លោកបារ៉ាក អូបាម៉ាទទួលយកជាបានការ ការគំរាមកំហែងរបស់ពួកភេរវជន
លោកបារ៉ាក អូបាម៉ា នៅល្ងាចថ្ងៃសុក្រម្សិលមិញ២៩តុលា បានធ្វើសន្និសីទសារព័ត៌មានដ៏ខ្លីមួយ ដើម្បីជម្រាបប្រាប់ប្រជាជនអាមេរិកាំងឱ្យដឹងអំពីស្ថានភាពនៃកញ្ចប់ គួរឱ្យមន្ទិលសង្ស័យរកឃើញនៅក្នុងយន្តហោះដឹកទំនិញ២គ្រឿង មួយនៅទីក្រុងDubai មួយទៀតនៅប្រទេសអង់គ្លេស។ម្យ៉ាងទៀត សេតវិមានបានអរគុណArabie Saoudite ចំពោះជំនួយរបស់ប្រទេសនេះដែលបានអនុញ្ញាតឱ្យស្គាល់ភិនភាគ អត្តសញ្ញាណនៃការគំរាមកំហែងនៃកញ្ចប់ផ្ញើពីប្រទេសយេមេនមកកាន់ ស.រ.អា។
ចុះផ្សាយនៅថ្ងៃ៖
សេចក្តីរាយការណ៍របស់Jean-Louis Pourtet ពីទីក្រុងWashington ប្រែសម្រួលដោយវីនស្តុន រតនា
សំរាប់លោកប្រធានាធិបតីអាមេរិកាំងដែលចាប់តាំងពីល្ងាចថ្ងៃព្រហស្បតិ៍ម្ល៉េះ បានទទួលព័ត៌មានពីទីប្រឹក្សារបស់គាត់ទទួលបន្ទុកខាងប្រយុទ្ធប្រឆាំងនឹងភេរវនិយមគឺលោកJohn Brennan ការគំរាមកំហែងរបស់ពួកភេរវជនអាច” ទទួលយកជាបានការ”។ គាត់បានបញ្ជាក់ប្រាប់ថា កញ្ចប់គួរឱ្យមន្ទិលសង្ស័យត្រូវបានផ្ញើសំដៅទៅឱ្យវិហារពួកJuifsពីរនៅទីក្រុងChicago និងទំនងជាមានគ្រឿងផ្ទុះ។
លោកបារ៉ាក អូបាម៉ា បានយកម្រាមដៃចង្អុលចោទប្រកាន់ពួកភេរវជនមួយក្រុមថា “ ថ្វីបើយើងនៅតែបន្តប្រមែប្រមូលគ្រប់តែហេតុការណ៍ក៏ដោយ ក៏យើងដឹងថា កញ្ចប់មកពីប្រទេសយេមេន។ យើងក៏ដឹងដែរថា អាល់-កៃដានៅឩបទ្វីបអារ៉ាប៊ី គឺភេរវជនមួយក្រុមតាំងនៅប្រទេសយេមេន នៅតែបន្តរៀបចំអំពើភេរវកម្មប្រឆាំងនឹងប្រទេសយើង ជនរួមជាតិយើង មិត្តភក្តិនិងសម្ព័ន្ធមិត្តរបស់យើង”។
លោកប្រធានាធិបតីបានពោលបន្ថែមទៀតថា រដ្ឋាភិបាលយេមេនបានសន្យាធ្វើសហប្រតិបត្តិការពេញលេញទាំងស្រុង នៅក្នុងការស៊ើបអង្កេត។ កញ្ចប់ទាំងពីរពុំដែលបានមកដល់ដីស.រ.អា.ឡើយ ដោយហេតុវាត្រូវបានស្ទាក់ស្កាត់ចាប់បាននៅទីក្រុងDubaiនិងប្រទេសអង់គ្លេស ស្របតាមប្រភពព័ត៌មានអាមេរិកាំង ដោយសារព័ត៌មានសម្ងាត់ផ្តល់ដោយភ្នាក់ងារអារ៉ាប៊ី សាអ៊ូឌីត។
ទោះជាយ៉ាងណាក្តី ក៏សន្តិសុខត្រូវបានពង្រឹងថែមទៀតនៅអាកាសយានដ្ឋានអាមេរិកាំងនានា ហើយយន្តហោះមួយគ្រឿងនៃក្រុមហ៊ុនអាកាសចរណ៍អេមីរ៉ាអារ៉ាបរួមត្រូវបានអមកំដរការពារដោយយន្តហោះប្រដេញនៃកងទ័ពអាកាសរហូតមកដល់អាកាសយានដ្ឋានKennedy នៅទីក្រុងNew York ពីព្រោះនៅក្នុងយន្តហោះនេះ មានកញ្ចប់មួយមកពីប្រទេសយេមេន ប៉ុន្តែបន្ទាប់ពីបានពិនិត្យឆែកឆេរមក វាគ្មានផ្ទុកគ្រឿងផ្ទុះអ្វីសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ