ជំនួបកំពូលស្តីពីថាមពលនិងអាកាសធាតុនៅWashington
អ្នកតំណាងប្រទេសដែលមានសេដ្ឋកិច្ច ខ្លាំង នៅលើពិភពលោករួមប្រជុំគ្នា នៅថ្ងៃចន្ទនេះនិងថ្ងៃអង្គារស្អែក នៅWashington ដើម្បីនិយាយអំពីថាមពលស្អាតស្អំនិងសាកល្បងនិយាយឲ្យចុះសម្រុងគ្នា ស្តីពីសន្ធិសញ្ញាថ្មីមួយដើម្បីប្រយុទ្ធទល់នឹងការឡើងកំដៅអាកាស ធាតុនៅលើភពផែនដី។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
រដ្ឋមន្ត្រីក្រសួងថាមពលនិងអ្នកទទួលខុសត្រូវជាន់ខ្ពស់នៃ២១ប្រទេសគឺអូស្ត្រាលី ប្រេស៊ីលអង់គ្លេស កាណាដា ចិន ដាណឺម៉ាក ហ្វាំងឡង់ដឺ៍ បារាំង អាល្លឺម៉ង់ ឥណ្ឌា អ៊ីតាលី ជប៉ុន ម៉ិចស៊ិក ណ័រវែស រុស្ស៊ី កូរ៉េខាងត្បូង អេស្ប៉ាញ អាហ្វ្រិកខាងត្បូង ស៊ុយអេដ អេមៀរ៉ាអារ៉ាបរួមនិងសហរដ្ឋអាមេរិក នឹងរួមប្រជុំគ្នា នៅWashington ស្របតាមការអញ្ជើញរបស់រដ្ឋការលោកបារ៉ាក អូបាម៉ា ប្រកបដោយគោលដៅជាអាទិភាពគឺការបង្កើតការងារក្នុងវិស័យបរិស្ថាន។
ក្រសួងថាមពលអាមេរិកាំងបានបញ្ជាក់ប្រាប់ថា ជំនួបនេះគឺជាឱកាសអាចឲ្យប្រកាសអំពីដើមគំនិតរួមគ្នាពីខាងបណ្តាប្រទេសប្រកបដោយសេដ្ឋកិច្ចរីកលូតលាស់ខ្លាំងដែលផលិតបានផលិតផលសរុបក្នុងប្រទេសបានចំនួន៨០%នៅលើពិភពលោកនិងដែលបានខ្វែងមតិស្តីពីបញ្ហាចុះកិច្ចព្រមព្រៀងមួយជាយថាហេតុស្ដីពីការឡើងកំដៅនៃអាកាសធាតុ នៅពេលដែលបណ្តាប្រទេសរីកលូតលាស់ខ្លាំងទាមទារឲ្យមានការជាប់ពាក់ព័ន្ធច្បាស់លាស់ពីខាងបណ្តាប្រទេសរីកចម្រើនថ្មីខាងឧស្សាហកម្មដូចយ៉ាងប្រទេសចិនក្នុងការកម្រិតការបញ្ចេញឧស្ម័នពុលកាបូនិកធ្យូងរបស់ខ្លួនដែលធ្វើឲ្យសីតុណ្ហភាពឡើងក្តៅនៅលើភពផែនដី។
ថាមពលស្អាតស្អំត្រូវចាត់ទុកជាវិស័យមួយប្រកបដោយផលប្រយោជន៍រួម។ លោកប្រធានាធិបតីអូបាម៉ាបានចុះហត្ថលេខាលើផែនការ៥ឆ្នាំមួយថ្លៃ១៥០លានដុល្លារនៅឆ្នាំទៅនៅឱកាសបំពេញទស្សនកិច្ចនៅប្រទេសចិន ដើម្បីសហប្រតិបត្តិការជាមួយរដ្ឋការប៉េកាំងជាអាទិ៍ក្នុងវិស័យយានយន្តដើរដោយចរន្តអគ្គិសនី។
តាមមតិលោករដ្ឋមន្ត្រីក្រសួងពាណិជ្ជកម្មអាមេរិកាំងGary Locke ថ្លែងនៅសេតវិមាននៅថ្ងៃសុក្រមុនថា” ការរីកលូតលាស់នៃថាមពលស្អាតស្អំនិងបច្ចេកវិទ្យាដើម្បីកែលំអប្រសិទ្ធិភាពខាងថាមពលអាចតំណាងឱកាសសេដ្ឋកិច្ចដ៏ធំបំផុតនៃសតវត្សរ៍ទី២១”។
ក្នុងចំណោមវិស័យប្រឈមមុខ អង្គជំនួបកំពូលនឹងលើកឡើងអំពីបទដ្ឋានប្រសិទ្ធិភាពខាងថាមពល ថាមពលបានមកពីពន្លឺព្រះអាទិត្យនិងពីកម្លាំងខ្យល់បក់ហើយនិងអំពីមធ្យោបាយផ្គត់ផ្គង់ថាមពលឲ្យទៅអ្នកដែលគ្មានវា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ