ខែមិថុនា ២០១០ ជាខែក្តៅបំផុតនៅលើភពផែនដី
ខែមិថុនាជាខែក្តៅបំផុត នៅលើភពផែនដី ចាប់តាំងពីមានសម្រង់សីតុណ្ហភាពមក ហើយសីតុណ្ហភាពជាមធ្យមពីខែមេសាមកខែមិថុនា មានកំរិតខ្ពស់បំផុតពុំដែលជួបប្រទះសោះ ស្របតាមការវាស់វែងរបស់ទីភ្នាក់ងារ មហាសាគរ និងបរិយាកាស អាមេរិកាំង ហៅកាត់ថា NOAA ចុះផ្សាយ នៅថ្ងៃព្រហស្បតិ៍ ១៥កក្កដា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
អាកាសធាតុក្តៅណាស់ នៅលើភពផែនដី។ ស្របតាមទិន្នន័យផ្តល់ដោយទីភ្នាក់ងារមហាសាគរនិងបរិយាកាសអាមេរិកាំង ហៅកាត់ថាNOAA ខែមិថុនាឆ្នាំ២០១០ គឺជាខែក្តៅបំផុតនៅក្នុងប្រវត្តិសម្រង់សីតុណ្ហភាពជាមធ្យមចាប់ធ្វើនៅឆ្នាំ១៨៨០។ សីតុណ្ហភាពកំរិត ១៦,២អង្សា គឺ ០,៦៨អង្សាលើសសីតុណ្ហភាពជាមធ្យមនៅសតវត្សទី២០ (ដែលមានកំរិតប្រមាណ ជា ១៥,៥អង្សា)។ ឃើញថាវាមានទំនងមិនជាអ្វីទេ ប៉ុន្តែបើគិតទៅលើភពផែនដីទាំងមូលវិញវាមានភាពខុសគ្នាខ្លាំង នៅតាមកន្លែងខ្លះសីតុណ្ហភាពជាមធ្យមមានកំរិតលើសពី ៤ ឬក៏រហូតដល់ទៅ៥អង្សាផង ដូចជាក្នុងករណីនៅភាគកណ្តាល និងភាគខាងកើតសហរដ្ឋអាមេរិក នៅប្រទេសប៉េរូ នៅភាគខាងកើត និងខាងលិចប្រទេសរុស្ស៊ី នៅម៉ុងហ្គោលី នៅភាគឦសាននៃប្រទេសចិន ឬក៏នៅហ្ក្រូអិនឡង់ ស្របតាមផែនទីដែលចុះផ្សាយដោយទីភ្នាក់ងារ NOAA ដែលយោងទៅលើ សីតុណ្ហភាពកំរិតជាមធ្យមចាប់តាំងពីឆ្នាំ១៩៧១មកទល់ឆ្នាំ២០០០។
មានតែភូមិភាគស្កង់ឌីណាវី ភាគខាងត្បូងប្រទេសចិន និងភាគពាយ័ព្យសហរដ្ឋអាមេរិក ឬក៏អេស្ប៉ាញប៉ុណ្ណោះ (ដែលមានសីតុណ្ហភាពកំរិតទាបបំផុតចាប់ពីឆ្នាំ១៩៩៧មក) ចៀសវាងសីតុណ្ហភាពក្តៅខ្លាំង។ មណ្ឌលទាំងនេះ បានជួបប្រទះរហូតដល់ទៅការស្រុតចុះសីតុណ្ហភាពបន្តិចទៀតផង។
មហាសាគរក៏ជួបប្រទះសីតុណ្ហភាព ល្អប្រសើរជាងមុនបន្តិចដែរ ដោយហេតុថាគឺជាខែមិថុនា ទីបូនប៉ុណ្ណោះដែលមាន សីតុណ្ហភាពក្តៅបំផុត ដែលមហាសាគរជួបប្រទះ (ជាមធ្យម ១៦,៤ អង្សា គឺមានកំរិត០,៥៤អង្សាលើកំរិតជាមធ្យម នៅសតវត្សទី២០)។ នៅលើដីគោក មានកំណើនកំរិត ១,០៧អង្សា បើប្រៀបធៀបទៅនឹងសតវត្សមុន។ គួរឲ្យកាន់តែព្រួយបារម្ភ ដ្បិតបាតុភូតមិនទំនងជាកើតមានទៀងពេលទេ។ ពីខែមេសា មកខែមិថុនា ២០១០ គឺជារយៈពេលក្តៅបំផុតមិនធ្លាប់ដែលជួបប្រទះ រីឯពីខែមករា មកទល់តែមិថុនាគឺជារយៈពេលទីពីរក្តៅបំផុត បន្ទាប់ពីឆ្នាំ ២០០៧មក។ ការឡើងកម្តៅនៃអាកាសធាតុ កាន់តែមានសភាពជាក់ស្តែងរៀងរាល់ឆ្នាំ។ នេះជាការកត់សម្គាល់ឃើញពុំសូវធ្វើឲ្យកក់ក្តៅក្នុងចិត្តប៉ុន្មានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ