Ipad ចាប់ផ្តើមមានលក់នៅក្រៅ ប្រទេសអាមេរិក នៅថ្ងៃទី ២៨ ឧសភា
ថ្ងៃទន្ទឹងរង់ចាំបានមកដល់ ហើយ សម្រាប់អ្នកដែលនិយមគាំទ្រ និងស្នេហាឧបករណ៍ Ipad របស់ក្រុមហ៊ុនអាមេរិកាំងApple។ ក្រៅពីទីផ្សារអាមេរិក Ipadបាន ចាប់ផ្តើមមានលក់ហើយ នៅក្នុងទីផ្សារអាស៊ី និងអឺរ៉ុប នៅថ្ងៃនេះ បន្ទាប់ពីត្រូវពន្យារពេលមួយខែដោយក្រុមហ៊ុន Apple។ ពន្យារពេលដោយមូលហេតុ មានតម្រូវការខ្ពស់ ខុសពីការព្រៀងទុក ក្នុងប្រទេសអាមេរិក។ ក្រុមចំណោមប្រទសអាស៊ី ទាំង ៩ដែលមានដាក់លក់ Ipad ប្រទេសជប៉ុន និងអូស្ត្រាលី នាំមុខគេខាងចំនួនបញ្ជាទិញ Ipad ដែលជាផលិតផល ចេញចុងក្រោយបំផុតរបស់ក្រុមហ៊ុនApple។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
នៅទីក្រុងតូក្បូ នៅថ្ងៃ សុក្រទី ២៨ ឧសភា នេះ មានមនុស្សក្មេងចាស់ ប្រុសស្រីជាង១២០០នាក់បានឈរតម្រង់ជួរ ចំងាយ ៨០០ម៉ែត្រ នៅមុខមជ្ឈមណ្ឌលពាណិជ្ជកម្ម។ ពួកគេម្នាក់ៗប្រាថ្នាចូលទិញ Ipad ឲ្យបាន នៅថ្ងែចាប់ផ្តើមលក់ដំបូងនេះ។ ក្នុងប្រទេសបារាំង គេប្រមាណថា មានមនុស្សជាង៤សែននាក់នឹងទិញ Ipad ក្នុងឆ្នាំ ២០១០នេះ។
អ្នកសិក្សាទីផ្សារទៅលើឧបករណ៍បច្ចេកវិទ្យាបានប៉ាន់ប្រមើលមើលថាចាប់តាំងពីពេលនេះ ដល់ចុងឆ្នាំ ម៉ាស៊ីន Ipadចំនួន ជាង៨លានគ្រឿងនឹងអាចលក់ដាច់ ក្នុងទីផ្សារពិភពលោក។ គ្រាន់តែក្នុងរយៈពេលជិតពីរខែរនេះពោលគឺចាប់តាំងពីការដាក់លក់ជាផ្លូវការកាលពីខែមេសាក្រុមហ៊ុន Apple ចេញលក់ Ipadបានជាងមួយលានគ្រឿងក្នុងប្រទេសអាមេរិក។
ដើម្បី ស្វែងយល់ពីមូលហេតុដែលធ្វើឲ្យមនុស្សនាំគ្នាសម្រុកទិញ Ipad គេត្រូវដឹងថា តើ Ipad ជាអ្វីសិន?
អ្នកនិយមបច្ចេកវិទ្យាទំនើបឲ្យតម្លែថាIpad គ្រាន់តែIphone ខ្នាតធំប៉ុណ្ណោះ។ Iphone នេះ ជាទូរស័ព្ទដៃដែលគេអាចយកទៅប្រើបានជាច្រើនមុខ ដូចជាសម្រាប់ថតរូប ស្តាប់ចំរៀង ចូលស្វែងរកព័ត៌មានក្នុងអ៊ិនធ័រណែត។
ចំណែក Ipad ដែលមានអេក្រង់ធំទំហំA 4 អាចឲ្យគេមើលរូបថតពណ៌ធម្មជាតិ និងចូលមើលកុន ទូរទស្សន៍ ស្តាប់វិទ្យុ ឬអានព័ត៌មានគ្រប់ប្រភេទដែលមាននៅក្នុងប្រព័ន្ធអ៊ិនធ័រណែត។ តាមរយៈកម្មវិធីជាច្រើនពាន់ដែលក្រុមហ៊ុន Appleបានស្ថាបនាឡើង Ipad ជាឧបករណ៍សម្រាប់ និងអាចឲ្យគេចូលលេងហ្គេម គ្រប់ប្រភេទ។ ម្យ៉ាងទៀត ដោយមានកិច្ចសន្យាជាមួយគ្រឹស្ថានបោះពុម្ពសៀវភៅ Ipad នេះបានក្លាយជាកូនសៀវភៅអេឡិចត្រូនិក។ គេបារម្ភថា វត្តមានរបស់ Ipad និងការរីកដុះដាលរបស់សៀវភៅអេឡិចត្រូនិចនឹងអាចធ្វើឲ្យសៀវភៅក្រដាសរលាយសាបសូន្យ។
ខុសពីសៀវភៅក្រដាស ធម្មតា Ipad ជាសៀវភៅដែលមានទំងន់ធ្ងន់។ គេវាយតម្លៃថា អ្នកនិយមការអាននឹងមិនសុខចិត្តយួរតាមខ្លួនគ្រប់ពេលនូវម៉ាស៊ីនមួយដែលមានទំងន់ ជាងកន្លះគីឡូក្រាម (៦៨០ក្រាម)នោះទេ។
ចំណុចខ្វះខាតមួយចំនួនទៀតដែលធ្វើឲ្យអ្នកនិយមប្រើគ្រឿងបច្ចេកវិទ្យា មានការសោកស្តាយ នោះគឺ Ipad ដែលជាផលិតផលសម្រិតសម្រាំងចុងក្រោយរបស់ក្រុមហ៊ុនApple មិនអាចឲ្យគេប្រើជាទូរស័ព្ទបានទេ។ Ipad មិនមានកាម៉េរ៉ា និងមិនអាចឲ្យគេប្រើប្រាស់កម្មវិធីផ្សេង ក្រៅពីកម្មវិធីដែលក្រុមហ៊ុនAppleបង្កើតឡើង។ មួយវិញទៀត គេត្រូវដឹងថា Ipadមិនមែនជាកំព្យូទ័រចល័តដូចគេបានរំពឹងទុកនោះទេ ព្រោះ Ipad មិនមានកម្មវិធី សម្រាប់វាយអត្ថបទ។
និយាយដោយសាមញ្ញ Ipad គ្រាន់តែឧបករណ៍មួយសម្រាប់ឲ្យគេមើល ស្តាប់ និងលេងហ្គេមប៉ុណ្ណោះ។ សម្រាប់អ្នកនិយមបច្ចេកវិទ្យា ការចំណាយលុយទិញ Ipadដែលមានតម្លៃចាប់ ពី៤៩៩ដុល្លារ ដល់៦៩៩ដុល្លារ ជារឿងមួយសមគួរ។ ប៉ុន្តែ អ្នកដែលមិនចង់ជ្រួលជ្រើមនឹងឧបករណ៍បចេ្ចកវិទ្យាចេញថ្មី និងមិនត្រូវការចាំបាច់ក្នុងអាជីពរបស់ខ្លួន ការចាយលុយជាច្រើនរយដុល្លារទៅលើបន្ទះអាលុយមីញ៉ូម តូចមួយ ជារឿងមួយដែលឥតប្រយោជន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ