Donald Trump និង Hilary Clinton ចាញ់ទាំងពីរនាក់នៅរដ្ឋWisconsin
ការបោះឆ្នោតជ្រើសរើសបេក្ខជនប្រធានាធិបតី នៅក្នុងគណបក្សទាំងពីររបស់សហរដ្ឋអាមេរិក កំពុងតែប្រព្រឹត្តិទៅយ៉ាងក្តៅគគុក ហើយដែលស្ថានភាពហាក់កំពុងតែប្រែប្រួល ដោយសារបេក្ខជនពីររូបដែលគេសង្ឃឹមខ្លាំងជាងគេ គឺលោកស្រី ហ៊ីឡារី គ្លីនតុន និងលោកដូណាល់ ទ្រុម្ភ បានបរជ័យទាំងពីរនាក់នៅរដ្ឋ វីសខុនស៊ិន កាលពីថ្ងៃអង្គារទី៥ មេសា។ ជ័យលាភីក្នុងរដ្ឋនេះ បានទៅលោក ធេត គ្រូស ខាងគណបក្សសាធារណរដ្ឋ និងខាងគណបក្សប្រជាធិបតេយ្យ បានទៅលើលោកប៊ែរនី ស៊ែនឌើស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
លទ្ធផលបោះឆ្នោតបឋមដើម្បីជ្រើសរើសបេក្ខជនប្រធានាធិបតី ក្នុងបក្សទាំងពីរ នៅរដ្ឋវីសខុនស៊ិន បានបង្ហាញពីភាពប្រែប្រួលថ្មីនៅក្នុងលទ្ធផលរួម។ លោកមហាសេដ្ឋីសក់ក្រហម ដូណាល់ ទ្រុម្ភ ដែលជាគូប្រជែងជាមួយលោក ធេត គ្រូស នៅក្នុងគណបក្សសាធារណរដ្ឋ បានចាញ់យ៉ាងដំណំនៅក្នុងរដ្ឋវីសខុនស៊ិននេះ ដោយបានទទួលសម្លេងឆ្នោតតែ៣៥% ទល់នឹង៤៨,៣%។ លទ្ធផលនេះ បានធ្វើឲ្យលោក ធេត គ្រូស ប្រមូលយកអ្នកបោះឆ្នោតតំណាង សឹងតែទាំងអស់ ដែលមាននៅក្នុងរដ្ឋនេះ។ ចំណែកលោកស្រីហ៊ីលឡារីគ្លីនតុនវិញ ដែលប្រជែងជាមួយនឹងលោក ប៊ែរនី ស៊ែនឌើស នៅក្នុងគណបក្សប្រជាធិបតេយ្យវិញ ក៏បានចាញ់ដែរ នៅក្នុងរដ្ឋវិសខុនស៊ិន កាលពីម្សិលមិញ។
ជាមួយនឹងលទ្ធផលថ្មីនេះ លោក ធេត គ្រូស នឹងបានអ្នកបោះឆ្នោតតំណាង ចំនួន៥១០សម្លេង។ តែចំនួននេះនៅតែដាច់ចាញ់ឆ្ងាយ នឹងលោកដូណាល់ ទ្រុម្ភ ដែលបានសម្លេងអ្នកបោះឆ្នោតតំណាងចំនួន៧៤៣។ តែយ៉ាងណាក៏ដោយ លោក ធេត គ្រូស បានធ្វើការប្រកាសថា លោកនឹងព្យាយាមយកឈ្នះឲ្យបាន នៅក្នុងរដ្ឋផ្សេងៗទៀត ដើម្បីកុំឲ្យលោក ដូណាល់ ទ្រុម្ភ រកបានសម្លេងឆ្នោតដាច់ខាត ចំនួន១២៣៧សម្លេង។
សូមបញ្ជាក់ថា បើលោកដូណាល់ ទ្រុម្ភ បានសម្លេងនេះគ្រប់ មានន័យថាគាត់នឹងក្លាយជាបេក្ខជនប្រធានាធិបតីរបស់គណបក្សសាធារណរដ្ឋដោយស្វ័យប្រវត្តិ។ តែបើមិនគ្រប់ទេ អ្វីៗនឹងសម្រេចទៅដោយការបោះឆ្នោតរួមរបស់អ្នកបោះឆ្នោតតំណាងទាំងអស់ នៅក្នុងខែកក្កដាខាងមុខនេះ។ តាមការវិភាគ អ្វីៗអាចទៅរួចទាំងពីរផ្លូវ គឺលោកដូណាល់ ទ្រុម្ភ អាចបានសម្លេងគ្រប់ រឺអាចខ្វះបន្តិចបន្តួច ព្រោះមាននៅសល់រដ្ឋជាច្រើនទៀត ដែលមិនទាន់បោះឆ្នោត ជាពិសេសដូចជារដ្ឋកាលីហ្វ័រញ៉ា ដែលនឹងត្រូវបោះឆ្នោតចុងក្រោយគេ ថ្ងៃទី៧ ខែមិថុនា។
ចំណែកនៅខាងគណបក្សប្រជាធិបតេយ្យវិញ ថ្វីបើជាមួយនឹងបរាជ័យថ្មីនៅរដ្ឋវីសខុនស៊ិន របស់លោកស្រីហ៊ីឡារី គ្លីនតុន នាពេលនេះ ក៏គាត់នៅតែមានចំនួនអ្នកបោះឆ្នោតតំណាងច្រើនដាច់ឆ្ងាយពីលោក ប៊ែរនី ស៊ែនឌើសដែរ ពោលគឺ១១៧៨សម្រាប់លោកស្រីគ្លីនតុន ទល់នឹង១០៩៧សម្រាប់លោកស៊ែនឌើស។ ចំនួនសម្លេងភាគច្រើនសម្រាប់បេក្ខជនគណបក្សនេះ គឺ២៣៨៣សម្លេង។ លោកស្រីហ៊ីឡារី កំពុងតែដាក់ការសង្ឃឹមទៅលើការបោះឆ្នោតនៅរដ្ឋញូយ៉ក ដែលគាត់ធ្លាប់ធ្វើជាសមាជិកព្រឹទ្ធសភារវាងពីឆ្នាំ២០០១ដល់២០០៩។
យ៉ាងណាក៏ដោយ លទ្ធផលចុងក្រោយសម្រាប់គណបក្សទាំងពីរ នៅមិនទាន់អាចស្មានដឹងនៅឡើយ ព្រោះអ្វីៗអាចប្រែប្រួលបានគ្រាប់ពេលវេលា។ ដូចជាក្នុងកាលៈទេសៈនេះជាដើម បេក្ខជនលោក ធេត គ្រូស ខាងគណបក្សសាធារណរដ្ឋ ក៏ដូចជាបេក្ខជនលោក ប៊ែរនី ស៊ែនឌើស ខាងគណបក្សប្រធាធិបតេយ្យ កាលពីដំបូងគ្មាននរណាគេស្គាល់ច្រើន ហើយមិនសូវមានសង្ឃឹមទេ។ បន្តែឆ្លងកាត់ការឃោសនាយ៉ាងសកម្ម បេក្ខជនទាំងពីរកំពុងធ្វើឲ្យបេក្ខជនពីរនាក់ផ្សេងទៀតមានការភ័យព្រួយមិនស្ទើរទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ