លោក បារ៉ាក់ អូបាម៉ា ធ្វើសមាជប្រចាំឆ្នាំជាលក្ខណៈឃោសនាបោះឆ្នោត
ថ្ងៃទី២៤មករា ម្សិលមិញ លោក បារ៉ាក់ អូបាម៉ា ប្រធានាធិបតីអាមេរិកអាមេរិក បានថ្លៃងសុន្ទរកថា “ស្តីពីស្ថានភាពជាតិ” ជាលើកទីបី និងអាចជាលើកចុងក្រោយ ប្រសិនបើលោកអូបាម៉ា មិនជាប់ឆ្នោតជាប្រធានាធិបតីជាថ្មីនៅខែវិច្ឆិកា។ នេះជាសមាជ ប្រចាំឆ្នាំ ជាទម្លាប់ និងជាប្រពៃណី ដែលប្រធានាធិបតីអាមេរិកត្រូវថ្លែងពី “ស្ថានភាពសហរដ្ឋ” នៅចំពោះមុខសភា និងព្រឹទ្ធិសភាអាមេរិក ក៏ប៉ុន្តែសុន្ទរកថាលើកនេះ មានបង្កប់អត្ថន័យយ៉ាងជ្រាលជ្រៅ ជាការឃោសនានយោបាយ សម្រាប់សម័យបោះឆ្នោតប្រធានាធិបតី ខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
សុន្ទរកថា ប្រមាណជាងមួយម៉ោង នៅចំពោះមុខសមាជិកសភា និងព្រឹទ្ធសភា ដែលលោកប្រធានាធិបតីអាមេរិក បានសម្អិតសម្អាងដោយប្រុងប្រយ័ត្នជាមួយនឹងទីប្រឹក្សា បានវាយប្រហារ ជាបឋម ទៅការប្រេះឆា នៅសភា និងព្រឹទ្ធសភា ការជំទាស់ ជាស្វ័យប្រវត្តិ និងឥតឈប់ឈរ ពីសំណាក់គណបក្ស ប្រឆាំងសាធារណរដ្ឋ ដែលបើតាមលោកអូបាម៉ា គឺជាឧបសគ្គចំបងក្នុងការជំរុញប្រទេសឱ្យដើរទៅមុខបាន។
បន្ទាប់មក លោក អូបាម៉ា បានលើកឡើងពីបញ្ហាសេដ្ឋកិច្ច ដោយបានគូសវាសផែនការកសាងសេដ្ឋកិច្ចយូរអង្វែងមួយ។ ពោលគឺ ធ្វើកំណែទម្រង់ប្រព័ន្ធពន្ធដារ ដោយយកពន្ធលើប្រាក់ចំណូល យ៉ាងតិចបំផុត ៣០% ពីក្រុមអ្នកមាន -មហាសេដ្ឋី ដើម្បីផ្តល់សំណាងស្មើៗគ្នាដល់គ្រប់ជនអាមេរិក។
សើរើឡើងវិញ ច្បាប់ពន្ធដារចំពោះក្រុមហ៊ុន ដើម្បីឱ្យរោងចក្រសហគ្រាសបន្តឈរជើងនៅសហរដ្ឋអាមេរិក និងទាក់ទាញវិនិយោគិនបរទេសមករកស៊ីនៅសហរដ្ឋ។ ទប់ស្កាត់ការប្រកួតប្រជែងសេដ្ឋកិច្ចខុសច្បាប់ មានជាទិ៍មកពីចិន ក៏ជាអាទិភាពមួយរបស់រដ្ឋបាលអូបាម៉ាដែរ ព្រោះវាអាចនាំការងារជាច្រើនដល់ពលរដ្ឋអាមេរិក។
ទាក់ទងនឹងប្រទេសអ៊ីរ៉ង់ លោកប្រធានាធិបតិអាមេរិក មានជំហរដាច់ខាត ហាមឃាត់ក្រុងតេអេរ៉ង់ មិនឱ្យផលិតអាវុធនុយក្លេអ៊ែរបានឡើយ។ អាមេរិកអាចប្រើគ្រប់មធ្យោបាយទាំងអស់ ! នេះជាការធានាអះអាងរបស់លោកអូបាម៉ា មុននឹងបញ្ជាក់ថា “ការចរចាដោយសន្តិវិធីជាមួយអ៊ីរ៉ង់មិនទាន់ហួសពេលទេ”។
គ្មានអ្វីភ្ញាក់ផ្អើល បក្សសាធារណរដ្ឋ បានបញ្ចេញប្រតិកម្មភាពបន្ទាប់ពីបានស្តាប់សុន្ទរកថាប្រធានាធិបតីរួច ដោយបានបន្ទោសលោក អូបាម៉ា ថាភ្លេចលើកឡើងពីបញ្ហាអត់ការងារ និងហៅលោកអូបាម៉ាថា ជាប្រធានាធិបតីបរាជ័យ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ