អង្គការសហប្រជាជាតិថ្កោលទោសសហរដ្ឋអាមេរិក ពីរឿងទទួលស្គាល់ហ្សេរុយសាឡឹម
កាលពីថ្ងៃព្រហស្បតិ៍ទី ២១ ធ្នូ អង្គការសហប្រជាជាតិ បានបើកសម័យប្រជុំពិសេសមួយ ដើម្បីបោះឆ្នោត ធ្វើសេចក្តីសម្រេចចិត្តមួយ ដែលមានខ្លឹមសារស្តីបន្ទោស និងចោទប្រកាន់សហរដ្ឋអាមេរិក បន្ទាប់ពីរដ្ឋាភិបាលលោកដូណាល់ ត្រាំ បានទទួលស្គាល់ ទីក្រុងហ្សេរុយសាឡឹម ជារដ្ឋធានីរបស់អ៊ីស្រាអែល។ ប្រទេស១២៨ ក្នុងនោះមានប្រទេសធំៗនៅអឺរ៉ុប ដែលសុទ្ធតែជាសម្ព័ន្ធមិត្តរបស់អាមេរិក បានរួមគ្នា បោះឆ្នោតអនុម័តសេចក្តីសម្រេចចិត្ត ដែលមានខ្លឹមសារថ្កោលទោសសហរដ្ឋអាមេរិកនេះ បើទោះបីជាលោកដូណាល់ ត្រាំ បានគំរាមថានឹងផ្តាច់ជំនួយហិរញ្ញវត្ថុក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
សហរដ្ឋអាមេរិក ទើបតែឆ្លងកាត់ទិវាដ៏អាម៉ាសបំផុត បន្ទាប់ពីត្រូវបានអង្គការសហប្រជាជាតិបោះឆ្នោតអនុម័ត សេចក្តីសម្រេចចិត្តមួយ ដែលមានខ្លឹមសារថ្កោលទោសយ៉ាងធ្ងន់ធ្ងរ មកលើខ្លួន។ ការបោះឆ្នោតធ្វើសេចក្តីសម្រេចិត្ត ថ្កោលទោសសហរដ្ឋអាមេរិកនេះ គឺបន្ទាប់ពីលោកដូណាល់ ត្រាំ បានសម្រេចទទួលស្គាល់ ក្រុងហ្សេរុយសាឡឹម ជារដ្ឋធានីរបស់អ៊ីស្រាអែល កាលពីថ្ងៃទី៦ធ្នូកន្លងទៅ។
លទ្ធផលឆ្នោត បង្ហាញថាប្រទេស១២៨ ក្នុងចំណោមនោះមានមហាអំណាចធំៗនៅអឺរ៉ុប ដូចជាបារាំង និងអង់គ្លេស បានបោះឆ្នោតគាំទ្រសេចក្តីសម្រេចចិត្តនេះ។ ចំណែកអ្នកដែលបានបោះឆ្នោតប្រឆាំង មាន៩ប្រទេស ក្នុងនោះ គឺមានជាអាថទិ៍ សហរដ្ឋអាមេរិកខ្លួនឯងផ្ទាល់ និងអ៊ីស្រាអែល។ ចំណែក ប្រទេស៣៥ផ្សេងទៀត មានដូចជាកាណាដា មិចស៊ិក ប៉ូឡូញ ហុងគ្រី ជាដើម បានបោះឆ្នោតអនុបវាទ។
នៅចំពោះមុខអង្គសន្និបាទ អង្គការសហប្រជាជាតិ ក្រោយប្រកាសលទ្ធផលឆ្នោត លោកស្រី Nikki Haley អគ្គរដ្ឋទូតអាមេរិកប្រចាំអង្គការសហប្រជាជាតិ បានថ្លែងអរគុណ ប្រទេសទាំង៦៥ ដែលមិនបានបោះឆ្នោតគាំទ្រ ហើយលោកស្រី បានទាំងសន្យាថា នឹងកត់ឈ្មោះប្រទេសដែលបានបោះឆ្នោតគាំទ្រសេចក្តីសម្រេចចិត្តនេះ ទុកទាំងអស់ ។ ប្រមុខការទូតអាមេរិករូបនេះ បានថ្លែងថា ៖ “សហរដ្ឋអាមេរិក នឹងចងចាំថ្ងៃនេះជាប់ជានិច្ច ថា អង្គការសហប្រជាជាតិ ដែលអាមេរិកតែងតែផ្តល់វិភាគទានឲ្យច្រើនជាងគេ បានធ្វើសេចក្តីសម្រេចចិត្ត ថ្កោលទោសសហរដ្ឋអាមេរិក”។
ដោយឡែក នៅមុនថ្ងៃបោះឆ្នោតមួយថ្ងៃ លោកដូណាល់ ត្រាំ បានសរសេរសារ លើទំព័រTwitter ថា៖ “អង្គការសហប្រជាជាតិយកលុយអាមេរិកទៅចាយ មួយឆ្នាំៗរាប់រយលានដុល្លារ តែបែជាបោះឆ្នោតស្តីបន្ទោសអាមេរិកទៅវិញ”។ លោកត្រាំគំរាមថា៖ “ចង់ថ្កោលទោសអីក៏ថ្កោលចុះ តែចាប់ពីពេលនេះទៅ អាមេរិក នឹងសន្សំលុយទុកវិញប្រសើរជាង”។
គួរបញ្ជាក់ថាខ្លឹមសារជារួម នៃសេចក្តីសម្រេចចិត្តនេះ គឺបានថ្កោលទោស ដល់ការទទួលស្គាល់ក្រុងហ្សេរុយសាឡឹម ពីសំណាក់រដ្ឋាភិបាលអាមេរិក។ សម្រាប់អង្គការសហប្រជាជាតិ លក្ខខន្តិកៈនៃក្រុងហ្សេរុយសាឡឹម ត្រូវតែឆ្លងកាត់ការចរចាសន្តិភាព ទ្វេរភាគី រវាងអ៊ីស្រាអែល និងប៉ាឡេស្ទីន ទើបជារឿងយុត្តិធម៌ និងមានសមភាព។
លោកប្រធានាធិបតីតួកគី បានចេញមុខមកអំពាវនាវថា កុំឲ្យសហគមន៍អន្តរជាតិ ខ្លាចរអានឹងអំណាចទឹកលុយដុល្លារ របស់សហរដ្ឋអាមេរិកឲ្យសោះ។ រីឯលោក Mahmoud Abbas ប្រមុខដឹកនាំប៉ាឡេស្ទីន បានអបអរនឹងសេចក្តីសម្រេចចិត្តរបស់អង្គការសហប្រជាជាតិនេះ បើទោះបីជាវាគ្មានកម្លាំងគតិយុត្តិចាប់បង្ខំក៏ដោយ។ តែយ៉ាងណា វាបង្ហាញថា សហគមន៍អន្តរជាតិ បានយល់ បានដឹង បានឮពីការតស៊ូស្វែងរកយុត្តិធម៌ របស់ប្រជាជនប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ