោក Alvaro Uribe។
លោកអគ្គលេខាធិការនៃអង្គការរដ្ឋអាមេរិកOEAឯណោះបានប្រកាសអំពាវនាវឲ្យភាគីទាំងពីររក្សាភាពស្ងប់ស្ងៀម។ ទីក្រុងវ៉ាស៊ីនតោនវិញយល់ថា ការផ្តាច់ទំនាក់ទំនងទូតជាផ្លូវការជាមួយColombieដែលបានប្រកាសឲ្យដឹងដោយលោកប្រធានាធិបតីVenezuelaHugo Chavezនៅថ្ងៃព្រហស្បតិ៍នេះជាការពុំសមរម្យឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ