ដូណាល់ ត្រាំ មិនព្រមសន្យាថានឹងទទួលស្គាល់លទ្ធផលបោះឆ្នោត ដោយចោទថាមានការបន្លំ
ការជជែកតទល់សំដីគ្នាលើកទី៣ និងជាលើកចុងក្រោយ រវាងបេក្ខជនឈរឈ្មោះបោះឆ្នោតប្រធានាធិបតីអាមេរិកទាំងពីរ បានធ្វើឡើងកាលពីល្ងាចថ្ងៃពុធម្សិលមិញ។ ជាមួយនឹងរឿងអាស្រូវថ្មីៗបន្ថែមទៀត ទាក់ទិនទៅនឹងអាកប្បកិរិយា និងសម្តីអសុរស របស់លោកដូណាស់ ត្រាំ បេក្ខជនរូបនេះ ហាក់បានចាញ់ប្រៀបលោកស្រីគ្លីនតុន ក្នុងពេលជជែកដេញដោលទល់សម្តីគ្នា។ តែអ្វីដែលធ្វើឲ្យគេភ្ញាក់ផ្អើលបំផុតនោះ គឺនៅពេលដែលលោកដូណាល់ ត្រាំ បានប្រកាសថា ការបោះឆ្នោតនេះពោរពេញទៅដោយការបន្លំ ហើយលោកមិនព្រមសន្យាថា នឹងអាចទទួលយកលទ្ធផលបោះឆ្នោតនេះទេ។
ចុះផ្សាយនៅថ្ងៃ៖
ស្តាប់ - ០២:២២
នេះគឺជាលើកទីមួយហើយ ក្នុងប្រវត្តិបោះឆ្នោតនៅអាមេរិក ប្រទេសបិតាប្រជាធិបតេយ្យ ដែលបេក្ខជនប្រធានាធិបតីមិនព្រមទទួលយកលទ្ធផលបោះឆ្នោត។ សូមរំលឹកថា បើទោះបីជាប្រព័ន្ធបោះឆ្នោតអាមេរិក មានលក្ខណៈស្មុគស្មាញយ៉ាងណាក៏ដោយ តែកន្លងមកបេក្ខជនឈរឈ្មោះ បោះឆ្នោតទាំងអស់ តែងតែផ្តល់សេចក្តីទុកចិត្ត ដល់ការរៀបចំ និងការសម្រេចលទ្ធផលនៃការបោះឆ្នោត។
តែចំលែក លោកដូណាល់ត្រាំ បានឆ្លើយថា លោកមិនសន្យាទេ ថាលោកនឹងទទួលយកលទ្ធផល។ លោកនឹងរងចាំមើលលទ្ធផលជាក់ស្តែងនៅពេលនោះ។ ដូណាល់ ត្រាំបន្ថែមថា ការបោះឆ្នោតលើកនេះ មានរឿងមិនប្រក្រតីច្រើនណាស់ ហើយលោកជឿថានឹងមានការបន្លំសន្លឹកឆ្នោតទៀត។ ចំណែក លោកស្រីគ្លីនតុន បានឆ្លើយបកមកវិញថា សម្តីរបស់លោកដូណាល់ត្រាំ គឺជាការប្រមាថមើលងាយ យ៉ាងធ្ងន់មកលើប្រព័ន្ធបោះឆ្នោត និងលទ្ធិប្រជាធិបតេយ្យគំរូ របស់សហរដ្ឋអាមេរិក។
ផ្ទុយទៅវិញ នៅមុនចាប់ផ្តើមវេទិកាជជែកដេញដោល ប្រធានដឹកនាំការឃោសនារបស់លោកដូណាល់ត្រាំ ក៏ដូចជាកូនស្រីច្បងរបស់បេក្ខជនរូបនេះ បានអះអាងថា ទោះលទ្ធផលយ៉ាងណាក៏ដោយ ក៏លោកដូណាល់ ត្រាំ ទទួលយកដែរ។
នៅក្នុងវេទិកាជជែកទទល់គ្នា កាលពីល្ងាចថ្ងៃពុធម្សិលមិញ ក្រៅពីបានចោទ ជាច្រើនលើកច្រើនសារថា លោកស្រីគ្លីនតុនជាមនុស្សនិយាយកុហក លោកដូណាល់ ត្រាំ បានចោទ លោកស្រីគ្លីនតុនទៀត ថាជាអ្នកបានញុះញង់ ឲ្យមានមនុស្សស្រីច្រើននាក់ មកប្រឌិតរឿងចោទប្រកាន់លោក។ ចំណែកលោកស្រីគ្លីនតុនវិញ បានចោទលោកដូណាល់ត្រាំ ថាធ្វើខ្លួនជាអាយ៉ងរបស់ពូទីន។
សូមបញ្ជាក់ថា ជាមួយនឹងរឿងអាស្រូវផ្ទួនៗ ទាក់ទិនទៅនឹងអាកប្បកិរិយាមិនសមរម្យ សម្តីបាតផ្សារ មើលងាយមនុស្សស្រី បានធ្វើឲ្យបេក្ខភាពលោកដូណាល់ ត្រាំ បាក់ស្រុតយ៉ាងខ្លាំង។ យ៉ាងណាមិញ អ្នកវិភាគជាច្រើនយល់ថា ការជជែកតទល់គ្នាលើកទីបីនេះ គឺលោកស្រីគ្លីនតុន បានសង្កត់ និងមានអំណះអំណាងល្អជាងលោកដូណាល់ត្រាំ ចំណែកលោកដូណាល់ត្រាំ បានតែនិយាយការពារខ្លួន និងឌឺដងជាលក្ខណៈបុគ្គល ដោយគ្មានខ្លឹមសារ។
យោងតាមការស្ទាបស្ទង់មតិ បើទោះបីប្រជាជនអាមេរិកទូទៅ មិនសូវជាពេញចិត្តលោកស្រីហ៊ីឡារី គ្លីនតុនក៏ដោយ តែពួកគេសុខចិត្តជ្រើសយកលោកស្រី ជាជាងបោះឲ្យលោកដូណាល់ ត្រាំ។ លទ្ធផលស្ទាបស្ទង់មតិបង្ហាញថា ៤៦,៣% ដែលមានបំណងបោះឲ្យលោកស្រីគ្លីនតុន ទល់នឹង៣៩% ខាងលោកដូណាល់ត្រាំ។ យ៉ាងណាមិញ លោក Lindsey Graham សមាជិកព្រឹទ្ធិសភាគណបក្សសាធារណរដ្ឋនៅរដ្ឋការ៉ូលីន ខាងត្បូង បានសរសេរនៅលើទំព័រTwetter ថា បើដូណាល់ត្រាំចាញ់ឆ្នោត គឺមកពីដូណាល់ត្រាំខ្លួនឯងមិនកើត មិនមែនមកពីមានការបន្លំក្នុងការបោះឆ្នោតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ