តុលាការឧទ្ធរណ៍សហព័ន្ធនៅសាន់ហ្រ្វាន់ស៊ីស្កូ ច្រានចោលក្រិត្យច្បាប់អន្តោប្រវេសន៍
ជាថ្មីម្តងទៀត តុលាការអាមេរិក បានច្រានចោលក្រិត្យច្បាប់អន្តោប្រវេសន៍របស់លោកដូណាល់ ត្រាំ។ ក្រោយពេលដែលតុលាការរដ្ឋហាវ៉ៃ បានបដិសេធសុពលភាពផ្លូវច្បាប់ របស់ក្រិត្យច្បាប់អន្តោប្រវេសន៍ កាលពីខែមីនា រដ្ឋាភិបាលលោកត្រាំ បានដាក់ពាក្យប្តឹងឧទ្ធរណ៍ នៅចំពោះមុខតុលាការឧទ្ធរណ៍សហព័ន្ធ រដ្ឋកាលីហ្វ័រញ៉ា។ តែពេលនេះ តុលការនេះ បានច្រានចោលបណ្តឹងទាស់របស់រដ្ឋាភិបាល ដែលការនេះ នឹងបើកផ្លូវ ឲ្យឡើងទៅកាន់តុលាការកំពូល។
ចុះផ្សាយនៅថ្ងៃ៖ កែប្រែថ្ងៃទី៖
ចៅក្រមតុលាការឧទ្ធរណ៍សហព័ន្ធនៅសាន់ហ្វ្រាន់ស៊ីស្កូ (Circuit 9) បានច្រានចោលបណ្តឹងទាស់របស់រដ្ឋាភិបាលអាមេរិក ដែលប្តឹងឲ្យលប់ចោលសាលដីការបស់តុលាការរដ្ឋហាវ៉ៃ។ កាលពីខែមីនា ចៅក្រមតុលាការហាវ៉ៃ បានសម្រេចថា ក្រិត្យច្បាប់របស់លោកប្រធានាធិបតី ដូណាល់ ត្រាំ ដែលហាមមិនឲ្យប្រជាជនប្រទេសអ៊ីស្លាមមួយចំនួន ធ្វើដំណើរចូលសហរដ្ឋអាមេរិក គឺវាមានខ្លឹមសារ ផ្ទុយពីរដ្ឋធម្មនុញ្ញអាមេរិក។
នៅថ្ងៃទី ១៣ មិថុនា ចៅក្រមទាំង៣រូប នៃតុលាការឧទ្ធរណ៍ក្រុងសាន់ហ្វ្រាន់ស៊ីស្កូ បានសម្រេចរក្សាទុកសាលដីកានេះ ក៏ប៉ុន្តែមិនបានលើកឡើងអំពីភាពស្របរឺមិនស្រប ទៅនឹងរដ្ឋធម្មនុញ្ញ នៃក្រិត្យច្បាប់អន្តោប្រវេសន៍ទេ។ ចៅក្រមសាលាឧទ្ធរណ៍ គ្រាន់តែបានបញ្ជាក់ថា ក្រិត្យច្បាប់អន្តោប្រវេសន៍ មិនបានផ្តល់នូវអំណះអំណាងគ្រប់គ្រាន់ ដែលតំរូវឲ្យមានការហាមឃាត់មនុស្សដល់ទៅ១៨០លាននាក់ មិនឲ្យចូលសហរដ្ឋអាមេរិក។ ការហាមឃាត់ ដោយសំអាងទៅលើតែសញ្ជាតិ របស់ប្រជាជនទាំងនោះ គឺវាមិនគ្រប់គ្រាន់ ហើយមិនសមហេតុផលឡើយ។
លោក Jeff Sessions រដ្ឋមន្ត្រីក្រសួងយុត្តិធម៌ បានលើកឡើងថា លោកមិនយល់ស្របនឹងការសម្រេចរបស់ចៅក្រមឡើយ ហើយលោក ក្នុងនាមរដ្ឋាភិបាល និងរៀបចំដាក់ពាក្យប្តឹងទៅតុលាការកំពូលបន្តទៀត។
សូមបញ្ជាក់ថា នេះជាលើកទី៤ហើយ ដែលតុលាការនៅអាមេរិក បានចេញសាលក្រម ប្រឆាំងនឹងក្រិត្យច្បាប់អន្តោប្រវេសន៍ ចុះហត្ថលេខាដោយលោកដូណាល់ ត្រាំ កាលពីថ្ងៃទី៦ មីនា។ ប្រជាជនប្រទេសចំនួន៦ មានលីប៊ី អ៊ីរ៉ង់ សូម៉ាលី ស៊ូដង់ យេមែន និងស៊ីរី ត្រូវបានហាមឃាត់ មិនឲ្យធ្វើដំណើរទៅអាមេរិក ក្នុងរយៈពេល៣ខែ។
កាលពីថ្ងៃទី ២៥ ឧសភា តុលាការឧទ្ធរណ៍សហព័ន្ធ នៅរដ្ឋវៀរជីនី (Circuit 4) បានរក្សាទុកសេចក្តីសម្រេចរបស់តុលាការរដ្ឋម៉ារីលែន ដែលបានកាត់សេចក្តីថា ក្រិត្យច្បាប់អន្តោប្រវេសន៍របស់លោកត្រាំ មានខ្លឹមសាររើសអើងប្រកាន់ពូជសាសន៍ និងសាសនា។ ក្រោយសេចក្តីសម្រេចនេះ រដ្ឋាភិបាល ក៏បានដាក់ពាក្យប្តឹងទៅតុលាការកំពូលដែរ។ បើតាមការរំពឹងទុក តុលាការកំពូល នឹងត្រូវសម្រេចសេចក្តី នៅរវាងសប្តាហ៍នេះ ឬសប្តាហ៍ក្រោយ។
រដ្ឋាភិបាលអាមេរិក បានលើកឡើងថា ការហាមឃាត់ប្រជាជននៅតាមប្រទេសទាំងនោះ មិនឲ្យមកសហរដ្ឋអាមេរិក គឺជាការហាមឃាត់បណ្តោះអាសន្ន ដើម្បីអនុញ្ញាតិឲ្យអាជ្ញាធរអាមេរិក មានពេលចាត់ចែងឲ្យបានម៉ឺងម៉ាត់ ជុំវិញវិធានការទប់ស្កាត់ ការហូរចូលនូវពួកបណ្តាញភេរវកម្ម។ មួយវិញទៀត ក្នុងក្រិត្យច្បាប់ ក៏ពុំមានប្រើពាក្យថា សាសនាអ៊ីស្លាម ដែរ។
តែយ៉ាងណា ក្រុមអ្នកដើមបណ្តឹង បានលើកយកជាសំអាងនូវ សារដែលលោកដូណាល់ ត្រាំ បានសរសេរផ្ទាល់ដៃ ជារឿយៗ លើទំព័រTwitter ដែលសារទាំងនោះ បង្ហាញពីបំណង និងឆន្ទៈពិតប្រាកដរបស់លោកដូណាល់ ត្រាំ ដែលចង់ ហាមឃាត់ប្រជាជនអ៊ីស្លាម មិនឲ្យចូលដីសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ